Be à gá náa vaá Bàrì à dú vulà, éé ní ea náa vaá gbò bõ̀ònaló fã̀ e bà kọ́ọ̀ bà gé fãè Bàrì gé sígági pọ́lọ́ ẹ́? Kà kà bel ea dì dú kọọ̀, gbò bõ̀ònaló fã̀í náa gé náa bùlà Bàrì, bà náa kọọ̀ gbò nen á gá nyimá kà kà bel ea kil ló Bàrì. Mósĩ́ deè ní e bà náa kọọ̀ gbò nen á gá nyimá kà kà bel ea kil ló Bàrì e? Gbò nú e bà gé náa tọ́á ló Bàrì naa vàẹ? Vaá éé ní e ẹlẹ é náa kilma ló é?

1. Mósĩ́ deè ní e bõ̀ònaló kyáá fã̀ gé náa kọọ̀ gbò nen á gá nyimá kà kà bel ea kil ló Bàrì tení dú ló gbò nú e bà nóòmà ẽ?

Bõ̀ònaló kyáá fã̀ a “tú kyáá bel nyaamá dẽè kà kà bel ea kil ló Bàrì.” (Róm̀ 1:25, NW ) Dì belí nu dòòmà bá, gã́bug bõ̀ònaló fã̀ náa nóòmà béè Bàrì gbò e bà ólò sí ba bõ̀ònaló. Sõò, Kpá Káí kọ́ọ̀ èé íè ge tú béè Bàrì kolmáe. (Róm̀ 10:13, 14) Tṍó e pọ́lọ́ nu nááá, sìgà gbò tùle bõ̀ònaló fã̀ ólò kọọ̀ à dú bùlà Bàrì kọ á naaá naa vó. Sõò níá náa dú kà kà. Bàrì náa ólò naa kọọ̀ pọ́lọ́ nu á naaá. (Bugi Jém̀z 1:13.) À dú pọ́lọ́ kọọ̀, gbò kyáá bel e gbò tùle bõ̀ònaló fã̀ nóòmà a náa kọ á tavala ló gbò nen gè vùlè Bàrì.

2. Mósĩ́ deè ní e bõ̀ònaló kyáá fã̀ náa kọọ̀ gbò nen á gá nyimá kà kà bel ea kil ló Bàrì tení dú ló ba lábvẹ́?

Bõ̀ònaló kyáá fã̀ náa ólò tú lé bá sẹ̀ẹ̀mà gbò nen dì belí Jìhóvà. Kpá Káí kọ́ọ̀ pọ́lọ́ bõ̀ònaló kyáá fã̀ “a bọọ kũá ló káála.” (Kùùà Nù 18:5) Lọl mm̀ gbò gbáá ea kil nvéeá dọ̀ kátogóí, gbò bõ̀ònaló fã̀ a gbááá ló bìlà bẹbẹ̀l, nvèè sãa kúm bé gím, vaá tenmà àbèè ge naa kọọ̀ bàá fẹ́ gã́bug nen. Gã́bug gbò tùle bõ̀ònaló fã̀ ólò gbĩ́ gè bã̀ méné vaá bà ólò gbóó kọ́ nè gbò e bà ólò sí ba bõ̀ònaló kọ bàá domà kpègè. Gbò láb e bà gé lábvíí zógè kọọ̀ bà náa zẹ́ẹ́ nyimá ló Bàrì, vaá vó gbóó naa kọ bàá gá sìm tùlà gè noòmà kà kà bel ea kil ló Bárì.—Bugi 1 Jọ́ọ̀n 4:8.

3. Bàrì ẹb bõ̀ònaló kyáá fã̀ naa vàẹ?

Beè nyíé ni biilà ló gbò nú e bõ̀ònaló kyáá fã̀ gé náa, ò bulà kọọ̀ àé tọ́á ló Jìhóvà naa vàẹ? À vulè gbò nen, sõò nyíée náa ẹ́ẹ́ ló gbò tùle bõ̀ònaló fã̀ e bà gé kpọ́ kyáá bel ea kilíé ló vaá tú pọ́lọ́ bá sẹ̀ẹ̀mà gbò e bà di mm̀ ba bõ̀ònaló. À zigà kọọ̀ àé dú gè kyọ̀sĩ́ bõ̀ònaló kyáá fã̀ vaá “bà náa é monnáe tọ́ọ̀ dee.” (Kùùà Nù 18:21) Pọ́ì ńkem̀ tṍó àla, Bàrí é nveè kùbmà ló dénè kyáá bõ̀ònaló fã̀.—Kùùà Nù 18:8.

 KPÁÁ NÓ BỌ̀Ọ̀VẸ̀

4. Bàrì náa ténmà dénè bõ̀ònaló fã̀

Gã́bug nen zigà kọọ̀ bõ̀ònaló fã̀ bélí kele-kele èèlè ea é túlè nen imá ló Bàrì. Sõò é kọọ̀ à dú kà kà naa vó? Bugi Máátìù 7:13, 14, vaá ò gbóó aalai nakà bíbví:

• Éé ní e Kpá Káí kọ́ kilma ló èèlè e nen é téní boo ié dùm ẽ?

Bìlà VÍDIÒÍ, vaá ò gbóó aalai bíb ea nyoone.

• É kọọ̀ Kpá Káí kọ́ọ̀ à íe gã́bug bõ̀ònaló fã̀ ea gé náa nú ea léémá Bàrì?

 6. Bàrì gbĩ́ gè nvèè bá nè gbò nen kọ bàá aa mm̀ bõ̀ònaló kyáá fã̀

Bugi Kùùà Nù 18:4, a vaá ò gbóó aalai nakà bíbví:

• À tõó ní ló naa vàẹ gè nyimá kọọ̀ Bàrì gbĩ́ gè nvèè bá nè gbò e bõ̀ònaló kyáá fã̀ a náa kọ bàá gá nyimá kà kà bel ea kilíé ló é?

7. Kilsĩ́ gè nó nú ea kil ló kà kà Bàrì

É kọ àé bọ́ló kọọ̀ gbò pọ́lọ́ nú e bõ̀ònaló kyáá fã̀ gé nóòmà á tọá ló bé eo ẹbvì Bàrì naa? Ni dòòmà dẽe ló ene kà nvín e bè náa tú dùùlà bá deè tṍ a tẹ̀ vaá à gbóó làb nu aa ba tọ vaá bã mm̀ pọ́lọ́ dùm. A tẹ̀ náa nveè sãa kúm gbò a pọ́lọ́ láb. Éé ní ea náa vaá náa é bọ́ló gè bẽgẽ̀ bel tẹ̀a ló pọ́lọ́ dùm ea nvín bã́ m ẽ́?

• É kọọ̀ àé bọ́ló gè bẽgẽ̀ bel Jìhóvà vaá òòà aa ló gè nó nú ea kilíé ló boo béè nú e gbò bõ̀ònaló kyáá fã̀ gé náa?

 NÚ E NI NÓ

Bõ̀ònaló kyáá fã̀ a náa kọọ̀ gbò nen á gá nyimá kà kà bel ea kil ló Bàrì tení dú ló ba kyáá nòòmànù nè gbò láb e bè náa bọ́ló. Bàrì é kyọsĩ́ bõ̀ònaló kyáá fã̀.

Ge Òòa Boo

• Gbò nú e bõ̀ònaló kyáá fã̀ nóòmà nè bé e bà lábví láb naa tọ́a ní ló naa vàẹ?

• Gbò nú e bõ̀ònaló kyáá fã̀ gé náa tọ́á ló Jìhóvà naa vàẹ?

• Éé ní e Bàrì é náa ló bõ̀ònaló kyáá fã̀ ẽ?