ANG ỌJẸ́JẸ 13
Jaabwọ ká Ịgba Ọgbagba nya Ọnọọkịla Bịrị Ẹnyị nya Ohe
Ohe ri ọháha. Ma, ịyẹ tị́ du ká ịgba ọgbagba ịlẹ kị ya nyori ịwa nyị kaa họ ụkụrwọ ha Ohe, họ iru nya ang inyibyi lụmẹ ịịwẹ? Ẹlịlẹhị ri, ịgba ọgbagba ịwẹ ri ịnya ọnọọkịla ịnyị; ị kaa bịrị ẹnyị nya Ohe. Ụgbẹyị oyina ị tị́ bịrị ẹnyị nyamwụ? Ányị ẹla ọọwa à tị́ lọọ? Ẹlịyẹ ọ tị́ ja họ u-uhye nya ọọwa?
1. Ányị ịgba ọgbagba nya ọnọọkịla à tị́ kaa bịrị ẹnyị nya Ohe bwula ang ọmẹjẹ nyaa?
Ịgba ọgbagba nya ọnọọkịla “hu ẹla nya ịlẹhị . . . nya Ohe Oluhye kaka nyẹ ọnọọkịla.” (Ala iRom 1:25) Ọ-chụ pwokwita, iru nya ịgba ọgbagba-á kaa mẹ ẹnyị nya Ohe jẹ angịnyị ịlụwa ka. Ma, ịBayịbụụ ya nyori ahị nyị ka wụrụ ẹnyị nya Ohe pyii. (Ala iRom 10:13, 14) Ụka ká ang ọtịpyọ á họ, alegbeju nya ịgba ọgbagba ịhyẹ kaa ya nyori irya nya Ohe ịnyị. Ọnọọkịla tị ịnyị. Ohe-é kaa ju ọmwụ nya ang onyobyi ẹnẹnẹhẹ ka. (Wa iJemsi 1:13.) Ọ tolujwo lụmẹ nyori ịnịịkịla ịwẹ ku angịnyị rụ hwẹẹ hi Ohe lẹ.
2. Ányị ịgba ọgbagba nya ọnọọkịla à tị́ kaa bịrị ẹnyị nya Ohe bwula abwẹla nyaa?
Ịgba ọgbagba nya ọnọọkịla á kaa kpa angịnyị jaabwọ ká iJihova kaa kpaa ka. ỊBayịbụụ ya nyori ịhọbịrị nya ịgba ọgbagba nya ọnọọkịla nyị “luhye lụmẹ-lụmẹ kaka gu epwoohe lẹ.” (Ọwụrụụ-wụrụ 18:5) Ẹ-ẹpwụ nya ẹka ohu ịmanyị tị́, ịgba ọgbagba yụbwọ ju ẹla nya upe, chẹkpẹ ju ẹwụ ọdada, ju ọmwụ nya igu nya iru nya angịnyị ịlẹ kahị ka jụ wa kpá ka lee ọ-myị ọnụ ju igu nya angịịwa. Alegbeju nya ịgba ọgbagba ịhyẹ kaa tịtọ nyọka kpụdụ, lẹ ị kaa da alekpeleji nyaa okpoko. Abwẹla nyaa ịwẹ mẹjẹ nyori ị́ dọmwụ jẹ́ Ohe ka, lẹ ị́ pwoku nyọka ku ọmwakpa nyamwụ ka.—Wa 1 ịJọn 4:8.
3. Ányị ẹla nya ịgba ọgbagba nya ọnọọkịla à tị́ la Ohe?
Kori ká ẹla ịlẹ ká ịgba ọgbagba nya ọnọọkịla wẹẹ họ á jung agbama, ányị a tị́ me irya kị ka la iJihova? Angịnyị họ́ọ, ma agbama nyamwụ wẹẹ wuru jahị da alegbeju nya ịgba ọgbagba ịlẹ kị wẹẹ bịrị ẹnyị nyamwụ bala ọ-kpa alekpeleji nyaa ụ-ụgbẹyị ọtịpyọ. O chehe nyori ịgba ọgbagba nya ọnọọkịla nyị ka tayịreji, ụka ọọwa ahị nyị́ tị ka ‘jẹ́-ẹ yọọ kpong-kpong kaka.’ (Ọwụrụụ-wụrụ 18:21) Lụka o-kpii, Ohe ka ta ịgba ọgbagba nya ịnịịkịla wuu ayịreji.—Ọwụrụụ-wụrụ 18:8.
JẸ́ GỤ ỌỌWA
Jẹ́ ang gụ ọọwa u-uhye nya abwọlẹ ká Ohe yẹ ịgba ọgbagba nya ọnọọkịla. Jẹ́ ang gụ ọọwa u-uhye nya ang ọlẹ ká ala ịgba ọgbagba nya ọnọọkịla họ bala ang odudu kọọwa á ka hung abwọ la ọ-jẹ́ iJihova gụ ọwọwa ka.
4. Ohe-é kaa ye ịgba ọgbagba wuu myị ka
Angịnyị lụmẹ-lụmẹ ya nyori ịgba ọgbagba nyị lala agbẹyị ịdatị-datị ịlẹ kị da ka ẹga nya Ohe ookpokpo. Ma ẹlịlẹhị ịnyị? Wa iLuku 13:24, kanụ ya ẹla u-uhye nya ịtọ ẹla ọlẹ:
-
Ẹlịyẹ ịBayịbụụ à tị́ ya u-uhye nya ụgbẹyị ọlẹ kọ da ka ọhịhị?
Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.
-
ỊBayịbụụ ya nyori ịgba ọgbagba ịlẹ kịị họ ẹla kpụ Ohe ịpyọ nyị lụmẹ?
5. Ịgba ọgbagba nya ọnọọkịla á kaa gbịla ọháha nya Ohe ka
Ịgba ọgbagba bịrị ẹnyị nya Ohe a-agbẹyị lụmẹ-lụmẹ lẹ. Ụgbẹyị ọhẹ ọlẹ kọ tịpyọ gụ wuu ri ọlẹ kị kaa lụbwọ ẹ-ẹpwụ nya ẹwụ. Nyọka yẹ ọ-chụ pwokwita ọhẹ, yẹ IFIM ọwẹ, kanụ ya ẹla u-uhye nya ịtọ ẹla ịlẹ kị tọọ da.
-
Ẹlịyẹ ịchọọchị lụmẹ-lụmẹ à tị́ họ lụka nya ẹwụ nya odehe wuu oheeye?
-
Ányị ẹla ọlẹ kị họ à tị́ lang ahụ?
Wa ịJọn 13:34, 35 bala 17:16, kanụ ya ẹla u-uhye nya ịtọ ẹla ịlẹ:
-
Ányị a tị́ me irya kọ ka la iJihova ụka ká ala ịchọọchị á lụbwọ ẹ-ẹpwụ nya ẹwụ?
-
Ịgba ọgbagba nya ọnọọkịla ju ọmwụ nya ang ịtịpyọ lụmẹ-lụmẹ lẹ. Ụgbẹyị oyina a tị́ yẹ nyori ịgba ọgbagba lụmẹ-lụmẹ á gbịla ọháha nya Ohe ka?
Ịgba ọgbagba nya ọnọọkịla á gbịla ọháha nya Ohe ka
6. Ohe tịtọ ká angịnyị ka lịlaa bwu ẹpwụ nya ịgba ọgbagba nya ọnọọkịla?
Wa Ọwụrụụ-wụrụ 18:4, a kanụ ya ẹla u-uhye nya ịtọ ẹla ọlẹ:
-
Ányị ọ tị́ lang nyọlẹ ká jẹ́ nyori Ohe tịtọ nyọka da angịlẹ ká ịgba ọgbagba nya ọnọọkịla kpa hwahị ụbwọ?
7. Kịnyaa la ọ-ka jẹ́ ang u-uhye nya Ohe nyịlẹhị
Ọ chịla ká ẹla ịtịpyọ ịlẹ ká ịgba ọgbagba nya ọnọọkịla ya bala ọhọhọ ka gu abwọlẹ ká yẹ Ohe? Kụ irya nya ọnyị ọlẹ kọ myị ju ihi nya adamwụ ka, rụ hi ẹpwa, bala ọ-kaa họ ang ihideeji wẹẹ. Ẹla ọlẹ ká ọnyị ọwẹ họ-ọ́ kpụ adamwụ ịpyọ ka. Ịyẹ tị́ du kọ pwoku nyọka kpụ adịda ọwẹ abyị u-uhye nya ụgbẹyị ọlẹ ká ọnyị olegbeju ọngịrị ọwẹ wẹẹ hịhị ka?
-
Ọ pwoku nyọka kpụ iJihova abyị bala o-hwabwọ la ọ-ka jẹ́ ang u-uhye nyamwụ ọọlajị nya ẹla ịlẹ ká ịgba ọgbagba nya ọnọọkịla họ?
ANGỊHYẸ KAA YẸKẸẸ: “A ya ẹla nya ịgba ọgbagba balam ka chajị ịgba ọgbagba wuu ri ang nya alahị imiiye.”
-
Ịịwẹ a yọọ ịnyịnyị lẹ?
-
Abwẹla nya ịgba ọgbagaba nya ọnọọkịla chịla kọ ka gu abwọlẹ kahị kaa yẹ iJihova?
ẸLỊYẸ A TỊ́ JẸ́?
Ịgba ọgbagba nya ọnọọkịla bịrị ẹnyị nya Ohe bwula ang ọmẹjẹ nya ọnọọkịla bala abwẹla inyibyi nyaa. Ohe ja ta ịgba ọgbagba nya ọnọọkịla ayịreji.
Ẹlịyẹ A Tị́ Yụbwọ Chị?
-
Ányị a tị́ yẹ ang ịlẹ ká ịgba ọgbagba nya ọnọọkịla mẹjẹ bala abwẹla nyaa?
-
Ányị iJihova à tị́ yẹ ịgba ọgbagba nya ọnọọkịla?
-
Ẹlịyẹ Ohe à tị́ wẹẹ ka họ ịgba ọgbagba nya ọnọọkịla?
JẸ́ ANG ỊLẸ DỌỌ U-UHYE
Jẹ́ ang u-uhye nya agbẹyị imiiye ịlẹ ká iru nya ịgba ọgbagba kaa họ ẹla wụ́ Ohe ẹjẹ.
“Ịgba Ọgbagba Wuu La Ookpokpo? Ị Ka Ẹga nya Ohe Wuu?” (Ụpwụ ọla intanẹtị)
Ịyẹ tị́ du ká iJihova tịtọ kahị ka gbịgba họọ lawụlẹ bala angịkịla?
“O Ri Opyii Kahị ka Ji Ẹpwụ nya Ịgba Ọgbagba Ọhẹ?” (Ụpwụ ọla intanẹtị)
Ifada ọhẹ á la ọhụ obeji ị-ịgba ọgbagba nyamwụ ka. Ma, ọọwa á woo kpa la ọ-jẹ́ ẹlịlẹhị u-uhye nya Ohe ka.
“Ang Odudu ká Ifada Ọhẹ Rụ Hi Ịchọọchị Nyamwụ” (Awake! nya Ọya Oheeye, 2015)
Ẹ-ẹpwụ nya ẹka ohu ịmanyị tị́, ịgba ọgbagba mẹ ịnịịkila ba Ohe, ịlẹ kị du ká angịnyị me nyori Ohe nyị́ kpahị juhi ka bala o-ri Ohe nyị la ịmajẹ. Jẹ́ ẹlịlẹhị u-uhye nya ịnịịkịla ịta ịlịnyị.
a Nyọka yẹ abwọlẹ kahị bwu jẹ́ nyori ọnyang ọlẹ ká ụpwụ nya Ọwụrụụ-wụrụ wụrụ nya ịBabịlọn Ọtụka, nyị ku ọmwakpa nya ịgba ọgbagba nya ọnọọkịla, yẹ Ọdawụlẹ Ọlẹkpẹ 1.
