មេរៀនទី១៣
តើសាសនាមិនពិតធ្វើឲ្យមនុស្សយល់ខុសយ៉ាងណាអំពីព្រះ?
ប្រសិនបើព្រះជាសេចក្ដីស្រឡាញ់ ហេតុអ្វីសាសនាជាច្រើនដែលអះអាងថាជាតំណាងព្រះ ប្រព្រឹត្តអំពើអាក្រក់ច្រើនម្ល៉េះ? និយាយឲ្យស្រួលយល់ សាសនាទាំងនោះគឺជាសាសនាមិនពិត ពីព្រោះពួកគេធ្វើឲ្យមនុស្សយល់ខុសអំពីព្រះ។ តើពួកគេធ្វើឲ្យមនុស្សយល់ខុសអំពីព្រះយ៉ាងដូចម្ដេច? តើព្រះមានអារម្មណ៍យ៉ាងណាអំពីរឿងនេះ? ហើយតើលោកនឹងធ្វើអ្វី?
១. តើសេចក្ដីបង្រៀនរបស់សាសនាមិនពិតធ្វើឲ្យមនុស្សយល់ខុសអំពីព្រះយ៉ាងដូចម្ដេច?
សាសនាមិនពិតសម្រេចចិត្តជឿនិងបង្រៀនសេចក្ដីភូតភរជាជាងសេចក្ដីពិត។ (រ៉ូម ១:២៥) ជាឧទាហរណ៍ សាសនាភាគច្រើនមិនបានបង្រៀនសមាជិករបស់ពួកគេអំពីនាមរបស់ព្រះទេ។ ក៏ប៉ុន្តែ គម្ពីរប្រាប់ថាត្រូវប្រើនាមរបស់ព្រះ។ (រ៉ូម ១០:១៣, ១៤) ពេលមានរឿងអាក្រក់កើតឡើង អ្នកដឹកនាំសាសនាខ្លះនិយាយថា នេះជាបំណងប្រាថ្នារបស់ព្រះ។ ប៉ុន្តែ នោះជាពាក្យកុហកសុទ្ធសាធ។ ព្រះមិនមែនជាដើមហេតុនៃអំពើអាក្រក់ទេ។ (សូមអាន យ៉ាកុប ១:១៣) គួរឲ្យស្ដាយណាស់ សេចក្ដីបង្រៀនមិនពិតរបស់សាសនាធ្វើឲ្យមនុស្សពិបាកស្រឡាញ់ព្រះ។
២. តើការប្រព្រឹត្តរបស់សាសនាមិនពិតធ្វើឲ្យមនុស្សយល់ខុសអំពីព្រះយ៉ាងដូចម្ដេច?
សាសនាមិនពិតមិនបានប្រព្រឹត្តចំពោះមនុស្ស ដូចដែលព្រះយេហូវ៉ាប្រព្រឹត្តចំពោះមនុស្សឡើយ។ គម្ពីរចែងថា៖ «អំពើខុសឆ្គងរបស់ក្រុងនោះ[នេះសំដៅលើសាសនាមិនពិត]បានគរឡើងរហូតដល់ស្ថានសួគ៌»។ (ការបើកបង្ហាញ ១៨:៥) អស់រាប់រយឆ្នាំមកហើយ សាសនាគឺបានចូលប្រឡូកក្នុងរឿងនយោបាយ បានគាំទ្រសង្គ្រាម ហើយក៏ជាដើមហេតុដែលនាំឲ្យមនុស្សស្លាប់រាប់មិនអស់ ឬបានបង្ហាញថាយល់ស្របឲ្យមានរឿងនោះកើតឡើង។ អ្នកដឹកនាំសាសនាខ្លះតម្រូវឲ្យសមាជិកបង់ប្រាក់ឲ្យពួកគេ ដើម្បីពួកគេអាចមានជីវិតរស់នៅយ៉ាងសម្បូរសប្បាយ។ ការប្រព្រឹត្តរបស់ពួកគេបង្ហាញច្បាស់ថាពួកគេមិនស្គាល់ព្រះសោះ។ ដូច្នេះ ពួកគេគ្មានសិទ្ធិធ្វើជាតំណាងលោកឡើយ។—សូមអាន យ៉ូហានទី១ ៤:៨
៣. តើព្រះមានអារម្មណ៍យ៉ាងណាចំពោះសាសនាមិនពិត?
ប្រសិនបើទង្វើរបស់សាសនាមិនពិតធ្វើឲ្យអ្នកខឹង តើអ្នកគិតថាព្រះយេហូវ៉ាមានអារម្មណ៍យ៉ាងណាចំពោះសាសនាមិនពិត? លោកខឹងពួកអ្នកដឹកនាំសាសនាដែលធ្វើឲ្យមនុស្សយល់ខុសអំពីលោក ហើយលោកខឹងដែលពួកគេប្រព្រឹត្តមិនល្អចំពោះសមាជិករបស់ខ្លួន។ ហេតុអ្វីលោកខឹង? ដោយសារលោកស្រឡាញ់មនុស្ស។ លោកសន្យាថាសាសនាមិនពិតនឹងត្រូវបំផ្លាញចោល ហើយ‹គ្មានអ្នកណានឹងប្រទះឃើញសាសនាមិនពិតម្ដងទៀតទេ›។ (ការបើកបង្ហាញ ១៨:២១) មិនយូរទៀត ព្រះនឹងបំបាត់ចោលសាសនាមិនពិតទាំងអស់។—ការបើកបង្ហាញ ១៨:៨
បង្កើនចំណេះ
សូមរៀនថែមទៀតអំពីអារម្មណ៍របស់ព្រះចំពោះសាសនាមិនពិត និងអំពីអ្វីដែលសាសនាមិនពិតបានធ្វើ។ សូមរៀនដែរថា ទង្វើរបស់សាសនាមិនពិតមិនគួរជាមូលហេតុដែលរារាំងអ្នកមិនឲ្យរៀនអំពីព្រះយេហូវ៉ាទេ។
៤. តើព្រះពេញចិត្តនឹងការគោរពប្រណិប័តន៍ទាំងអស់ឬ?
មនុស្សជាច្រើនជឿថាសាសនាទាំងអស់ប្រៀបដូចជាផ្លូវផ្សេងៗ ដែលនាំមនុស្សឲ្យធ្វើអំពើល្អ។ ប៉ុន្តែ តើនេះជាការពិតទេ? សូមអាន ម៉ាថាយ ៧:១៣, ១៤ រួចពិភាក្សាសំណួរនេះ៖
-
តើគម្ពីរប្រាប់យ៉ាងណាអំពីផ្លូវដែលនាំទៅឯជីវិត?
លេងវីដេអូ រួចពិភាក្សាសំណួរដូចតទៅ៖
-
តើគម្ពីរប្រាប់ថាមានសាសនាជាច្រើនដែលព្រះពេញចិត្តឬ?
៥. សាសនាមិនពិតមិនបង្ហាញសេចក្ដីស្រឡាញ់ដូចព្រះទេ
សាសនាបានធ្វើឲ្យមនុស្សយល់ខុសតាមវិធីជាច្រើន។ វិធីដ៏លេចធ្លោមួយ គឺពួកគេចូលរួមក្នុងសង្គ្រាម។ ដើម្បីដឹង សូម លេងវីដេអូ រួចពិភាក្សាសំណួរដូចតទៅ៖
-
ក្នុងអំឡុងសង្គ្រាមលោកលើកទី២ តើវិហារជាច្រើនបានធ្វើអ្វី?
-
តើអ្នកមានអារម្មណ៍យ៉ាងណាចំពោះអ្វីដែលពួកគេបានធ្វើ?
សូមអាន យ៉ូហាន ១៣:៣៤, ៣៥ និង១៧:១៦ រួចពិភាក្សាសំណួរដូចតទៅ៖
-
តើព្រះយេហូវ៉ាមានអារម្មណ៍យ៉ាងណា ពេលសាសនាចូលប្រឡូកក្នុងសង្គ្រាម?
-
សាសនាជាដើមហេតុនៃអំពើអាក្រក់ជាច្រើន។ តើអ្នកបានឃើញសាសនាផ្សេងៗធ្វើអ្វីខ្លះ ដែលមិនបានបង្ហាញសេចក្ដីស្រឡាញ់ដូចព្រះ?
៦. ព្រះចង់ជួយមនុស្សឲ្យចេញពីសាសនាមិនពិត
សូមអាន ការបើកបង្ហាញ ១៨:៤ a រួចពិភាក្សាសំណួរនេះ៖
-
ពេលដឹងថាព្រះចង់ជួយមនុស្សម្នាក់ៗដែលត្រូវសាសនាមិនពិតបំភាន់ តើនេះធ្វើឲ្យអ្នកមានអារម្មណ៍យ៉ាងណា?
៧. សូមបន្តរៀនអំពីព្រះពិត
តើអ្នកគួរឲ្យសេចក្ដីបង្រៀននិងការប្រព្រឹត្តរបស់សាសនាមិនពិតមានឥទ្ធិពលលើទស្សនៈដែលអ្នកមានចំពោះព្រះឬទេ? សូមស្រមៃគិតអំពីកូនប្រុសម្នាក់ដែលមិនព្រមស្ដាប់បង្គាប់ឪពុក រួចចាកចេញពីផ្ទះ ហើយបានប្រព្រឹត្តអំពើអាក្រក់ជាច្រើន។ អ្វីដែលកូននោះធ្វើនាំឲ្យឪពុកពិបាកចិត្តណាស់។ តើសមហេតុសមផលទេដែលទម្លាក់កំហុសទៅលើឪពុកចំពោះអំពើអាក្រក់ដែលកូនធ្វើ? ហេតុអ្វី?
-
តើសមហេតុសមផលឬទេ ដែលទម្លាក់កំហុសទៅលើព្រះយេហូវ៉ា ហើយឈប់រៀនអំពីលោក ដោយសារតែការប្រព្រឹត្តរបស់សាសនាមិនពិត?
មនុស្សខ្លះនិយាយថា៖ «ខ្ញុំមិនចង់ដឹងអំពីព្រះទេ ព្រោះសាសនានាំឲ្យមានបញ្ហាច្រើនណាស់»។
-
តើអ្នកមានអារម្មណ៍ដូច្នេះទេ?
-
ហេតុអ្វីយើងមិនគួរឲ្យការប្រព្រឹត្តរបស់សាសនាមិនពិត មានឥទ្ធិពលមកលើទស្សនៈដែលយើងមានចំពោះព្រះយេហូវ៉ា?
សេចក្ដីសង្ខេប
សាសនាមិនពិតបានធ្វើឲ្យមនុស្សយល់ខុសអំពីព្រះតាមរយៈសេចក្ដីបង្រៀននិងការប្រព្រឹត្តអាក្រក់របស់ពួកគេ។ ព្រះនឹងបំផ្លាញចោលសាសនាមិនពិត។
រៀនសាឡើងវិញ
-
តើអ្នកមានអារម្មណ៍យ៉ាងណាចំពោះសេចក្ដីបង្រៀននិងការប្រព្រឹត្តអាក្រក់របស់សាសនាមិនពិត?
-
តើព្រះយេហូវ៉ាមានអារម្មណ៍យ៉ាងណាចំពោះសាសនាមិនពិត?
-
តើព្រះនឹងធ្វើអ្វីចំពោះសាសនាមិនពិត?
ស្វែងយល់ថែមទៀត
សូមរៀនអំពីមូលហេតុពីរយ៉ាងដែលសាសនាភាគច្រើនធ្វើឲ្យព្រះមិនពេញចិត្ត។
«តើសាសនាទាំងអស់គឺដូចគ្នា ហើយនាំឲ្យស្គាល់ព្រះឬទេ?» (អត្ថបទក្នុងគេហទំព័រ)
ហេតុអ្វីព្រះយេហូវ៉ាចង់ឲ្យយើងគោរពប្រណិប័តន៍លោកជាមួយនឹងអ្នកឯទៀត?
បូជាចារ្យម្នាក់បានទើសចិត្តនឹងសាសនារបស់គាត់។ ប៉ុន្តែ នេះមិនបានធ្វើឲ្យគាត់ឈប់ស្វែងរកសេចក្ដីពិតអំពីព្រះទេ។
អស់រាប់រយឆ្នាំមកហើយ សាសនាបាននិយាយកុហកច្រើនអំពីព្រះ។ នេះធ្វើឲ្យមនុស្សជឿថាលោកមិនយកចិត្តទុកដាក់ចំពោះពួកគេទេ ព្រមទាំងជឿថាលោកជាព្រះដ៏ឃោរឃៅទៀតផង។ សូមរៀនអំពីពាក្យកុហកបីយ៉ាង និងមូលហេតុដែលពាក្យទាំងនោះមិនមែនជាការពិត។
a សៀវភៅការបើកបង្ហាញពណ៌នាសាសនាមិនពិតថាជាស្ត្រីដែលមានឈ្មោះបាប៊ីឡូនដ៏ខ្លាំងក្លា។ ដើម្បីស្វែងយល់អំពីមូលហេតុដែលពណ៌នាដូច្នេះ សូមមើលកំណត់នៅចុងសៀវភៅ លេខ១។