TUTO 13
Bulapeli Bwa Buhata Habukuteki Mulimu
Haiba kuli Mulimu ki lilato, ki kabakalañi batu baba mwa bulapeli bobushutana-shutana ili babaipapata kuli balapela Mulimu, habazwelapili kueza lika zemaswe? Libaka ki la kuli bulapeli bobali ku bona ki bwa buhata mi habukuteki Mulimu. Ki lika mañi zebaezize zebonisa kuli habakuteki Mulimu? Mulimu uikutwa cwañi ka za taba yeo? Mi ki lika mañi zakaeza kwa bulapeli bwa buhata?
1. Bulapeli bwa buhata bubonisa cwañi kuli habukuteki Mulimu ka lituto zebuluta?
Bulapeli bwa buhata ‘buhanile niti ya Mulimu ni kuamuhela buhata.’ (Maroma 1:25) Ka mutala, bulapeli bobuñata habuluti batu libizo la Mulimu. Kono Bibele ibulela kuli batu baswanela kuitusisa libizo la Mulimu. (Maroma 10:13, 14) Baeteleli ba bulapeli babañwi baluta kuli hakuezahala nto yeñwi yemaswe, ki tato ya Mulimu. Kono taba yeo ki ya buhata. Mulimu haki yena yatahisanga lika zemaswe. (Mubale Jakobo 1:13.) Ka bumai, lituto zebulutanga bulapeli bwa buhata litahisize kuli batu basike baba ni silikani sesinde ni Mulimu.
2. Bulapeli bwa buhata bubonisa cwañi kuli habukuteki Mulimu ka lika zebueza?
Bulapeli bwa buhata habukuteki batu sina mwabakutekela Jehova. Bibele ibulela kuli libi za bulapeli bwa buhata “likolohani kuyo fita kwa lihalimu.” (Sinulo 18:5) Ka lilimo zeñata, bulapeli bobushutana-shutana buikenyize mwa litaba za naha, buyemezi lindwa, ni kutahisa kamba kulumeleza kuli batu babañata babulaiwe. Baeteleli ba bulapeli babañwi bapila bupilo bwa simbombo mi bahapelezanga batu baba mwa bulapeli bwabona kuli babalife masheleñi. Lika zeo kaufela libonisa kuli baeteleli ba bulapeli bwa buhata habazibi Mulimu mi haba mukuteki.—Mubale 1 Joani 4:8.
3. Mulimu uikutwa cwañi ka za bulapeli bwa buhata?
Haiba hamutabiswi ki zebusweli kueza bulapeli bwa buhata, munahana kuli Jehova yena uikutwa cwañi ka za bulapeli bwa buhata? Jehova walata batu, kono utoile baeteleli ba bulapeli babasa mukuteki ili babanyandisa batu babañwi. Mane usepisa kuli ukafelisa bulapeli bwa buhata mi ‘habusana kufumanwa hape.’ (Sinulo 18:21) Honacwale-cwale fa, Mulimu ukafelisa bulapeli kaufela bwa buhata.—Sinulo 18:8.
MUBATISISE
Munyakisise litaba zeñwi zebonisa mwaikutwela Mulimu ka za bulapeli bwa buhata. Mubone lika zeñwi zebuezize bulapeli bwa buhata, kono hape litaba zeo lisike zamipalelwisa kuzwelapili kuituta ka za Jehova.
4. Haki bulapeli kaufela bwatabela Mulimu
Batu babañata balumela kuli batu baba mwa bulapeli bobushutana-shutana kaufela bona balapela Mulimu alimuñwi. Kono kana taba yeo ki ya niti? Mubale Mateu 7:13, 14, mi kihona mukanyakisisa puzo yelatelela:
-
Ki lika mañi zeibulela Bibele zekona kutusa batu kufumana bupilo bobusa feli?
Mubuhe VIDIO, mi kihona mukanyakisisa puzo yelatelela.
-
Kana Bibele ibulela kuli bulapeli bobuñata bwatabisa Mulimu?
5. Bulapeli bwa buhata habubonisi lilato sina Mulimu
Bulapeli bobushutana-shutana buzwezipili kusa kuteka Mulimu mwa linzila zeñata. Nzila yeñwi yetuna yebuezize cwalo ki ka kuikenya mwa lindwa. Kuli mukone kuiponela taba yeo, mubuhe VIDIO. Mi kihona mukanyakisisa lipuzo zelatelela.
-
Ki lika mañi zene liezize likeleke zeñwi ka nako ya Ndwa ya Lifasi Yabubeli?
-
Muikutwa cwañi ka za lika zene liezize likeleke zeo?
Mubale Joani 13:34, 35 ni 17:16. Mi kihona mukanyakisisa lipuzo zelatelela:
-
Munahana kuli Jehova uikutwa cwañi habona likeleke zeñwi inze liikenya mwa lindwa?
-
Bulapeli bwa buhata ni bona busweli kutahisa kuli lika zemaswe lizwelepili kuezahala. Ki lika mañi zemulemuhile ili zebonisa kuli bulapeli bwa buhata bupalezwi kubonisa lilato la Mulimu?
Bulapeli bwa buhata habubonisi lilato sina Mulimu
6. Mulimu ubata kuli batu bazwe mwa bulapeli bwa buhata
Mubale Sinulo 18:4, a mi kihona mukanyakisisa lipuzo zelatelela:
-
Muikutwa cwañi kuziba kuli Mulimu ubata kutusa batu babapumilwe ki bulapeli bwa buhata?
7. Muzwelepili kuituta ka za Mulimu wa niti
Kana mwaswanela kucinca mubonelo wamina ka za Mulimu bakeñisa lika zemaswe zebaeza ba bulapeli bwa buhata? Muunge kuli mwana uhana likelezo zende zeba mufa bo ndatahe. Mwana yo wazwa fa lapa mi ukala kupila bupilo bobumaswe. Bo ndatahe habatabiswi ki zasweli kueza mwanaa bona. Ki kabakalañi hakusika luka kunyaza bo ndatahe mwana yo kabakala mupilelo omaswe wa mwanaa bona?
-
Kana kulukile kunyaza Jehova ni kutuhela kuituta ka za hae kabakala lika zemaswe zebasweli kueza ba bulapeli bwa buhata?
BABAÑWI BABULELANGA KULI: “Hanitabeli kuituta za Mulimu kakuli bulapeli ki bona bobusweli kutahisa lika zemaswe hahulu.”
-
Kana kona momuikutwela ni mina cwalo?
-
Ki kabakalañi halusa swaneli kutuhela kuituta za Jehova kabakala lika zemaswe zebasweli kueza ba bulapeli bwa buhata?
LITABA KA BUKUSWANI
Bulapeli bwa buhata bubonisize kuli habukuteki Mulimu ka lituto zebuluta ni likezo zabona. Mulimu ukafelisa bulapeli bwa buhata.
Mulundulule
-
Muikutwa cwañi ka za lituto zebuluta bulapeli bwa buhata ni likezo zabona?
-
Jehova uikutwa cwañi ka za bulapeli bwa buhata?
-
Ki lika mañi zakaeza Mulimu kwa bulapeli bwa buhata?
MUBONE LITABA ZEÑWI
Mubatisise lika zepeli zebuezanga bulapeli bobuñata ili zesatabisi Mulimu.
“Kana Bulapeli Kaufela Bwaswana? Kana Kaufelaa Bona Bwatabisa Mulimu?” (Taba ya fa webusaiti)
Ki kabakalañi Jehova habata kuli lukopanange ni babañwi kumulapela?
“Kana Mutu Watokwa Kuswalisana ni Sikwata Sesiñwi sa Bulapeli?” (Taba ya fa webusaiti)
Muprisita yomuñwi naasatabiswi ki zeneezahala mwa bulapeli bwanaali ku bona. Nihakulicwalo, taba yeo neisika mupalelwisa kuituta niti ka za Mulimu.
“Libaka Muprisita Yomuñwi Hanaazwile Mwa Bulapeli Bwahae” (Muzuhe!, February 2015)
Ka lilimo zeñata, bulapeli bobushutana-shutana bulutile lituto za buhata zetahisa kuli batu banahane kuli Mulimu unani lunya mi haana taba ni batu. Halunyakisiseñi litaba zetaalu zebonisa kuli lituto zeo haki za niti.
a Kuli muzibe libaka musali yabizwa Babilona Yomutuna yabulezwi mwa buka ya Sinulo, hatalusizwe kuli uyemela bulapeli bwa buhata, mubone Litaluso za Kwa Mafelelezo 1.
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
