PƐ MƐDÃPIA 13
Zi Gbini Wala Lɛɛ Kɔ Nɛzɛ Aa Nɛ Kɛa Wala Tɔ Yia
Ye mɔu Wala lɛ lɔkɛamɔ kaa, mɛ e kɛ lɛ gbini Wala lɛɛ kɔ bunuzɛ aa wɔ̃ yɔɔ-yɔɔ kɛa Wala tɔ yi? Oo zɔ̃ɔ kelɛ o gbini Wala lɛɛ kɔ nɛzɛ ka; oo a kɛ mia waa nɛ-wɔ̃ lɛ o gee ɛ̃ɛ̃ waa kɛ Wala tɔ yia gɛ̃ wana ka. Zi kpɛɛ lɛ waa nɛ kɛa Wala tɔ yi? Zi kpɛɛ lɛ Wala e e yɛlɛtaa ka e gbɛ̃a mɔ? Ɛɛ̃ mɛɛ wɔ̃ lɛ e loa kɛɛ e gbɛ̃a mɔ?
1. Zi kpɛɛ lɛ gbini Wala lɛɛ kɔ nɛzɛɛ aa nɛ kɛa Wala tɔ yi la pɛzɔ̃ɔkɔ nia ka?
Gbini Wala lɛɛ kɔ nɛzɛ yimia “oo kã wɔ̃ wanazɛ lɛ a gbɛ̃ɛ̃ lɛ Wala mɔɔ lɛɛ, to waa wɔ̃ nɛzɛ si wana” ka. (Woloma 1:25) A gɔ̃a gɛ̃, gbini Wala lɛɛ kɔ bunuzɛ lɛɛ́ Wala tɔ zɔ̃ɔ la mia ni lɛɛ. E kɛ bɛ̃ɛ̃ kilia, Baabo laa gee laa mɔ ko Wala tɔ gee. (Woloma 10:13, 14) Ye wɔ̃ yɔɔ ni aa kɛɛ, walaka liesimia do oo gee Wala kɛwɔ̃ lɛ. Kɛɛ lɛ nɛ ka lɛ o kɛɛ. Ye wa Wala ka kɛɛ a kɛ wɔ̃ yɔɔ aa kɛ. (Zĩĩ 1:13 gee.) A yeĩ zɛɛ lɛ e kelɛ, nɛ-wɔ̃ ni lɛ o geea aa kɛ gaga kɛ mia o lɔkɛ Wala ka.
2. Zi kpɛɛ lɛ Gbini Wala lɛɛ kɔ nɛzɛ e nɛ kɛa Wala tɔ yi e kɛwɔ̃ ka?
Gbini Wala lɛɛ kɔ nɛzɛ lɛɛ́ mia gɛ̃ lɛ zi Zihova e mia gɛ̃aa kaa. Baaboa laa gee kelɛ gbini Wala lɛɛ kɔ nɛzɛ “zi kɛwɔ̃ yɔɔ a kɛɛ a tunu aa dɔ, aa lo aa gbɛ̃ lɛi mɔ.” (Wɛlɛvelesɔ̃ 18:5) Kɛɛ wũ bunuzɛ lɛ aa diea piea, gbini Wala lɛɛ kɔ bunuzɛ aa e kɔ da sɛlɛ lie si wɔ̃ wa gele wɔ̃ ba, ɛ̃ɛ̃ waa kɛ mia gbaala gbuozɛ waa ga. Walaka liesimia do oo naa o kɛ kpanazɛ, a mɔɔ wɔ̃ mɔɔ, oo pɛlee ɓo wa mia ni mɔ teele. O kɛwɔ̃ nia laa zɔ̃ɔ kelɛ oó Wala dɔ, ɛ̃ɛ̃ ye wá a mɔ bɛ̃ɛ̃ o kɛ dɔa le la mia ka.—1 Zɔ̃ɔ̃ 4:8 gee.
3. Zi kpɛɛ lɛ Wala ee yɛlɛtaa ka e gbɛ̃a gbini Wala lɛɛ kɔ nɛzɛɛ mɔ?
Ye wɔ̃ ni lɛ gbini Wala lɛɛ kɔ nɛzɛ a kɛɛ e i wàa, kɛɛ zi kpɛɛ lɛ Zihova ee yɛlɛtaa ka? Laa lɔkɛ mia ka, kɛɛ wɔ̃ lɛɛ a wàa walaka liesimia lɛ o nɛ kɛ a tɔ yi ɛ̃ɛ̃ waa yii yɔɔ ɓo wa mia ni kaa pie. A gee kelɛ gbini Wala lɛɛ kɔ nɛzɛɛ yi lɛɛ lo sie ɛ̃ɛ̃ “oó lo a gɛ̃ɛ gbɛɛ ɓoo gbaa.” (Wɛlɛvelesɔ̃ 18:21) Luo wá gbaa gbeĩ kɛ Wala e gbini a lɛɛ kɔ nɛzɛɛ seĩ ɓo tãã.—Wɛlɛvelesɔ̃ 18:8.
A PIE FOO
Zi lɛ Zihova e e yɛlɛtaa ka e gbɛ̃a gbini Wala lɛɛ kɔ nɛzɛ mɔɔ bunuzɛ gɛ̃. I wɔ̃ ku gbuozɛ lɛ aa kɛɛ, wa pɛ e kɛ lɛ ye waa mɔ i tea Zihova dɔɔ mɔɔ mɛdã.
4. Wala lɛɛ́ e kɔya gbini a lɛɛ kɔ seĩ wi
Mia bunuzɛ oo gɛ̃ kelɛ gbini Wala lɛɛ kɔ nia lɛ kelɛ zi gbɛɛ gbɛɛ lɛ a seĩ e lo Wala piea lɛ ɓe. Kea lɛ wana ka? Ko Mafiu 7:13, 14 gee, ɛ̃ɛ̃ kɛ ko wɛĩlɔɔ e kea yiɓo:
-
Zi kpɛɛ lɛ Baaboa e zi lɛ e lo lɛ lɛ kɛɓe wɔlɔwɔlɔ lɛ yia mɔɔ kelekele a ka?
Ko VILOA gɛ̃, ɛ̃ɛ̃ kɛ ko wɛĩlɔɔ e to a piea yiɓo.
-
Kea Baaboa laa gee kelɛ gbini Wala lɛɛ kɔ ku gbuozɛ lɛ ɓe, lɛ o Wala zodaa?
5. Gbini Wala lɛɛ kɔ nɛzɛ lɛɛ́ Wala zi lɔkɛamɔ zɔ̃ɔ
Gbini Wala lɛɛ kɔ bunuzɛ aa nɛ kɛ Wala tɔ yi zi gbɛɛ gbɛɛ ka. A yɔɔ kpokpoa lɛ e kelɛ, o kɔ lɛ gele wɔ̃ ba. Kɛ ko gɔ̃a doo gɛ̃ɛ, ko VILOA gɛ̃, kɛ ko wɛĩlɔɔ ni lɛ o to a piea yiɓo.
-
Mɛɛ wɔ̃ lɛ walakɛi mia bunuzɛ wa kɛ Gele II (tokomɔzɛ) lɛ wa gɔ̃ Kpoula Lɛ Seĩ mɔɔ luo ka?
-
Zi kpɛɛ lɛ ii yɛlɛtaa ka e gbɛ̃a zi lɛ o dɔlɔ e kɛa kaa mɔ?
Ko Zɔ̃ɔ̃ 13:34, 35 wa 17:16 gee, kɛ ko wɛĩlɔɔ ni o kea yiɓo:
-
Zi kpɛɛ lɛ Zihova ee yɛlɛtaa ka ye Wala mia waa o kɔ da gele baa ka?
-
Koo gbini Wala lɛɛ kɔ nɛzɛ gãkũ wɔ̃ yɔɔ ni lɛ o kɛɛ wɛĩ. Ɓaa lɛ gɛ̃ɛ, zi kpɛɛ lɛ gbini Wala lɛɛ kɔ nia waa kɔ̃ a ka Wala zi lɔkɛamɔɔ zɔ̃ɔ mɔ?
Gbini Wala lɛɛ kɔ nɛzɛɛ lɛɛ́ Wala zi lɔkɛamɔɔ zɔ̃ɔ
6. Wala laa naa e gbũ mia mɔ o go gbini Wala lɛɛ kɔ nɛzɛ ba
Ko Wɛlɛvelesɔ̃ 18:4 a gee, ɛ̃ɛ̃ kɛ ko wɛĩlɔɔ e kea yiɓo:
-
Zi kpɛɛ lɛ ii yɛlɛtaa ka, ye ɓaa yidɔ kelɛ Wala laa naa e gbũ mia mɔ kɛ o go gbini Wala lɛɛ kɔ nɛzɛ baa ka?
7. Kɛ pɛ mɛdãpia e gbɛ̃a Wala wana zɛɛ mɔ teele
Kea wɔ̃ yɔɔ ni lɛ gbini Wala lɛɛ kɔ nɛzɛ a gee ɛ̃ɛ̃ aa kɛɛ, laa mɔ a pie e to ko mɔ? Gɔ̃ nɛfu lɛ lɛɛ́ gbaa e too dɔ liewe kpeĩ lɛ a daa a dɔ a lɛɛ mɔɔ, i yɛlɛtaa a ka. E gbɛ̃ pɛlɛ zeĩ, aa kɛɓe lɛ ye wa kpeĩa kɛ. A daa lɛɛ́ gbaa wee a mɔ a gbe a kɛ kili. Mɛ e kɛ lɛ lɛɛ́ lo kɛɛ sɛ o a daa gãkũ yii lɛ a gbe a ɓoa wɛĩ?
-
Lɛɛ lo kɛɛ sɛ ko Zihova gãkũ, ɛ̃ɛ̃ ko tea a dɔɔ mɔ wɔ̃ lɛ gbini Wala lɛɛ kɔ nɛzɛ yimia o kɛɛ wɛĩ?
MIA DO OO GEE: “M le wá Wala wɔ̃ yi, ɓii gbini Wala lɛɛ kɔ lɛ a kɛ lɛ mia o wàa ɓele kpoula zeea.”
-
Ii i yɛlɛtaa kili?
-
Mɛ e kɛ lɛ ye waa mɔ gbini Wala lɛɛ kɔ nɛzɛ zi wɔ̃kɛkɔ nia pie e to zi lɛ ko Zihova gɛ̃aa mɔ?
WƆ̃Ɔ WŨ
Gbini Wala lɛɛ kɔ nɛzɛ aa nɛ kɛ Wala tɔ yi a zi pɛzɔ̃ɔkɔ nɛzɛ wa wɔ̃ yɔɔ-yɔɔ ni lɛ a kɛɛ ka. Wala lɛɛ lo gbini a lɛɛ kɔ nɛzɛɛ ɓoo tãã.
Zovuo Wɔ̃
-
Pɛ lɛ gbini Wala lɛɛ kɔ nɛzɛ aa zɔ̃ɔ, ɛ̃ɛ̃ zi lɛ aa wɔ̃ kɛ a kaa, zi kpɛɛ lɛ ɓa gɛ̃a ka?
-
Zi kpɛɛ lɛ Zihova ee yɛlɛtaa ka e gbɛ̃a gbini Wala lɛɛ kɔ nɛzɛ mɔ?
-
Mɛ Zihova e loa kɛɛ gbini Wala lɛɛ kɔ nɛzɛ ka?
I NYIƐ KPƆ
Zi peelɛ lɛ gbini Wala lɛɛ kɔ bunuzɛ aa wɔ̃ kɛa, lɛ lɛɛ́ Wala zodaa gɛ̃.
“Kea Gbini Wala Lɛɛ Kɔ Seĩ Lɛ Doo? Kea O Seĩ Oo To Wala Pie?” (Lɛ jw.org la)
Mɛ e kɛ lɛ Zihova a naa ko da mia ye o toa ba ko gbini a doo lɛɛ?
“Kea Lɛ Nɔ A Mɔ Mia O Kɛ Gbini Wala Lɛɛ Kɔ Do Ba?” (Lɛ jw.org la)
Salaɓo Wala lɛɛ mi doo zi gbini Wala lɛɛ kɔɔ a kɛ a zo e da zizaa. Kɛɛ wɔ̃ e kea lɛɛ́ gbaa a tea, e lo e lie wana wɔ̃ɔ mɛdãa ka e gbɛ̃a Wala mɔ.
“Mɛ E Kɛ Lɛ Salaɓo Wala Lɛɛ Mi Doo E Wɛlɛ E Pie Walakɛi” (Ya Nyiɛ!, Vuulie 2015)
Gbini Wala lɛɛ kɔ bunuzɛ aa gbɛ̃ mɔ nɛ kɛɛ ka Wala tɔ yi, aa kɛ mia waa gɛ̃ kelɛ Wala lɛɛ́ kpaa o wɛĩ ɛ̃ɛ̃ a nyaa lɛ yɔɔ. Wana wɔ̃ mɛdã e gbɛ̃a nɛ-wɔ̃ ni o kilia yaaka mɔ.
“Nɛ-wɔ̃ Lɛ A Zɔ̃ɔ Kelɛ Wala Wá Lɔkɛamɔ Zɛɛ” (Wɔ̃lagɛ̃kamaa, Wiipieto 1, 2013)
a Kɛ ko yidɔ kelɛ lee lɛ Wɛlɛvelesɔ̃ kii a si Babɛlɔu Sɛlɛ Gbuoa, lɛ e gbini Wala lɛɛ kɔ nɛzɛ kaa, ko a Lienyɛpia 1 gɛ̃.
