Ge e ba ka nnete Modimo e le lerato, ke ka baka la’ng dikereke tše dintši tšeo di ipotšago gore di a mo rapela, di be di dutše di dira dilo tše dintši tše mpe? Lebaka ke gore dikereke tšeo ke tša maaka ka gore di senya Modimo leina. Di dirile seo bjang? Modimo yena o ikwa bjang ka seo? Na o tla no tlogela dikereke tšeo di mo senya leina?

1. Dilo tšeo baruti ba di rutago di senya leina la Modimo bjang?

Baruti ba dikereke ba kgethile go dumela maaka le go a ruta batho, go e na le gore ba ba rute therešo ka Modimo. (Baroma 1:​25) Ka mohlala, baruti ba bantši ga se ba ruta batho bao ba tsenago dikereke tša bona leina la Modimo, mola Beibele e re leina la Modimo le swanetše go dirišwa. (Baroma 10:​13, 14) Baruti ba bangwe ge ba bona dilo tše mpe di direga, ba re ke thato ya Modimo, eupša ao ke maaka a matala. Modimo ga sa nka a dira gore batho ba welwe ke dilo tše mpe. (Bala Jakobo 1:​13.) Sa go nyamiša ke gore maaka ao baruti bao ba a rutago, a dirile gore batho ba hloye Modimo.

2. Dilo tšeo baruti ba di dirago di bontšha bjang gore ba senya Modimo leina?

Baruti ba dikereke ga ba sware batho ka tsela yeo Jehofa a nyakago ba swarwa ka yona. Beibele e re “dibe tša [dikereke] di kgobelane go fihla legodimong.” (Kutollo 18:5) Ke go tloga kgale baruti ba dikereke ba tsenatsena dipolotiking, ba thekga dintwa, le go dira gore batho ba bantši kudu ba bolawe. Baruti ba bantši ba rata dilo tša maemo a godimo kudu, e bile ba nyaka gore batho bao ba tsenago dikereke tša bona e be bona ba ba patelelago dilo tšeo. Dilo tše di bontšha gabotse gore baruti ba ga ba tsebe Jehofa Modimo, e bile ga ba swanelege go botša batho ka yena.​—Bala 1 Johane 4:8.

3. Modimo o ikwa bjang ka dikereke?

Ge e ba dilo tšeo di dirwago ke baruti di go kwatiša, o nagana gore Modimo yena o ikwa bjang ka tšona? Modimo o rata batho, o no ba a kwatišwa ke baruti bao ba mo senyago leina, le go swara batho bao ba tsenago dikereke tša bona gampe. O tshepiša gore o tla fediša bodumedi bja maaka gomme bja se sa ba gona. (Kutollo 18:​21) E se kgale, Modimo o tlo fediša dikereke ka moka tša maaka.​—Kutollo 18:8.

 ITHUTE KA MO GO TSENELETŠEGO

4. Modimo ga a amogele dikereke ka moka

Batho ba bantši ba dumela gore dikereke di swana le ditsela tša go fapafapana, tšeo ka moka ga tšona di re išago go Modimo. Na seo ke nnete? Balang Mateo 7:​13, 14, gomme le boledišaneng ka potšišo e latelago:

• Beibele e hlalosa bjang tsela yeo e išago bophelong?

Bapalang BIDIO ye, gomme le boledišaneng ka potšišo e latelago:

• Na Beibele e re go na le dikereke tše dintši tšeo Modimo a di amogelago?

 6. Modimo o nyaka go thuša batho gore ba tšwe dikerekeng tšeo di ba rutago maaka

Balang Kutollo 18:​4, a gomme le boledišaneng ka potšišo e latelago:

• Ka ge lengwalo le le bontšha gore Modimo o nyaka go thuša batho gore ba tšwe dikerekeng tšeo ba rutwago maaka, seo se dira gore o ikwe bjang?

7. Tšwela pele o ithuta ka Modimo wa therešo

Na dilo tšeo baruti ba di rutago dikerekeng le tšeo ba di dirago, di swanetše go go dira gore o se rate Modimo? Ka mohlala, a re re morwa šo o gana go kwa tatagwe. O tloga ka gae gomme a yo dira dilo tša go tšwa tseleng. Tate yoo ga a kgahlwe ke dilo tše morwa yo a di dirago. Na re tla be re dira gabotse ge re bea tate yo molato, ka baka la dilo tše mpe tšeo morwa wa gagwe a di dirilego?

• Ka mo go swanago, na re tla be re dira gabotse ge re bea Jehofa molato le go tlogela go ithuta ka yena ka baka la dilo tše mpe tšeo di dirwago ke dikereke?

 O ITHUTILE ENG?

Baruti ba sentše Modimo leina ka baka la dithuto tša maaka tšeo ba di rutago dikerekeng le dilo tše mpe tšeo ba di dirago. Le gona Modimo o tla fediša dikereke ka moka.

Dipotšišo

• Ke go tloga kgale baruti ba ruta maaka le go di dira dilo tše mpe. Wena o ikwa bjang ka seo?

• Modimo o ikwa bjang ka dikereke?

• Modimo o tla dira’ng ka dikereke?