ƐZUKOALƐDEƐ 13
Adalɛ Ɛzonlenlɛ Ka Nyamenle Anwo Adalɛ Edwɛkɛ
Saa Nyamenle le ɛlɔlɛ a, ɛnee duzu ati a ɛzonlenlɛ ngakyile mɔɔ bɛkile kɛ bɛlɛsonle ye la yɛ ninyɛndane dɔɔnwo a? Nɔhalɛ nu, ɛzonlenlɛ ɛhye mɔ le adalɛ; bɛnga Nyamenle anwo nɔhalɛ edwɛkɛ. Duzu a kile kɛ bɛnga ɔ nwo nɔhalɛ edwɛkɛ a? Kɛzi ɔte nganeɛ wɔ nwolɛ ɛ? Na duzu a ɔbayɛ ye wɔ nwo a?
1. Kɛzi adalɛ ɛzonlenlɛ kilehile Nyamenle anwo adalɛ edwɛkɛ ɛ?
Adalɛ ɛzonlenlɛ ‘ɛhakyi Nyamenle anwo nɔhalɛ ne ɛyɛ ye adalɛ.’ (Wulomuma 1:25) Kɛ neazo la, ɛzonlenlɛ dɔɔnwo ɛngilehile bɛ menli ne Nyamenle duma ne. Noko Baebolo ne ka kɛ ɔwɔ kɛ yɛfa Nyamenle duma yɛfɛlɛ ye. (Wulomuma 10:13, 14) Ɛzonlenlɛ nu mgbanyima bie mɔ ka kɛ Nyamenle a maa ninyɛndane sisi a. Noko ɛhye le adalɛ. Tɛ Nyamenle a maa ninyɛndane sisi a. (Kenga Gyemise 1:13.) Ɔyɛ alɔbɔlɛ kɛ adalɛ ɛhye mɔ ɛmaa menli ɛhwe bɛ nwo ɛvi Nyamenle anwo la.
2. Kɛzi adalɛ ɛzonlenlɛ nyɛleɛ ɛmmaa bɛnnwu Nyamenle anwo nɔhalɛ ne ɛ?
Adalɛ ɛzonlenlɛ nee menli ɛnli ye kɛ mɔɔ Gyihova yɛ ye la. Baebolo ne ka kɛ adalɛ ɛzonlenlɛ “ɛtane ne anloa ɛboɔboa ɛhɔdwu anwuma.” (Yekile 18:5) Wɔ ɛvolɛ ɛya dɔɔnwo anu, ɛzonlenlɛ ngakyile ɛva bɛ nwo ɛwulowula maanyɛlɛ nee konle nu yɛɛ bɛhu anzɛɛ bɛlie bɛdo nu bɛmaa bɛhu menli dɔɔnwo. Ɛzonlenlɛ nu mgbanyima bie mɔ mɔɔ kulo ninyɛne mgbole wɔ bɛ ɛbɛlabɔlɛ nu la maa bɛ menli ne tua nwolɛ kakɛ. Nyɛleɛ ɛhye mɔ bɔbɔ kile kɛ bɛnze Nyamenle, ɔti bɛngola bɛnga kɛ bɛlɛsonle ye.—Kenga 1 Dwɔn 4:8.
3. Kɛzi Nyamenle bu adalɛ ɛzonlenlɛ ɛ?
Saa ninyɛne mɔɔ adalɛ ɛzonlenlɛ yɛ la ka wɔ ɛya a, ɛnee ɛnea a kɛzi Gyihova bu ye ɛ? Gyihova kulo menli, noko yeva ɛzonlenlɛ nu mgbanyima mɔɔ bɛnga ɔ nwo nɔhalɛ edwɛkɛ na bɛkile bɛ menli ne nyane la anwo ɛya. Yebɔ ɛwɔkɛ kɛ ɔbazɛkye adalɛ ɛzonlenlɛ na “bɛnrɛnwu ye bieko.” (Yekile 18:21) Ɔnrɛhyɛ, Nyamenle bazɛkye adalɛ ɛzonlenlɛ kɔsɔɔti.—Yekile 18:8.
SUKOA DƆƆNWO
Sukoa kɛzi Nyamenle bu adalɛ ɛzonlenlɛ la anwo ninyɛne dɔɔnwo. Sukoa ninyɛne mɔɔ adalɛ ɛzonlenlɛ ɛyɛ la, na nea deɛmɔti ɔnle kɛ ɛhye maa ɛgyakyi kɛ ɛbazukoa Gyihova anwo debie la.
4. Nyamenle ɛnlie ɛzonlenlɛ kɔsɔɔti ɛndo nu
Menli dɔɔnwo die di kɛ ɛzonlenlɛ ngakyile le kɛ adenle ngakyile mɔɔ bɛdua zo bɛsonle Nyamenle la. Noko asoo ɛhye le nɔhalɛ? Kenga Mateyu 7:13, 14, na akee bɛzuzu kpuya ɛhye anwo:
-
Kɛzi Baebolo ne ka adenle ne mɔɔ kɔ ngoane nu la anwo edwɛkɛ ɛ?
Ye VIDIO ne, na akee bɛzuzu kpuya ɛhye anwo.
-
Asoo Baebolo ne ka kɛ ɛzonlenlɛ ngakyile mɔɔ wɔ ɛkɛ la yɛ mɔɔ sɔ Nyamenle anye la ɔ?
5. Adalɛ ɛzonlenlɛ ɛmmaa bɛnnwu Nyamenle ɛlɔlɛ ne
Ɛzonlenlɛ ngakyile ɛlua ndenle dɔɔnwo azo ɛhile kɛ bɛnla Nyamenle ɛlɔlɛ ne ali. Ko mɔɔ ɛnle kpalɛ fee la a le bɛ nwo mɔɔ bɛfa bɛwulowula konle nu la. Amaa wɔanwu nwolɛ neazo ko la, ye VIDIO ne. Akee bɛzuzu kpuya ɛhye mɔ anwo.
-
Duzu a asɔne dɔɔnwo yɛle ye wɔ Ewiade Konle II la anu a?
-
Kɛzi ɛnwu mɔɔ bɛyɛle la ɛ?
Kenga Dwɔn 13:34, 35 yɛɛ 17:16. Akee bɛzuzu kpuya ɛhye mɔ anwo:
-
Ɛnea a kɛzi Gyihova bu ɛzonlenlɛ ngakyile mɔɔ bɛfa bɛ nwo bɛwulowula konle nu la ɛ?
-
Adalɛ ɛzonlenlɛ di ninyɛndane dɔɔnwo anwo ɛzonle. Ndenle boni mɔ azo a wɔnwu kɛ ɛzonlenlɛ ngakyile anla Nyamenle ɛlɔlɛ ne ali a?
Adalɛ ɛzonlenlɛ ɛmmaa bɛnnwu Nyamenle ɛlɔlɛ ne
6. Nyamenle kulo kɛ menli fi adalɛ ɛzonlenlɛ nu
Kenga Yekile 18:4, a na akee bɛzuzu kpuya ɛhye anwo:
-
Kɛkala mɔɔ wɔnwu kɛ Nyamenle kulo kɛ ɔboa menli mɔɔ adalɛ ɛzonlenlɛ ɛbɛlɛbɛla bɛ la, kɛzi ɔmaa ɛte nganeɛ ɛ?
7. Kɔ zo sukoa nɔhalɛ Nyamenle ne anwo debie
Asoo ɔwɔ kɛ adalɛ ɛzonlenlɛ maa ɛkakyi adwenle mɔɔ ɛlɛ wɔ Nyamenle anwo la? Fa ye kɛ kakula nrenyia bie ɛkpo folɛdulɛ kpalɛ mɔɔ ye papa ɛva ɛmaa ye la. Ɔfi sua nu na ɔkɔbɔ ɛbɛla mgbane mgbane. Papa ne ɛnlie ɔ ra ne nyɛleɛ ne ɛndo nu. Duzu ati a ɔnle kpalɛ kɛ awie babɔ papa ne somolɛ wɔ ɔ ra ne atuadelɛ ne anwo a?
-
Asoo ɔle kpalɛ kɛ adalɛ ɛzonlenlɛ nyɛleɛ ti ɛbabɔ Gyihova somolɛ na wɔagyakyi kɛ ɛbazukoa ɔ nwo debie ɔ?
BIE MƆ KA KƐ: “Me nye ɛnlie Nyamenle ɛzonlenlɛ nwo ɔluakɛ ɛzonlenlɛ a fa ngyegyelɛ dɔɔnwo ba a.”
-
Kɛzi ɛnwu ye ɛ?
-
Duzu ati a ɔnle kɛ yɛmaa adalɛ ɛzonlenlɛ nyɛleɛ kakyi adwenle mɔɔ yɛlɛ ye wɔ Gyihova anwo a?
EDWƐKƐ TITILI
Adalɛ ɛzonlenlɛ ɛlua ye adalɛ ngilehilelɛ nee ye ninyɛndane ɛyɛlɛ zo ɛha Nyamenle anwo adalɛ edwɛkɛ. Nyamenle bazɛkye adalɛ ɛzonlenlɛ.
Ndinu
-
Kɛzi ɛbu mɔɔ adalɛ ɛzonlenlɛ ɛhilehile nee mɔɔ yeyɛ la ɛ?
-
Kɛzi Gyihova bu adalɛ ɛzonlenlɛ ɛ?
-
Duzu a Nyamenle bava ayɛ adalɛ ɛzonlenlɛ a?
KPONDƐ DƆƆNWO
Sukoa ndenle nwiɔ mɔɔ ɛzonlenlɛ dɔɔnwo dua zo yɛ mɔɔ ɛnzɔ Nyamenle anye la.
“Asoo Asɔne Kɔsɔɔti Le Ko Ɔ? Asoo Nyamenle Die Ɔ Muala To Nu Ɔ?” (Edwɛkɛ mɔɔ wɔ jw.org azo)
Duzu ati a Gyihova kulo kɛ yɛ nee awie mɔ bɔ nu sonle ye a?
“Asoo Ɔhyia Kɛ Ɛboka Ɛzonlenlɛ Bie Anwo Ɔ?” (Edwɛkɛ mɔɔ wɔ jw.org azo)
Ɛnee mɔɔ kɔ zo wɔ ɛsɔfo bie asɔne nu la gyegye ye. Noko yeammaa ɛhye anzi ye adenle kɛ ɔbazukoa Nyamenle anwo nɔhalɛ ne.
“Deɛmɔti Ɛsɔfo Bie Gyakyile Asɔne Mɔɔ Ɔkɔ La” (Awake!, February 2015)
Wɔ ɛvolɛ ɛya dɔɔnwo anu, ɛzonlenlɛ ngakyile ɛha adalɛ edwɛkɛ mɔɔ maa menli dwenle kɛ Nyamenle ɛndwenle yɛ nwo yɛɛ ɔ ti yɛ se la. Sukoa adalɛ zɛhae mɔ nsa anwo nɔhalɛ ne.
“Adalɛ Mɔɔ Maa Bɛdwenle Kɛ Nyamenle Ɛnlɛ Ɛlɔlɛ La” (Ɛzinzalɛ Arane, November 1, 2013)
a Amaa wɔanwu deɛmɔti Yekile buluku ne ka adalɛ ɛzonlenlɛ nwo edwɛkɛ kɛ raalɛ bie mɔɔ bɛfɛlɛ ye Babelɔn Kpole ne la, nea Awieleɛdwɛkɛ 1.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
