MSOLO 13
Ko vipembedzo vabodza vichitisa tani kuti wanthu akhale kutali na Mulungu?
Peno Mulungu ni chikondi, ndawa chani vinthu voipa vichachitiwa na vipembedzo vomwe vichati vichatumira Mulungu? Mwachigwato tingalewe kuti vipembedzo vimwevi nivabodza. Ivo vichanena vinthu vonama pakulewa va Mulungu. Ko vipembedzo va bodza vichafutusa tani wanthu kwa Mulungu? Ko Mulungu achabva tani na vimwevi? Ko ni chani chomwe iye adzachite?
1. Ko vipembedzo vabodza vichafutusa tani wanthu kwa Mulungu pavomwe achapfunzisa?
Vipembedzo vabodza ‘vidachinjanisa chonadi cha Mulungu na bodza.’ (Aroma 1:25) Mwakulinganiza, vizinji mwa vipembedzo vimwevi vichapfunzisalini va dzina ya Mulungu. Koma Baibolo ichati nivodikana kuphatisira basa dzina ya Mulungu. (Aroma 10:13, 14) Chinthu choipa chikachitika azitsogoleri anango wavipembedzo achati ni chakulinga cha Mulungu. Koma mweyi ni bodza. Mulungu achachitalini vinthu vakuipa. (Lewengani Yakobo 1:13.) Vopasa ntsisi ni vakuti mabodza mwaya yachafutusa wanthu kwa Mulungu.
2. Ko vipembedzo vabodza vichafutusatani wanthu kwa Mulungu pavomwe iwo achachita?
Vipembedzo vabodza vichitiralini vinthu vabwino wanthu ninge momwe Yahova achachitira. Baibolo pakulewa za vipembedzo vabodza mwevi ichati ‘machimo yake yawunjikana mpakana kudzulu.’ (Chivumbulutso 18:5) Kwa magole yazinji vipembedzo vichangenerera mu ndale na kuthandizira nkhondo, kuingizira mwapa ivo vachitisa kuti wanthu mamidyau yazinji aphewe. Azitsogoleri wa vipembedzo vizinji ni olemera ndipo mali mwezi zichokera kwa wanthu omwe achapemphera m’matchetchi yawo. Mwevi vichaoneseratu kuti iwo achamudziwalini Mulungu.—Lewengani 1 Yohane 4:8.
3. Ko Mulungu achaviwonatani vipembedzo vabodza?
Peno vomwe vipembedzo vabodza vichachita vichakukalipisani imwepo, ganizirani momwe Mulungu chaiye achabvera. Azitsogeleri wachipembedzo achachitisa kuti wanthu akhale kutali na Mulungu ndipo achaikhiralini nzeru wanthu omwe achapemphera nawo. Yahova achakonda wanthu ndipo achabva kuwawiwa akambawona vomwe azitsogoleri mwawa achachita. Iye ankupolomisa kuti kutsogolo vipembedzo vose vabodza vidzachosewe ndipo ‘vidzagumanikelini pomwe.’ (Chivumbulutso 18:21) Manjemanje, Mulungu adzamalise vipembedzo vose vabodza.—Chivumbulutso 18:8.
PFUNZIRANI VIZINJI
Mu pfunziro mweyi tipfunzire vinthu vitatu, chakuyamba, tione kuti ko Mulungu achaviwonatani vipembedzo vabodza, chachiwiri, tione vinthu voipa vomwe vipembedzo vabodza vachita, ndipo chachitatu, ndawa chani vimwevi vichadekanalini kukulekesani kupfunzira va Yahova.
4. Ndawa chani Mulungu achakondweralini na vipembedzo vose?
Wanthu azinji achaganiza kuti vipembedzo vandokhala njira zosiyanasiyana zotifikisa kwa Mulungu. Koma ko mwevi ni chaivodi? Lewengani Mateyu 7:13, 14, ndipo patsogolo pake kambiranani mbvunzo uyu:
-
Ko Baibolo ichati chiyani pankhani ya njira yotsogolera kumoyo?
Wonesani VIDIYO, patsogolo pake kambiranani mbvunzo uyu.
-
Ko Baibolo ichati vipembedzo vose vichakondweresa Mulungu?
5. Vipembedzo vabodza vichaonesalini chikondi cha Mulungu
Vipembedzo vabodza vichafutusa wanthu kwa Mulungu munjira zosiyanasiyana. Ndipo njira yoipa yomwe iwo achachitira vimwivi nikuthandizira nkhondo. Naboni tione chitsanzo, wonesani VIDIYO. Patsogolo pake kambiranani mibvunzo aya.
-
Ko vipembedzo vizinji vidachita chani pankhondo yachiwiri yapadziko yose?
-
Ko imwepo munkuganiza chani pa vomwe iwo adachita?
Lewengani Yohane 13:34, 35 na 17:16. Patsogolo pake kambiranani mibvunzo aya:
-
Ko imwepo munkuwona kuti Yahova achabva tani vipembedzo vikambathandizira nkhondo?
-
Vipembedzo vinamulandu wavinthu vizinji voipa. Ko imwepo mudawonako vinthu viponi vomwe vinkuwonesa kuti vipembedzo vichaonesalini chikondi cha Mulungu?
Vipembedzo vabodza vichaonesalini chikondi cha Yahova
6. Mulungu achada kuti wanthu achoke muvipembedzo vabodza
Lewengani Chivumbulutso 18:4, a ndipo patsogolo pake kambiranani mbvunzo uyu:
-
Ko imwepo muchabva tani pakudziwa kuti Yahova achada kuthandiza wanthu kuti abule mu chipembedzo chabodza?
7. Pitirizani kupfunzira va Mulungu chaiye
Ko vinthu voipa vomwe vipembedzo vabodza vichachita vichadekana kukufutusani kwa Mulungu? Ganizirani va mwana yemwe ankubveralini malangizo ya ababa wake. Mwana wasalula kuchoka pamuyi na kuchita vinthu voipa, baba ankubveranalini navo vomwe mwana wachita, ko chingakhale chilungamo kunena kuti baba ule ndiye wachitisa kuti mwana akhale wosabvera?
-
Ko chingakhale chilungamo kuleka kupfunzira va Yahova na kumubvera ndawa ya vinthu vomwe vipembedzo voipa vinkuchita?
WANTHU ANANGO ACHATI: ‘Nichaikhiralini nzeru va Mulungu ndawa vipembedzo vichayambisa mabvuto yazinji.’
-
Ko imwepo munkubverana navo vimwevi?
-
Ndawa chani vinthu voipa vomwe vipembedzo vichachita vichadekanalini kutifutusa kwa Yahova?
CHIGWATO
Vipembedzo vabodza vichafutusa wanthu kwa Mulungu, ivo vichachita vinthu vimwivi pakupfunzisa vinthu vophonyeka na kumbachita vinthu voipa. Mulungu adzacheneke vipembedzo vabodza.
Kubwerezera
-
Ko imwepo munkuganizatani pa vomwe vipembedzo vabodza vichachita komasoti kupfunzisa?
-
Ko Yahova aviwonatani vipembedzo vabodza?
- Ko Mulungu adzachite chani na vipembedzo vabodza?
KUTI MUDZIWE VIZINJI
Dziwani va njira ziwiri zomwe vipembedzo vichachita zosakondweresa Mulungu.
‘Ko vipembedzo vose nivibodzi? Ko vose vichatifikisa kwa Mulungu?’ (Nkhani ya pa intaneti)
Ndawa chani Yahova achada kuti timbamutumikire pabodzi na anzathu?
‘Ko nivakudekana kuti timbakhale mu gulu yachipembedzo?’ (Nkhani ya pa intaneti)
Wantsembe yemwe wenze adaneta nacho chipembedzo chake. Koma mwevi vilibe kumukangisa kupfunzira chonadi cha m’Baibolo.
‘Ndawa yake wantsembe adasiya tchetchi yake’ (Galamukani!, Fevereiro 2015)
Kwa magole yazinji vipembedzo vakhala vinkunena bodza yakuti Mulungu ni woipa. Pfunzirani chonadi pamabodza mwaya.
‘Mabodza yomwe yachawonesa kuti Mulungu alibe chikondi’ (Nsanja ya Olonda ya 1 Novembro, 2013)
a Baibolo ichalinganiza vipembedzo vabodza ninge nkazi wochemerewa kuti Babulo nkulu, kuti mudziwe ndawa yake onani Mawu yakumapeto 1.
