FUNDO 13
Magereja e Kunyepa Anoshaisha Kudini Kuimirira Mwari
Kana Mwari ari rudo, ngei zviito zvakashata zvakawanda zveciizwa no magereja anoti anomuseenzera? Mucigwagwa, magereja aya ngeekunyepa, awona anobhuya manyepo nge zva Mwari. Kodi awona anoshaisha kudini kumuimirira? Mwari anozwa kudini ngo ndaa yazvo? Uye yena acaitei?
1. Magereja e kunyepa anoshaisha kudini kuimirira Mwari eciseenzesa mafundisire awo?
Magereja e kunyepa “akacinja cokwadi ca Mwari kuti cigare manyepo.” (Aroma 1:25) Ngo muezaniso, magereja akawanda aafundisi anhu nge zve zina ra Mwari. Asi Bhaibheri rinobhuya kuti tinodikana kuseenzesa zina ra Mwari. (Aroma 10:13, 14) Kana pakaitika zviro zvakashata, atungamiriri e magereja anobhuya kuti kuda ka Mwari. Asi azvirokwazvopi. Mwari andiyepi anoitisa zviro zvakashata. (Erengai Tiyago 1:13.) Zvinotsukwarisa kuti manyepo e magereja anoita kuti anhu asade Mwari.
2. Magereja e kunyepa anoshaisha kudini kuimirira Mwari eciseenzesa zviito zvawo?
Magereja e kunyepa aabati anhu hingana mabatirhwe aanoizwa na Djehovha. Bhaibheri rinoti, zvitema zvemagereja e kunyepa “zvatutirana dakara kudenga.” (Zvakapangidzwa 18:5) Ke mazana e makore, magereja e kunyepa akapindira mune zvematongerhwe e nyika, akatsigira hondo uye akatendera kuuraiwa ke anhu asikaerengeki. Atungamiriri amweni e magereja anorarama upenyu we pamusorosoro ngokuripisa mare ateeri awo. Maitiro aya anopangidza kuti awona aazii Mwari, uye aana citenderhwa cekumuimirira.—Erengai 1 Juau 4:8.
3. Mwari anozwa kudini nge magereja e kunyepa?
Kana zviro zvinoizwa no magereja e kunyepa zvecimunyangadza, munorangarira kuti Djehovha anozwa kudini? Iyena anoda anhu, asi akanyangadzwa nge atungamiriri e magereja anoshaisha kumuimirira uye anobata zvakashata ateeri awo. yena ari kugondesa kuti acatsakatisa magereja e kunyepa uye ‘aacazomboonekizve.’ (Zvakapangidzwa 18:21) Nokukasika, Mwari acatsakatisa magereja ese e kunyepa.—Zvakapangidzwa 18:8.
FUNDAI ZVAKAWANDA
Nyasai kukwarakwatisa kuti Mwari anozwa kudini nge zve magereja e kunyepa. Fundaizve ngo zvaanoita, asi izvona ngazvisamupingaidze kuziya Djehovha.
4. Mwari aatenderi magereja ese
Anhu akawanda anotendera kuti magereja akaita hingana makwanza akasiyana-siyana anoendesa kuna Mwari. Asi izvi izvirokwazvo here? Erengai Mateu 7:13, 14, pedzepo cedzai nge zve mubvunzo unoteera:
-
Bhaibheri rinopanganidza kudini gwanza rinoendesa ku upenyu?
Ridzai VHIDHIYO, pedzepo cedzai nge zve mubvunzo unoteera.
-
Bhaibheri rinoreketa kuti magereja akawanda anopfadza Mwari here?
5. Magereja e kunyepa aapangidzi rudo ra Mwari
Magereja e kunyepa anoshaisha kuimirira Mwari nge mishobo yakasiyana-siyana. Umwe we mushobo unoziikanwa nge we kwenda kawo ku hondo. Kuti tione muezaniso umweni, ridzai VHIDHIYO. Pedzepo cedzai nge zve mibvunzo dzinoteera.
-
I dii ripi rakatsigirhwa no magereja akawanda mu Hondo Yecipiri ye Nyika dzese?
-
Munozwa kudini nge ndaa yedii raakatsigira?
Erengai Juau 13:34, 35 uye 17:16. Pedzepo cedzai nge zve mibvunzo dzinoteera:
-
Djehovha anozwa kudini magereja paanopindira mu hondo?
-
Magereja e kunyepa anokonzera zviro zvakashata zvakawanda. Zvinyi zvamakaona zviciizwa no magereja e kunyepa zvinopangidza kuti awona aateedzeri Mwari pakupangidza rudo?
Magereja e kunyepa aapangidzi rudo ra Mwari
6. Mwari anoda kusudzunura anhu mu magereja e kunyepa
Erengai Zvakapangidzwa 18:4, a pedzepo cedzai nge zve mubvunzo unoteera:
-
Munozwa kudini nge kuziya kuti Mwari anoda kusudzunura anhu akapauswa nge magereja e kunyepa?
7. Rumbwai mecifunda nge zva Mwari we cokwadi
Magereja e kunyepa anodikana kupingaidza maonero amunoita Mwari here? Rangarirai nge zve mwana unoramba nhungamiriro ino ungwaru yaakapaswa na baba ake. Mwanewo unobuda pa nyumba woenda koorarama upenyu wakashata. Asi baba akhona aatenderi zviito zve mwana wawo. Ngei zvisikazi kunaka kupasa ndaa baba nge ndaa ye mararamiro akashata ari kuizwa no mwana wawo?
-
Zvakanaka here kupasa ndaa Djehovha uye kusiya kufunda nge zvake nge ndaa ye zviro zvakashata zvinoizwa no magereja e kunyepa?
ANHU AMWENI ANOTI: “Andina basa na Mwari ngekuti magereja ndiwona arikukonzera matambudziko akawanda pa nyika.”
-
Imwimwi munozwawo kudaro here?
-
Ngei zviito zve magereja e kunyepa zvisikadikani kupingaidza maonero amunoita Djehovha?
MUCIGWAGWA
Magereja e kunyepa anoshaisha kuimirira Mwari eciseenzesa fundiso dzekunyepa uye zviito zvakashata. Mwari acatsakatisa magereja e kunyepa.
Mibvunzo yekuhwirinzira
-
Munozwa kudini ngo zviro zvinofundiswa no magereja e kunyepa uye zvaanoita?
-
Djehovha anozwa kudini nge zve magereja e kunyepa?
-
Djehovha acaitei ku magereja e kunyepa?
ZIYAI ZVAKAWANDA
Fundai nge zve mishobo miiri inoita kuti magereja akawanda anyangadze Mwari.
“Magereja Ese Anotenderhwa na Mwari Here?” (Fundo ye mu saite)
Ngei Djehovha ecida kuti timunamate takaungana no amweni?
“Tinodikana Kugara mu Cikwata ce Anamati Here?” (Fundo ye mu saite)
Padhre umweni wainetseka nge ndaa yecitendero cake. Asi izvona azvizi kumupingaidza kufunda cokwadi nge zva Mwari.
Kubvira kare, magereja anoreketa manyepo anoita kuti Mwari aoneke hingana ari kure uye ano utsinye. Fundai cokwadi nge zve manyepo matatu aya.
“Ngei Anhu Ecirangarira Kuti Kuda Mwari Kunoshupha?” (Murindiri, wa 1 ya Novembro, ya 2013)
a Kuti muone cinoita kuti bhuku ra Zvakapangidzwa ripanganidze nge zve magereja e kunyepa hingana mukadzi unozwi Bhabhironi Guru, onai Nyasai Kuzwisisa 1.
