OCIPAMA 13
Ndomo Etavo Liesanda li Amũla Omanu ku Suku
Nda Suku eye ocisola, momo lie vana va litukula okuti vakuetavo va siatela oku linga ovina vialua vĩvi vonduko ya Suku? Oku teta onimbu, tu popia tuti, atavo aco, esanda kuenda a popia esanda catiamẽla ku Suku. Etavo liesanda lia siata oku amũla ndati omanu ku Suku? Eye wa siata oku liyeva ndati luhembi waco? Kuenje nye eye a ka linga?
1. Etavo liesanda lia siata oku amũla ndati omanu ku Suku lalongiso avo?
Etavo liesanda lia “pongolola ocili ca Suku luhembi.” (Va Roma 1:25) Ndeci, atavo alua ka a siatele oku longisa oloñame viavo onduko ya Suku. Pole, Embimbiliya li popia okuti, onduko ya Suku yi sukila oku tukuiwa. (Va Roma 10:13, 14) Eci ku pita ovina vimue vĩvi, asongui vamue vetavo va siata oku popia okuti, eci ocipango ca Suku. Pole, eci uhembi. Suku lalimue eteke a koka eci cĩvi. (Tanga Tiago 1:13.) Pole, ovohembi atavo, a kokela omanu oku li amũha la Suku.
2. Etavo liesanda li amũla ndati omanu ku Suku lovilinga viavo?
Etavo liesanda ka li tati omanu ndeci Yehova a va tata. Embimbiliya li popia okuti, etavo liesanda ‘akandu alio a li lundaika toke kilu.’ (Esituluilo 18:5) Vokuenda kuanyamo, atavo a siata oku litenga vopulitika, oku kuatisa kovoyaki kuenda a koka olofa viomanu valua. Asongui vamue vetavo va sanjukila oku kuata ovokuasi okuti, va kisika oloñame viavo oku feta ovina viaco. Asongui vaco va popia okuti olonumiwa via Suku, pole, ovilinga viavo vi situlula okuti ka vo kũlĩhĩle.—Tanga 1 Yoano 4:8.
3. Nye Suku a sima catiamẽla ketavo liesanda?
Ovina vi lingiwa letavo liesanda nda vi ku kokela onyeño, nye ci popiwa catiamẽla ku Yehova? Eye o sole omanu, pole, o kuetele onyeño asongui vana va litukula okuti olonumiwa viaye kuenda va talisa ohali oloñame viavo. Eye wa likuminya okuti, etavo liesanda li ka kunduiwa kuenda ‘lalimue eteke li ka sangiwa vali.’ (Esituluilo 18:21) Ndopo, Suku o ka malako etavo liosi liesanda.—Esituluilo 18:8.
LILONGISA ONDONGOSI
Kũlĩhĩsa ocisimĩlo ca Suku catiamẽla ketavo liesanda. Lilongisa ovina vikuavo olio lia siata oku linga kuenda esunga lieci ku sukilila oku liwekapo oku kũlĩha Yehova omo liovina viaco.
4. Suku ka tava atavo osi
Omanu valua va sima okuti atavo, olonjila via litepa vioku enda ku Suku. Anga hẽ eci ocili? Tanga Mateo 7:13, 14, noke konomuisa epulilo li kuãimo:
-
Nye Embimbiliya li popia catiamẽla konjila yi tuala komuenyo?
Tala OVIDEO, noke konomuisa epulilo li kuãimo.
-
Embimbiliya li popia hẽ okuti atavo osi a sanjuisa Suku?
5. Etavo liesanda ka li situlula ocisola ca Suku
Atavo a siata oku amũla omanu ku Suku volonjila vialua. Onjila yimue poku litenga kuyaki. Tu tali ulandu umue, tala OVIDEO. Noke konomuisa epulilo li kuãimo.
-
Nye atavo alua a linga vokuenda Kuyaki Wavali wa pita Voluali?
-
Nye o sima catiamẽla konjila ovo va nõla?
Tanga Yoano 13:34, 35 kuenda 17:16. Noke konomuisa apulilo a kuãimo:
-
Yehova o liyeva ndati eci atavo a litenga vuyaki?
-
Etavo liesanda li kuete eko liovina vialua vĩvi. Ovina vipi wa siata oku mola vi lekisa okuti atavo ka a situlula ocisola ca Suku?
Etavo liesanda ka li situlula ocisola ca Suku
6. Suku o yongola oku upa omanu vetavo liesanda
Tanga Esituluilo 18:4, a Noke konomuisa epulilo li kuãimo:
-
O liyeva ndati poku kũlĩha okuti, Suku o yongola oku kuatisa omanu va siata oku kembiwa letavo liesanda?
7. Amamako oku lilongisa catiamẽla ku Suku yocili
Ovina vĩvi etavo liesanda li lingainga vi ku amũla hẽ ku Suku? Sokolola omõla umue o likala oku pokola kalungulo awa a isiaye. Kuenje o tunda konjo o fetika oku linga ovina via vĩha. Isia ka sanjukila ovilinga viomõlaye. Nda ca sunguluka hẽ oku kapa eko ku isia omo liovilinga viomõlaye ukuesino?
-
Ca sunguluka hẽ oku kapa eko ku Yehova loku liwekapo oku lilongisa catiamẽla kokuaye omo liovilinga vietavo liesanda?
OMANU VAMUE VA POPIA VATI: “Si yongola oku lilongisa catiamẽla ku Suku momo etavo li koka ovitangi vialua.”
-
O simavo ndoco?
-
Momo lie ka tu ecelela okuti ovilinga vietavo liesanda vi tu amũla ku Yehova?
NYE WA LILONGISA?
Etavo liesanda li amũla omanu ku Suku pocakati calongiso esanda kuenda ovilinga viakãla. Suku o ka kundula etavo liesanda.
Oku Pitulula
-
Nye o sima catiamẽla kovina etavo liesanda li lingainga kuenda oku longisa?
-
Nye Yehova a sima catiamẽla ketavo liesanda?
-
Nye Suku a ka linga letavo liesanda?
OCO O KŨLĨHE OVINA VIKUAVO
Tala olonjila vivali ndomo etavo liesanda ka lia siatele oku linga ocipango ca Suku.
“Anga hẽ Atavo Osi Amuamue? Anga hẽ Osi a Songuila ku Suku?” (Ocipama ci sangiwa lika vo Internet)
Momo lie Yehova a yonguila okuti tu u fendela kumue la vakuetu?
“Ci Sukiliwa hẽ Oku Tiamẽla Kocisoko Cimue Cetavo?” (Ocipama ci sangiwa lika vo Internet)
Tala ulandu wusongui umue wetavo wa fetika oku kuata atatahãi letavo liaye. Pole, ka liwekelepo oku sanda ocili ca Suku.
“Esunga Lieci Usongui Umue a Silapo Etavo Liaye” (Omasuli!, ya Kayovo 2015)
Vokuenda kuanyamo alua, atavo a siata oku kemba catiamẽla ku Suku. Kuenje a vetiya omanu oku tava okuti, Suku ka va kapeleko kuenda ongangala. Lilongisa ocili catiamẽla kovohembi aco atatu.
“Ovohembi a Vetiya Oku Sima Okuti, Suku ka Kuete Ocisola” (Utala Wondavululi 1 wa Kuvala 2013)
a Oco o kũlĩhe esunga lieci elivulu Liesituluilo li sokisila etavo liesanda ndukãi umue o tukuiwa okuti Bavulono Yinene, tala Etosi 1 kesulilo.
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
