UYONO 13
Oborẹ Ẹga rẹ Efian Vwo Si Ihwo nẹ Ẹbẹre rẹ Ọghẹnẹ
Ọghẹnẹ da dia ẹguọnọ, diesorọ ẹga buebun re tanẹ ayen mudia kẹ Ọghẹnẹ vwọ reyọ odẹ rọyen vwo ru obo re chọre? Ẹga nana eje efian; ayen gun efian nyẹ Ọghẹnẹ. Idjerhe vọ yen ayen vwo si ihwo nẹ ẹbẹre rọyen? Mavọ yen oma ruo kpahọn? Kẹ, die yen o che ru kpahọn?
1. Mavọ yen ẹga rẹ efian vwo si ihwo nẹ ẹbẹre rẹ Ọghẹnẹ womarẹ iyono rayen?
Ẹga rẹ efian “wene uyota rẹ Ọghẹnẹ kẹ ofian.” (Rom 1:25) Kerẹ udje, ẹga buebun yono ihwo rayen odẹ rẹ Ọghẹnẹ-ẹ. Ẹkẹvuọvo, Baibol na tare nẹ ofori nẹ a vwẹ odẹ rẹ Ọghẹnẹ vwo ruiruo. (Rom 10:13, 14) Ilori rẹ ẹga evo tare nẹ emu ọbrabra da phia ọyen ọhọre rẹ Ọghẹnẹ. Ẹkẹvuọvo, ọyena efian. Ọ dia Ọghẹnẹ yen suọ-ọ. (Se Jems 1:13.) Ọ da ohwo mamọ nẹ efian rẹ ẹga evo gunru si ihwo nẹ ẹbẹre rẹ Ọghẹnẹ re.
2. Mavọ yen ẹga rẹ efian vwo si ihwo nẹ ẹbẹre rẹ Ọghẹnẹ womarẹ irueru rayen?
Ẹro rẹ ẹga rẹ efian vwo ni ihwo fẹnẹ ọ rẹ Ọghẹnẹ. Baibol na tare nẹ imwemwu rẹ ẹga rẹ efian “kpare kpenu re te odjuvwu” re. (Ẹvwọphia 18:5) Vwẹ ikpe buebun rhire na, ẹga buebun phi oma phiyọ oseghe rẹ usuon, bicha ifovwin, ayen je rhọnvwephiyọ yẹrẹ so ughwu rẹ ihwo buebun re. Kidie nẹ ilori rẹ ẹga evo guọnọ fe, kẹ ayen reyọ arhọghọ buebun miẹ ihwo rẹ ẹga rayen. Ọnana djerephia nẹ ayen riẹn Ọghẹnẹ-ẹ, ọtiọyena ayen rhe fo ihwo ri se mudia kẹ-ẹ.—Se 1 Jọn 4:8.
3. Ẹro vọ yen Ọghẹnẹ vwo ni ẹga rẹ efian?
Ọ da dianẹ ivun miovwo uwe kpahen irueru rẹ ẹga rẹ efian, kẹ Jihova vwo? Jihova vwo ẹguọnọ rẹ ihwo, ẹkẹvuọvo ivun miovwo kpahen ilori rẹ ẹga ri gun efian nyẹ, re vwẹrote ihwo rehẹ ẹga raye-en. O veri nẹ ọyen cha ghwọrọ ẹga rẹ efian “a gbe cha mrẹ ọfa-a.” (Ẹvwọphia 18:21) Kẹrẹkpẹ, Ọghẹnẹ cha ghwọrọ ẹga rẹ efian eje.—Ẹvwọphia 18:8.
HIẸ KODO
Yono kpobarophiyọ kpahen oborẹ oma ru Ọghẹnẹ kpahen ẹga rẹ efian. Mrẹ oborẹ ẹga rẹ efian rure, kugbe oboresorọ o vwo fo nẹ wo siomauko vwẹ eyono rẹ Ota rẹ Ọghẹnẹ-ẹ.
4. Ọ dia ẹga eje yen Ọghẹnẹ rhọnvwephiyọ-ọ
Ihwo buebun vwo imuẹro nẹ ẹga eje họhọ idjerhe sansan ri sun ihwo bru Ọghẹnẹ ra. Ẹkẹvuọvo, ọyena uyota? Se Matiu 7:13, 14, ovwan ta ota kpahen onọ nana:
-
Mavọ yen Baibol na wan djisẹ rẹ idjerhe ro sun ihwo kpo arhọ na?
Hworo IVIDIO na, ovwan ta ota kpahen onọ ro nenire.
-
Baibol na tare nẹ ẹga buebun yen ruẹ ọhọre rẹ Ọghẹnẹ?
5. Ẹga rẹ efian dje ẹguọnọ rẹ Ọghẹnẹ phia-a
Idjerhe buebun yen ẹga rẹ efian vwo si ihwo nẹ ẹbẹre rẹ Ọghẹnẹ re. Idjerhe ọvo kiriguo ọyen ayen vwo vwobọ vwẹ ofovwin. Wọ da guọnọ mrẹ udje ọvo, hworo IVIDIO na. Ovwan ta ota kpahen enọ ri nenire.
-
Ẹdia vọ yen ishọshi buebun kare vwẹ ofovwin akpọeje II?
-
Mavọ yen oma ru we kpahen ẹdia rẹ ayen kare na?
Se Jọn 13:34, 35 kugbe 17:16. Ovwan ta ota kpahen enọ nana:
-
Mavọ yen oma ru Jihova siẹrẹ ẹga de vwobọ vwẹ ofovwin?
-
Ẹga rẹ efian yen so erọnvwọn ebrabra buebun re phia na. Die yen wo niso rọ nẹrhẹ wọ mrẹvughe nẹ ẹga buebun dje ẹguọnọ rẹ Ọghẹnẹ phia-a?
Ẹga rẹ efian dje ẹguọnọ rẹ Ọghẹnẹ phia-a
6. Ọghẹnẹ guọnọ si ihwo nẹ ẹga rẹ efian
Se Ẹvwọphia 18:4, a ovwan ta ota kpahen onọ nana:
-
Mavọ yen oma ru we wọ vwọ riẹn nẹ Ọghẹnẹ guọnọ si ohwo ọvuọvo vwo nẹ ẹga rẹ efian?
7. Yono kpahen Ọghẹnẹ rẹ uyota na ọkieje
Ofori nẹ ẹga rẹ efian wene ẹro wo vwo nẹ Ọghẹnẹ? Vwẹro roro ọmọ rọ sen odjekẹ rẹ ọsẹ rọyen, o de vrẹn nẹ uwevwin re ru ogbiru. Ọsẹ na rhọnvwephiyọ oborẹ ọmọ na ruru-u. Diesorọ a cha sa hanrhe ọsẹ na-a fikirẹ orharhe rẹ akpọ rẹ ọmọ na yerẹn?
-
O che yovwin ra vwọ hanrhe Jihova yẹrẹ dobọ rẹ ẹga rọyen ji fikirẹ irueru rẹ ẹga rẹ efian?
IHWO EVO TA: “Mi vwo omavwerhovwẹn kpahen Ọghẹnẹ-ẹ, kidie ẹga yen so ebẹnbẹn buebun.”
-
Ẹro yena wo ji vwo no?
-
Diesorọ irueru rẹ ẹga rẹ efian vwo je wene ẹro avwanre vwo ni Jihova?
ỌDJẸKOKO
Ẹga rẹ efian si ihwo nẹ ẹbẹre rẹ Ọghẹnẹ womarẹ iyono rẹ efian vẹ irueru echọchọ rayen. Ọghẹnẹ cha ghwọrọ ẹga rẹ efian eje.
Ẹrhomafuẹrẹn
-
Mavọ yen oma ru we kpahen iyono rẹ ẹga rẹ efian vẹ irueru rayen?
-
Mavọ yen oma ru Jihova kpahen ẹga rẹ efian?
-
Die yen Ọghẹnẹ che ru kpahen ẹga rẹ efian?
HIẸ GUỌNỌ
Yono kpahen idjerhe ivẹ rẹ ẹga buebun vwo ru obo re chọre vwẹ ẹro rẹ Ọghẹnẹ.
“Ẹga Eje Ọvuọvo? Ayen Eje Suẹn Ihwo Brẹ Ọghẹnẹ?” (Uyovwinrota rọhẹ jw.org)
Diesorọ Jihova vwọ guọnọ nẹ avwanre kuomakugbe ihwo efa vwẹ ẹga rọyen?
Ẹwẹn obrorhiẹn rẹ orherẹn ọvo kpokpiro fikirẹ irueru rẹ ẹga rọyen. Ẹkẹvuọvo, ọnana nẹrhẹ ọ dobọ rẹ eyono rẹ Ota rẹ Ọghẹnẹ ji-i.
“Oboresorọ Orherẹn Ọvo Vwo Vrẹn nẹ Ishọshi Rọyen” (Awake!, February 2015)
Vwẹ ikpe buebun rhire na, ẹga buebun gun efian nyẹ Ọghẹnẹ re, rọ nẹrhẹ e roro nẹ ọ davwerhọn avwanre-e, ọyen je ohwo vẹ ọkon. Yono uyota ro shekpahen efian erha yena.
“Efian rẹ Ihwo Guẹn rọ Nẹrhẹ E Roro nẹ Ọghẹnẹ Vwo Ẹguọnọ-ọ” (Uwevwin Orhẹrẹ ri November 1, 2013)
a Wọ vwọ mrẹ oboresorọ ọbe rẹ Ẹvwọphia vwọ vwẹ ẹga rẹ efian vwo dje aye ọvo re se Babilọn Rode, ni Eta rẹ Odjefiotọ 1.
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
