LISON 14
Ki Mannyè Nou Sa Adowé Bondyé Pou Plè’y?
Kon nou té apwann an Lison 13, sé pa tout wilizyon ki ni favè Bondyé. Kanmenm, nou sa adowé Kwéyatè nou adan an mannyè ki ka plè’y. Mé, ki kalité adowasyon ki ka plè Bondyé? (Jémz 1:27) Annou gadé sa Bib-la ka di.
1. Koumannyè nou sa apwann mannyè-a pou adowé Jéhova?
Bib-la ka di nou kouman nou sa adowé Jéhova adan an mannyè ki kay plè’y. Jézi di Bondyé: “Pawòl ou sé lavéwité.” (Jan 17:17) Adan wilizyon ka inyowé lavéwité-a ki an Pawòl Bondyé, épi yo ka wiplasé’y épi lésisyon èk lwa lézòm. Mé, Jéhova pa ka plè épi moun ki ka ‘widjèkté lwa’y’. (Li Mak 7:9.) Pou plè Jéhova, nou ni pou bazé adowasyon nou asou Bib-la épi swiv sé konsèy-la ki adan’y-la.
2. Ki mannyè nou sipozé adowé Jéhova?
Jéhova méwité pou nou enmen’y èk adowé’y sèlman, paski sé li ki fè nou. (Wévélasyon 4:11) Konsa nou pa sipozé sèvi pyès idòl èben imaj an adowasyon nou.—Li Ditonronnonmi 5:8, 9.
Nou ni pou adowé Jéhova adan an mannyè, “ki nèt épi [adan an mannyè i] kay aksèpté”. (Ronm 12:1) Sa vlé di, nou ka obéyi lwa Jéhova an lavi nou. Pou ègzanp, moun ki enmen Jéhova ka obéyi konsèy li konsèné mawiyaj. Osi, yo pa ka fè bagay ki sa donmajé lavi yo, tèl kon sèvi tabak, bwè twòp alkòhòl, épi sèvi dwòg. a
3. Pouki nou sipozé adowé Jéhova ansanm épi sé fwè èk sè-a?
Sé mitin-lan nou ka ni toulé simenn ka ban nou lokazyon pou ‘glowifyé Jéhova . . . an kongwigasyon-an’. (Sam 111:1, 2) Yon mannyè nou ka fè sa, sé lè nou chanté pou glowifyé Bondyé. (Li Sam 104:33.) Jéhova ka mandé nou pou atandé sé mitin-lan paski i enmen nou. Èk osi, i sav sé mitin-lan kay édé nou pou vansé pli pwé’y, pou nou sa enjwi on bon lavi pou tout tan. Lè nou asanmblé ansanm an sé mitin nou-an, nou ka ankouwajé sé fwè èk sè-a, èk osi yo ka ankouwajé nou tou.
ANNOU APWANN PLI
Apwézan, annou apwann pouki Jéhova pa vlé nou sèvi imaj an adowasyon nou. Osi, nou kay apwann lòt bagay nou sa fè pou glowifyé Jéhova.
4. Nou pa sipozé sèvi imaj an adowasyon nou
Ki mannyè nou konnèt Jéhova pa ka plè lè nou sèvi imaj an adowasyon nou? Annou gadé VIDIYO-A, èk apwé nou kay kozé asou kwèsyon sala:
-
Kisa ki té fèt lè pèp Bondyé té éséyé pou sèvi an imaj pou adowé’y?
Adan moun ka sèvi imaj pou adowé Bondyé, paski yo ka di sé imaj-la ka fè yo vini pli pwé Bondyé. Mé, ès sa vwé? Annou li Ègzodòs 20:4-6 èk Sam 106:35, 36, èk apwé nou kay kozé asou sé kwèsyon sala:
-
Ki diféwan bagay ou ja wè moun sèvi lè yo ka adowé Bondyé?
-
Ki mannyè Jéhova ka santi lè moun ka sèvi imaj pou adowé’y?
-
Ès ou kwè i bon pou sèvi imaj pou adowé Bondyé? Poutji ou ka di sa?
5. Lè nou adowé Jéhova adan mannyè-a ki dwèt-la, sa ka libéwé nou hòd fo lésisyon èk pwatik ki kont sa Bib-la ka enstwi
Gadé mannyè adowasyon ki dwèt té libéwé an fwè. Annou gadé VIDIYO-A, Lavéwité-a Libéwé Mwen.
Annou li Sam 91:14, èk apwé nou kay kozé asou kwèsyon sala:
-
Kisa Jéhova pwonmèt pou fè bay moun ki enmen’y èk ki ka adowé’y sèlman?
6. Nou ka adowé Bondyé an sé mitin nou-an
Nou ka glowifyé Jéhova èk nou ka ankouwajé yonn a lòt lè nou chanté èk lè nou bay wépons pou sé kwèsyon-an an sé mitin-lan. Annou li Sam 22:22, èk apwé nou kay kozé asou sé kwèsyon sala:
-
Ès ou ka kontan tann sé wépons-lan sé fwè èk sè-a ka bay an sé mitin-lan?
-
Ès ou té kay kontan pou pwépawé an ti wépons pou’w bay an sé mitin-lan?
7. Jéhova ka kontan lè nou patajé sa nou ka apwann épi lézòt
La ni plizyè diféwan mannyè pou patajé lévanjil épi moun. Annou li Sam 9:1 èvèk Sam 34:1, èk apwé nou kay kozé asou kwèsyon sala:
-
An sa ou ja apwann, kisa ou vlé patajé épi yon moun?
ADAN MOUN KA DI: “I pa enpòtan an ki wilizyon ou yé, dépi ou ka kwè an Bondyé.”
-
Ès ou kwè sa vwé? Pouki ou ka di sa?
CHONJÉ SÉ PWEN SALA
Nou ka plè Kwéyatè nou lè nou adowé’y sèlman, lè nou glowifyé’y an sé mitin-lan, èk lè nou patajé sa nou ka apwann épi lézòt.
Annou Wivizé Sa Nou Ja Apwann
-
Koumannyè nou sa apwann mannyè-a pou adowé Bondyé?
-
Pouki nou sipozé adowé Jéhova sèlman?
-
Pouki nou sipozé adowé Jéhova ansanm épi lòt moun ki ka éséyé pou plè’y?
LÒT ENFÒMASYON OU SA GADÉ
An listwa-a ki ni tit-la “Mwen Pa Ka Adowé Imaj Ankò”, apwann koumannyè yon madanm doubout sèvi imaj an adowasyon’y.
Apwann mannyè-a ou sa pwépawé byen pou bay an ti wépons an sé mitin-lan.
Gadé sé bennéfis-la yon jenn nonm twapé an sé mitin-lan, magwé i pa té ézé pou’y atandé.
An chay moun ki di yo sé Kwityen, ka kwè yo sipozé sèvi kwa-a an adowasyon yo. Ès nou sipozé sèvi kwa-a an adowasyon nou?
“Pou Ki Wézon Témwen Jéhova Pa Ka Sèvi Kwa-a An Adowasyon Yo?” (yon atik asou jw.org)
a Nou kay diskité sé sijé sala pli ta an liv sala.
