NÍ KASEMI 14
Mɛni E Sa Kaa Waa Pee Konɛ Wa Jami Nɛ Sa Mawu Hɛ Mi?
Ngɛ ní kasemi nɛ sɛ hlami ɔ mi ɔ, wa na kaa pi jamihi tsuo nɛ Mawu kplɛɛ a nɔ. Se kɛ̃ ɔ, wa ma nyɛ ma ja wa Bɔlɔ ɔ ngɛ blɔ nɛ e bua jɔ he ɔ nɔ. Mɛni blɔ nɔ wa maa gu kɛ ja Mawu konɛ e bua nɛ jɔ wa “jami” ɔ he? (Yakobo 1:27) Moo hyɛ nɔ́ nɛ Baiblo ɔ tsɔɔ ngɛ munyu nɛ ɔ he.
1. Kɛ wa ma plɛ kɛ le blɔ nɛ da nɛ wa maa gu nɔ kɛ ja Mawu kɛɛ?
Baiblo ɔ nɛ wa maa kase ɔ maa ye bua wɔ konɛ waa le blɔ nɔ nɛ wa maa gu kɛ ja Mawu. Yesu de Mawu ke: “O munyu ɔ ji anɔkuale.” (Yohane 17:17) Jami komɛ kua anɔkualehi nɛ ngɛ Mawu Munyu, nɛ ji Baiblo ɔ mi ɔ, nɛ a ngɔ adesahi a tsɔɔmihi kɛ a kusumihi kɛ da nane mi. Se Yehowa bua jɔɛ nihi nɛ a ‘kuaa e kita’ amɛ ɔ a he. (Kane Maako 7:9.) Ke wa kplɛɛ Baiblo ɔ blɔ tsɔɔmi nɔ, nɛ waa kɛ ga womihi nɛ ngɛ mi ɔ tsu ní ɔ, Mawu bua jɔɔ wawɛɛ.
2. Kɛ e sa nɛ wa ja Yehowa ha kɛɛ?
Akɛnɛ Yehowa ji nɔ nɛ bɔ wɔ he je ɔ, e sa nɛ wa ja lɛ pɛ. (Kpo Jemi 4:11) Enɛ ɔ tsɔɔ kaa e sa nɛ waa suɔ lɛ, nɛ wa sɔmɔ lɛ pɛ. Jehanɛ se hu ɔ, e sɛ nɛ waa ngɔ amaga, aloo foni, aloo nɔ́ kpa ko kɛ tsu ní ngɛ Mawu jami mi.—Kane Yesaya 42:8.
E sa nɛ wa jami ɔ nɛ pee nɔ́ nɛ e “ngɛ klɔuklɔu nɛ e saa” Yehowa hɛ mi. (Roma Bi 12:1) Enɛ ɔ tsɔɔ kaa e sa nɛ waa ngɔ je mi bami he mlaahi nɛ Mawu wo ɔmɛ kɛ tsu ní ngɛ wa si himi mi. Kaa nɔ hyɛmi nɔ́ ɔ, nihi nɛ a suɔ Yehowa a, a bua jɔɔ mlaahi kɛ blɔ tsɔɔmihi nɛ e kɛ ha ngɛ gba si himi he ɔ he, nɛ a kɛ tsuɔ ní. Jehanɛ se hu ɔ, a kuaa ní peepeehi nɛ maa ye mɛ awi, kaa taba numi, tsopa nɛ a kɛ tsuɔ ní ngɛ blɔ nɛ dɛ nɔ, kɛ dã demi loo dã fuu numi. a
3. Mɛni he je nɛ e sa nɛ waa kɛ nihi nɛ waa kɛ mɛ hɛɛ hemi kɛ yemi kake ɔ nɛ bla kɛ ja Yehowa a?
Asafo mi kpehi nɛ wa peeɔ daa otsi ɔ haa nɛ wa náa he blɔ kɛ ‘jeɔ Yehowa yi ngɛ gua loo asafo ɔ mi.’ (La 111:1, 2) Blɔ kake nɛ wa guɔ nɔ kɛ peeɔ jã ji lami nɛ wa laa kɛ jeɔ Mawu yi ɔ. (Kane La 104:33.) Yehowa suɔ kaa waa ya asafo mi kpehi ejakaa e suɔ wɔ, nɛ e le kaa ke wa pee jã a, lɔ ɔ maa ye bua wɔ nɛ wa ma ná bua jɔmi kɛ ya neneene. Ke wa ya asafo mi kpehi ɔ, wa woɔ ni kpahi he wami, nɛ mɛ hu a woɔ wɔ he wami.
MOO KASE BABAUU
Moo kase nɔ́ he je nɛ Yehowa kplɛɛ we amagahi kɛ fonihi nɛ a kɛ tsuɔ ní ngɛ jami mi ɔ nɔ. Lɔ ɔ se ɔ, o maa na blɔ slɔɔtohi nɛ da, nɛ wa ma nyɛ maa gu a nɔ kɛ je Mawu yi.
4. E sɛ nɛ waa gu amagahi kɛ fonihi a nɔ kɛ ja Mawu
Kɛ wa plɛ kɛ le kaa ke waa kɛ amagahi kɛ fonihi tsu ní ngɛ wa jami mi ɔ, Mawu bua be he jɔe ha kɛɛ? Mo je VIDEO ɔ, nɛ nyɛ susu sane bimi nɛ ɔ he.
-
Blema a, benɛ Mawu sɔmɔli komɛ bɔ mɔde kaa a maa gu amagahi a nɔ kɛ ja lɛ ɔ, mɛni je mi ba?
Ni komɛ guɔ amagahi a nɔ kɛ jaa Mawu, kɛ susumi kaa lɔ ɔ ma ha nɛ a hɛ mɛ kɛ su Mawu he. Se anɛ, jã peemi ma ha nɛ a hɛ mɛ kɛ su Mawu he niinɛ lo? Nyɛɛ kane 2 Mose 20:4-6 kɛ La 106:35, 36, nɛ nyɛ susu sane bimihi nɛ nyɛɛ se nɛ ɔmɛ a he:
-
Mɛni ji ní komɛ aloo foni komɛ nɛ o na kaa nihi kɛ tsuɔ ní ngɛ jami mi?
-
Kɛ Yehowa naa amagahi kɛ fonihi nɛ nihi kɛ tsuɔ ní ngɛ jami mi ɔ ha kɛɛ?
-
Anɛ o susu kaa e sa nɛ waa ngɔ amagahi loo fonihi kɛ tsu ní ngɛ wa jami mi lo? Mɛni he je nɛ o de jã a?
5. Ke wa jaa Yehowa pɛ ɔ, lɔ ɔ maa ye bua wɔ nɛ wa maa ye wa he ngɛ lakpa tsɔɔmihi a he
Moo hyɛ bɔ nɛ Yehowa nɛ wa ma ja ngɛ blɔ nɛ da nɔ ɔ maa ye bua wɔ nɛ waa ye wa he ngɛ lakpa tsɔɔmihi a he ha. Mo je VIDEO ɔ.
Nyɛɛ kane La 91:14 ɔ, nɛ nyɛ susu sane bimi nɛ ɔ he:
-
Mɛni nɛ Yehowa wo si kaa e maa pee ha nihi nɛ a suɔ lɛ nɛ a jaa lɛ pɛ ɔ?
6. Wa jaa Mawu ngɛ asafo mi kpehi a sisi
Wa laa, nɛ wa haa sane bimihi a heto ngɛ asafo mi kpe ɔmɛ a sisi. Wa peeɔ jã kɛ jeɔ Yehowa yi, nɛ e woɔ ni kpahi hu he wami. Nyɛɛ kane La 22:22 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
-
Ke nihi ha sane bimihi a heto ngɛ asafo mi kpehi a sisi ɔ, anɛ o bua jɔɔ lo?
-
Anɛ mo hu o suɔ kaa o ma dla o he konɛ o ha sane bimi ko heto lo?
7. Ke wa de ni kpahi níhi nɛ wa ngɛ kasee ɔ, Yehowa bua jɔɔ
Wa ma nyɛ maa gu blɔ slɔɔtohi a nɔ kɛ de nihi níhi nɛ wa ngɛ kasee ngɛ Baiblo ɔ mi ɔ. Nyɛɛ kane La 9:1 kɛ 34:1 ɔ, nɛ nyɛ susu sane bimi nɛ ɔ he:
-
Mɛni o kase ngɛ Baiblo ɔ mi nɛ́ o suɔ kaa o ma de nɔ ko?
NI KOMƐ DEƆ KE: “Mawu bua jɔ jami slɔɔto ɔmɛ tsuo a he, enɛ ɔ he ɔ, blɔ nɔ nɛ wa maa gu kɛ ja lɛ ɔ he hia we.”
-
Kɛ mo hu o susu kɛɛ?
NYA MWƆMI
Ke wa jaa wa Bɔlɔ ɔ pɛ, nɛ wa jeɔ e yi ngɛ asafo mi kpehi a sisi, nɛ wa deɔ ni kpahi níhi nɛ wa kaseɔ ngɛ e he ɔ, e bua jɔɔ wawɛɛ.
Mi Nylɔmi
-
Mɛni blɔ nɔ wa maa gu kɛ ja Mawu konɛ e kplɛɛ wa jami ɔ nɔ?
-
Mɛni he je nɛ e sa nɛ wa ja Yehowa pɛ ɔ?
-
Mɛni he je nɛ e sa nɛ waa kɛ nihi nɛ a suɔ kaa a maa sa Mawu hɛ mi ɔ nɛ bla kɛ ja lɛ ɔ?
NÍ KPAHI NƐ MAA YE BUA MO
Moo kane bɔ nɛ yo ko yu e he ngɛ wɔ jami he ha ngɛ munyu nɛ e yi ji “I Ja We Wɔ Hu” ɔ mi.
Moo hyɛ nɔ́ nɛ ma nyɛ maa ye bua mo konɛ o ha sane bimihi a heto ngɛ asafo mi kpehi a sisi.
E ngɛ mi kaa niheyo ko ná we lɛ gbɔjɔɔ kaa e maa ya asafo mi kpehi mohu lɛɛ, se moo hyɛ bɔ nɛ e náa kpe ɔmɛ nɛ e yaa a he se ha.
Nihi fuu susu kaa klɔɔsu ji nɔ́ nɛ a kɛ kadiɔ Kristofohi a jami, se anɛ e sa kaa waa kɛ klɔɔsu nɛ tsu ní ngɛ wa jami mi lo?
“Mɛni He Je Nɛ Yehowa Odasefohi Kɛ Klɔɔsu Tsu We Ní Ngɛ A Jami Mi ɔ?” (Munyu nɛ ɔ ngɛ Intanɛti ɔ nɔ)
a Wa ma susu munyuyi nɛ ɔmɛ a he ngɛ Ní Kasemi 40-43 ɔ mi.
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
