Calu ma waneno i ponji m’ukadhu, dini ceke ngo re ma foyo i Mungu. Ento ecopere niworo Mungu mwa i ayi ma nyayu anyong’a i iye. Dong’, “ayi ma leng’ mi timo ire [kunoke, dini]” ma foyo iye tie ma kani? (Yakobo 1:27, korolembe mi there) Wakenen lembe ma Biblia ubeponjo.

1. Wacikara nilubo ang’o pi ning’eyo ayi m’atira mi woro Mungu?

Pi ning’eyo ayi m’atira mi woro Mungu, wacikara nilubo kende kende gin ma Biblia ubeponjo. Yesu uyero ni Mungu kumae: “Lembe peri en e lemandha.” (Yohana 17:17) Dini moko gitiyo ngo ku lemandha ma nwang’ere i Biblia ma tie Lembe pa Mungu man m’eyuyo i wiye en. Gilund gitiyo migi ku ponji man lembsuru mi dhanu. Ento Yehova maru ngo dhanu ‘m’ubekwero niworo cik pare.’ (Som Marko 7:9.) Re ka wabeworo Mungu tap tap nimakere ku lembe ma Biblia ubekwayu, wabinyayu mutoro i iye.

2. Wacikara niworo Yehova nenedi?

Yehova re m’utie Jacwic mwa, pieno eromo ya wamiyara ire man wawore dak wi dak. (Lembanyutha 4:11) Eno nyutho nia wacikara nimare ku cwinywa ceke, man nitimo thier kunoke nirwo i bang’e kende. Wacikara ngo nitiyo kud ayi gin m’acwiya, kadi cal mi piny kunoke pa ng’ati moko ci pi niwore.​—Som Isaya 42:8.

Thier ma wabetimo ni Yehova kunoke woro ma wabewore ko ucikere nibedo i ayi ‘ma leng’ man m’eyiyo.’ (Jurumi 12:1) Niwacu, wacikara niworo cik pare i kwo mwa. Ku lapor, ju m’umaru Yehova gicikiri nimaru man niworo bende cik m’emiyo iwi gamiri. Bende, gicikiri niuro timo ceke ma reco, calu ve madhu taba, nyamu mairungi, tiyo rac ku drog kunoke dawa ma merojo, man tiyo rac ku kong’o. a

3. Pirang’o wacikara niworo Yehova karacelo kud umego ku nyimego mange?

Coko ma wabed watimo kubang’ yenga, bemiyo iwa kaka mi ‘paku Yehova . . . i cokiri.’ (Zaburi 111:1, 2) Yo acel ma watimo ko kumeno utie nwang’u wabewero wer mi pak ni Mungu mwa. (Som Zaburi 104:33.) Yehova ubekwayu nia wabed wacidh i coko mwa ceke, pilembe emaruwa man eng’eyo nia cokone bikonyowa kara wakwo kud anyong’a rondo ku rondo. I cokone kuca, watielo cwiny jumange man gin bende gitielo cwinywa.

 MED NYANG’ PERI

4. Wacikara ngo nitiyo kud ayi gin m’acwiya ka waberwo ni Mungu

5. Ka wabetimo ni Yehova kende, wabibedo agonya kud i ponji man paru mi vupo

 6. Ukwayu wawor Mungu karacelo i coko mwa

Wapaku Yehova man wateng’ara i kindwa nwang’u wabewer karacelo man wabedwoko wang’ penji i coko mwa. Som Zaburi 22:22, man i ng’eye wuwec iwi penji m’ulubo e:

• Kan ibewinjo kite m’umego ku nyimego gibedwoko ko wang’ penji i coko mwa, nyo lembene benyeng’i de?

• Nyo in de iromo yikiri ngo pi nidwoko wang’ penji i coko kadok wang’ aceli?

7. Anyong’a nego Yehova ka wabenyutho lembe ma wabeponjo ni jumange bende

Watie ku kaka dupa dit ma waromo nyutho ko lembe ma waponjo i Biblia ni jumange. Som Zaburi 9:1 man 34:1, man i ng’eye wuwec iwi penji m’ulubo e:

• Kenyuth lembe moko m’idaru ponjo i Biblia m’iromo maru ikor pire ni ng’atu mange bende.

 I ADUNDO

Kara wanyay mutoro i Jacwic mwa, wacikara niwore kunoke nitimo ire kende, wacikara nipake karacelo kud umego ku nyimego mange i coko mwa, man kwayu wabed wanyuth gin ma wabeponjo ni jumange bende.

Penji mi poyowic

• Wacikara nilubo ang’o pi ning’eyo ayi m’atira mi woro Mungu?

• Pirang’o wacikara niworo Yehova kende?

• Pirang’o wacikara niworo Yehova karacelo ku jumange ma gibemito bende nifoyo iye?