Iko an kumana a kan cogo min na kalansen tɛmɛnnen kɔnɔ, diinɛw bɛɛ ko man di Ala ye. Nka an bɛ se ka an Dabaga bato cogo la min ka di a ye. O la, “Ala sira taama” cogo walima diinɛ min ka di a ye, o ye jumɛn ye? (Yakuba 1:27) An k’a lajɛ Bibulu bɛ min fɔ o ko la.

1. An ka bato ka kan ka sinsin mun de kan?

An ka bato ka kan ka sinsin Bibulu de kan. Yesu y’a fɔ Ala ye ko: “I ka kuma ye tiɲɛ ye.” (Yuhana 17:17) Diinɛ dɔw ka sira tɛ tiɲɛ kumaw la minnu bɛ Ala ka Kuma kɔnɔ, ni o ye Bibulu ye. U bɛ Hadamadenw ka kalansiraw ani u ka laadalakow bila o tiɲɛ kumaw nɔ na. Jehova tɛ nisɔndiya mɔgɔw kɔrɔ minnu bɛ “ban Ala ka ci fɔlenw ma”. (Marka 7:9 kalan.) Nka an bɛ Ala nisɔndiya ni an bɛ an sinsin Bibulu kan ani ka a laadilikanw waleya.

2. An ka kan ka Jehova bato cogo di?

Ikomi Jehova de ye an Dabaga ye, ale kelenpe dɔrɔn de ka kan ni batoli ye. (Jirali 4:11) O kɔrɔ ye ko, an ka kan ka ale de kanu ani ka a kelenpe bato k’a sɔrɔ an man baara kɛ ni boli suguya si walima ja fosi ye.—Esayi 42:8 kalan.

An ka bato ka kan ka kɛ bato “senuma” ye, min “ka di” Jehova ye. (Romɛkaw 12:1) O kɔrɔ ye ko, an ka kan ka ɲɛnamaya kɛ ka kɛɲɛ ni a ka sariyaw ye jogo ta fan fɛ. Misali la, Jehova ye sariya minnu sigi furu ko la, minnu b’a kanu, o sariyaw ko ka di olu ye ani u bɛ taama ka kɛɲɛ ni o sariyaw ye. Wa u b’u yɛrɛ tanga kɛwale juguw ma i n’a fɔ sigarɛtimin, dɔrɔguta walima ka dɔlɔ a min k’a dama tɛmɛn.

3. Mun na an ka kan ka to ka fara an krecɛn ɲɔgɔnw kan walasa ka Jehova bato?

An bɛ to ka lajɛ minnu kɛ dɔgɔkun o dɔgɔkun, olu bɛ cogoya di an ma ka “barika da Matigi [Jehova] ye”, fɔcogo wɛrɛ la, ka Jehova tanu “jamaba cɛma.” (Zaburu 111:1, 2) An b’o kɛ sira minnu fɛ, olu dɔ ye ka tanuli dɔnkiliw da Ala ye. (Zaburu 104:33 kalan.) Jehova b’a ɲini an fɛ an ka lajɛw taali matarafa bawo a bɛ an kanu ani a b’a dɔn ko lajɛw bɛna an dɛmɛ an ka ɲɛnamaya kɛ nisɔndiya la fo badaa. Lajɛw la, an bɛ dusu don tɔw kɔnɔ, wa tɔw fana bɛ dusu don an kɔnɔ.

 DƆ FARA I KA DƆNNIYA KAN

4. An man kan ka baara kɛ ni ja dɛsɛlenw ye walasa ka Ala bato

5. Jehova kelenpe batoli bɛ an hɔrɔnya ka bɔ hakilina nkalonmaw la

 6. An bɛ Ala bato jɛkulu ka lajɛw la

An bɛ Jehova tanu ani ka dusu don ɲɔgɔn kɔnɔ an kɛtɔ ka dɔnkiliw da ani ka jaabiw di jɛkulu ka lajɛw la. Zaburu 22:23 kalan, o kɔ aw ka baro kɛ nin ɲininkaliw kan:

• I bɛ to ka jaabi minnu mɛn lajɛw la yala olu ka di i ye wa?

• Yala i b’a fɛ k’i labɛn ka jaabi dɔ di wa?

7. An bɛ ka fɛn minnu kalan ni an bɛ olu kofɔ mɔgɔ wɛrɛw ye, o bɛ Jehova nisɔndiya

Sira caman bɛ yen minnu fɛ an bɛ se ka Bibulu tiɲɛw kofɔ mɔgɔ wɛrɛw ye. Zaburuw 9:2 ani 34:2 kalan, o kɔ aw ka baro kɛ nin ɲininkali kan:

• I ye fɛn minnu kalan Bibulu kɔnɔ, i b’a fɛ ka olu dɔ la jumɛn de kofɔ mɔgɔ wɛrɛ ye?

 BAKURUBAFƆLI

An ka bato bɛ diya an Dabaga ye ni an bɛ ale kelenpe bato, ka a tanu jɛkulu ka lajɛw la ani an bɛ ka fɛn minnu kalan ni an bɛ olu fɔ mɔgɔ wɛrɛw ye.

Seginnkanni

• Ala b’a fɛ an k’a bato cogo min na, a bɛ o fɔ an ye yɔrɔ jumɛn?

• Mun na an ka kan ka Jehova kelenpe de bato?

• Mun na an ka kan ka to ka fara mɔgɔ wɛrɛw kan minnu b’a fɛ k’u kodiya Ala ye walasa k’a bato?