LONGESO 14
Kuchi Uwayilo Wetu Muuhasa Kuvwisa Zambi Kuwaha?
Ngwe chize twashimutwina ha longeso liapalika, hi uwayilo weswe ko wakuvwisa Zambi kuwaha. Alioze, mutuhasa kuwayila Sakatanga wetu kulita ni chize iye akuzanga. “Uwayilo” hanji ngwetu yingeleja yika yakuvwisa Zambi kuwaha? (Tiangu 1:27, MW 1991) Tala yize Mbimbiliya yakulongesa.
1. Uwayilo wamwenemwene halihi watamba kukatuka?
Uwayilo wamwenemwene watamba kukatuka mu Mbimbiliya. Yesu kambile kuli Zambi ngwenyi: “Liji lie we umwenemwene.” (Yoano 17:17) Mayingeleja amwe kakulengulula umwenemwene wa mu Liji lia Zambi, Mbimbiliya. Kakulelesa malongeso amwenemwene ni kulemesa manyonga ni ndako ja atu. Yehova keshi kuwahilila ni waze ‘akulituna Shimbi’ jenyi. (Tanga Marku 7:9.) Alioze kakuwahilila muze uwayilo wetu wakulita ni shimbi ja mu Mbimbiliya.
2. Kuchi twatamba kuwayila Zambi?
Twatamba kuwayila wika Yehova mumu iye Sakatanga wetu. (Usolwelo 4:11) Chino chinalumbunuka ngwo, twatamba kumuzanga ni kumuwayila chakuhona kuzachisa tuponya hanji yizulie.—Tanga Izaia 42:8.
Uwayilo wetu watamba kupwa “usandu, wa kupemena chikolo” kuli Yehova. (A-Roma 12:1) Chino chinalumbunuka ngwo twatamba kwononokena shimbi jenyi. Chakutalilaho, atu waze azanga Yehova kakwononokena shimbi jenyi hakutwala ku umbachiso. Kakwehuka ndako ja luchisa ngwe, kushipa makanya, kuzachisa yimwe yitumbo hanji yuma yisasu yize kaahele ku shipitali. a
3. Mumu liaka twatamba kuwayila Yehova hamuwika ni mandumbu jetu?
Kukunguluka chetu cha hita poso chakutukwasa ‘kuhalisa Yehova . . . mu chikungulwila.’ (Samu 111:1, 2) Jila yimwe yakuchilingilamo, yili kwimbila Zambi miaso. (Tanga Samu 104:33.) Yehova kakutwita hanga tupwe ni kukunguluka mumu kakutuzanga. Chikwo nawa, kananyingika ngwenyi kukunguluka muchitukwasa kuwahilila ku mwono ndo ku miaka ya mutolo. Muze twakukunguluka, twakulitakamisa umwe ni mukwo.
NYINGIKA NAWA
Nyingika mumu liaka Yehova keshi kutayiza hanga atu azachise tuponya hanji yizulie mu uwayilo. Lilongese jila yalita yakuwayila Zambi.
4. Kutwatambile kuzachisa tuponya hanji yizulie mu uwayilo wetu
Kuchi tunanyingika ngwetu nyi twachilinga Zambi mapihilila? Tala CHINEMA, mba nushimutwine chihula chinahateho.
-
Yika yalingiwile kuli tuvumbi twa Zambi ku mashimbu a kunyima muze esekele kuzachisa tuponya ha kuwayila Zambi?
Atu amwe kakuzachisa tuponya hanji yizulie mu uwayilo wo mumu kakunyonga ngwe kulinga chocho muchakundamisa kuli Zambi. Shina chamwenemwene lume chino chakwakundamisa kuli iye? Tanga Kutuhuka 20:4-6 ni Samu 106:35, 36, mba nushimutwine yihula yino:
-
Tuponya aka hanji yuma yika yize wakumona atu mazachisa mu uwayilo wo?
-
Kuchi Yehova akwivwa ha chikuma cha kuzachisa tuponya hanji yizulie?
-
Kuchi wakwivwa ha chikuma cha kuzachisa tuponya hanji yizulie?
5. Nyi twawayila wika Yehova, mututusuka ku malongeso a mahuza
Tala chize kuwayila wika Yehova, muchihasa kututusula ku malongeso a mahuza. Tala CHINEMA.
Tanga Samu 91:14, mba nushimutwine chihula chino:
-
Yika Yehova analakenya kutulingila nyi twasolola ngwetu twakumuzanga ni kuwayila wika iye?
6. Twakuwayila Yehova ha kukunguluka cha chikungulwila
Ha kukunguluka twakuhalisa Yehova ni kulikolweza umwe ni mukwo kupalikila mu miaso ni makumbululo jetu. Tanga Samu 22:22, mba nushimutwine yihula yino:
-
Shina hiunevu kama limwe kumbululo ha kukunguluka lize wazangile chinji?
-
Shina unazange kulilulieka hanga ni yena ukakumbulule?
7. Yehova kakuwahilila muze twakulweza akwetu yuma yize tunalilongesa
Kuli majila anji akulwezelamo akwetu umwenemwene wa mu Mbimbiliya. Tanga Samu 9:1 ni 34:1, mba nushimutwine chihula chino:
-
Chuma chika walilongesa mu Mbimbiliya chize unazange kulweza akwenu?
ATU AMWE KAKWAMBA NGWO: “Mutu kechi kuhasa kuvwisa Zambi kuwaha.”
-
Mba ena kuchi wakunyonga?
YIZE WALILONGESA
Twakuvwisa Sakatanga wetu kuwaha ha kuwayila wika iye, ha kumuhalisa ha kukunguluka, ni muze twakwambulwila akwetu yuma yize tunalilongesa.
Kuhitulula
-
Kuchi mutuhasa kulilongesa kuwayila Zambi mu jila yalita?
-
Mumu liaka twatamba kuwayila wika Yehova?
-
Mumu liaka twatamba kuwayila Yehova hamuwika ni mandumbu jetu?
HENGWOLA NAWA
Tanga lusango wakwamba ngwo, “Chishi Nawa Kapinji ka Tuponya” hanga umone chize umwe pwo atusukile ku uwayilo wa tuponya.
“Mbimbiliya Yakwalumuna Mwono wa Atu” (Kaposhi wa Kutalila 1 wa Julho, 2011)
Tala yize muyihasa kukukwasa kuhana makumbululo ha kukunguluka.
“Halisa Yehova mu Chikungulwila” (Kaposhi wa Kutalila wa Janeiro 2019)
Tala chize kukunguluka chayukishile umwe mukweze chipwe ngwe chapwile chikalu kuli iye kukungulwoka.
Atu anji kakutayiza ngwo kulusu yakumanyinako uwayilo wa akwa-Kristu, shina twatamba kuyizachisa mu uwayilo wetu?
“Mumu Liaka Yela ja Yehova Keshi Kuzachisa Kulusu mu uwayilo wo?” (Lusango wa ha internet)
a Yikuma yino mutukayishimutwina ha malongeso akwo kulutwe.
