Lee mǐ ko ɖɔ gbɔn ɖò nǔkplɔnkplɔn e wá yì é mɛ é ɔ, sinsɛn lɛ bǐ nyɔ́ Mawu nukúnmɛ ǎ. É ɖò mɔ̌ có, mǐ sixu sɛn Gbɛɖotɔ́ mǐtɔn ɖò ali ɖé nu b’ɛ na nyɔ́ nukún tɔn mɛ. “Sinsɛn” tɛ ka nɔ nyɔ́ nukún tɔn mɛ? (Jaki 1:27) Mǐ ni gbéjé nǔ e Biblu kplɔ́n mɛ é kpɔ́n.

1. Etɛ jí Mawusinsɛn mǐtɔn ka ɖó na jinjɔn?

Mawusinsɛn mǐtɔn ɖó na jinjɔn Biblu jí. Jezu ɖɔ nú Mawu ɖɔ: “Xó towe . . . nyí nǔgbo.” (Jaan 17:17) Sinsɛn ɖé lɛ nɔ wɔn ya nú nǔgbo e ɖò Xó Mawu tɔn Biblu, ee é sɔ́ d’ayi mɛ nú mɛ lɛ bɔ ye wlán é mɛ é. Ye nɔ sɔ́ nǔkplɔnmɛ kpo hwɛndomɛnú kpo gbɛtɔ́ tɔn lɛ dó ɖyɔ nǔgbo ɔ na. Amɔ̌, mɛ ɖěɖee “nɔ jó Mawusɛ́n lɛ dó” lɛ é sín nǔ nɔ nyɔ́ Jehovah nukúnmɛ ǎ. (Xà Maki 7:9.) Alɔ ɖevo mɛ ɔ, enyi mǐ tɛ́dó Biblu ɔ wu bo xwedó wěɖexámɛ tɔn lɛ ɔ, é nɔ hun xomɛ n’i.

2. Nɛ̌ mǐ ka ɖó na sɛn Jehovah gbɔn?

Mǐ ɖó na sɛn Jehovah ɖokponɔ géé, ɖó é wɛ nyí Gbɛɖotɔ́ mǐtɔn. (Nǔɖexlɛ́mɛ 4:11) Tinmɛ enɛ tɔn wɛ nyí ɖɔ mǐ ɖó na yí wǎn n’i bo lɛ́ sɛn éɖokponɔ géé, ma zán bocyɔ, ɖiɖe, alǒ wuntun ɖebǔ.—Xà Ezayíi 42:8.

Jehovah sinsɛn mǐtɔn ɖó na “mɛ́,” b’ɛ na “yí gbè na.” (Hlɔmanu lɛ 12:1, nwt) Tinmɛ enɛ tɔn wɛ nyí ɖɔ mǐ ɖó na zán gbɛ̀ sɔgbe xá nǔgbododó walɔ ɖagbe tɔn Jehovah tɔn lɛ. Ði kpɔ́ndéwú ɔ, mɛ ɖěɖee yí wǎn nú Jehovah lɛ é nɔ yí wǎn nú nǔgbododó tɔn e kúnkplá alɔwliwli lɛ é bo nɔ xwedó. Gɔ́ na ɔ, ye nɔ nyi alɔ nú nǔwalɔ ɖěɖee nɔ wà nǔ dó mɛ wu lɛ é, ɖi gěe nunu, azɔ zinzán nyi dò, alǒ ahannumu. a

3. Etɛwu mǐ ka ɖó na gɔ́ nú nǔɖitɔ́ hatɔ́ mǐtɔn lɛ bo sɛn Jehovah?

Kplé e mǐ nɔ bló ɖò aklunɔzán gbla ɖokpo ɖokpo mɛ lɛ é nɔ hun ali nú mǐ bɔ mǐ nɔ “kpa Mawu Mavɔmavɔ . . . ɖò kplékplé mɛ e nɔ sɛn ɛ lɛ tɔn mɛ.” (Ðɛhan 111:1, 2) Ali e nu mǐ nɔ wà mɔ̌ ɖè é ɖokpo wɛ nyí ɖɔ mǐ nɔ jihan dó kpa Mawu. (Xà Ðɛhan 104:33.) Jehovah byɔ mǐ ɖɔ mǐ ni nɔ yì kplé lɛ ɖó é yí wǎn nú mǐ, bo tuùn ɖɔ ye na d’alɔ mǐ bɔ mǐ na ɖu gbɛ̀ víví kaka sɔyi. Ðò kplé lɛ jí ɔ, mǐ nɔ dó wusyɛn lanmɛ nú mɛ ɖevo lɛ bɔ ye lɔ nɔ dó wusyɛn lanmɛ nú mǐ.

 BA DÒ NÚ NǓ D’EJI

4. Mǐ ɖó na nɔ zán ɖiɖe lɛ dó sɛn Mawu ǎ

5. Jehovah ɖokponɔ géé sinsɛn nɔ tún kan nú mǐ sín linlin masɔgbe lɛ sí

 6. Mǐ nɔ sɛn Mawu ɖò kplé agun tɔn lɛ jí

Mǐ nɔ kpa Jehovah bo nɔ lɛ́ hɛn mǐɖée lɛ lidǒ gbɔn han jiji kpo xósin nina ɖò kplé agun tɔn lɛ jí kpo gblamɛ. Xà Ðɛhan 22:23, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• A ka ko ɖu tóɖiɖó xósin lɛ ɖò kplé lɛ jí sín vivǐ kpɔ́n à?

• A ka ba na sɔnǔ bá na xósin ɖé à?

7. Nú mǐ nɔ má nǔ e mǐ nɔ kplɔ́n lɛ é xá mɛ ɖevo lɛ ɔ, xomɛ nɔ hun Jehovah

Ali gegě nu wɛ mǐ sixu má nǔgbo Biblu tɔn lɛ xá mɛ ɖevo lɛ ɖè. Xà Ðɛhan 9:2 kpo 34:2 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛ a ka kplɔ́n ɖò Biblu mɛ bo jló na ɖɔ xó tɔn nú mɛɖé?

 ETƐ LƐ A KA KPLƆ́N?

Nú mǐ nɔ sɛn Gbɛɖotɔ́ mǐtɔn ɖokponɔ géé, nɔ kpa ɛ ɖò kplé agun tɔn lɛ jí, bo nɔ lɛ́ má nǔ e mǐ kplɔ́n lɛ é xá mɛ ɖevo lɛ ɔ, mǐ nɔ hɛn xomɛ tɔn hun.

Vɔ̌gbɔnji

• Nɛ̌ mǐ ka sixu wà gbɔn bo tuùn lee Mawu ba ɖɔ mǐ ni sɛn emi gbɔn é?

• Etɛwu mǐ ka ɖó na sɛn Jehovah ɖokponɔ géé?

• Etɛwu mǐ ka ɖó na gɔ́ nú mɛ ɖěɖee nɔ ba na hɛn xomɛ Mawu tɔn hun lɛ é bo sɛn ɛ?