Yɛ pələi gu gaa la ɲaakwɛlɛi 13 hu, kalan gəlee hwəi nwɛli kaa Yálá ɓa. Pələi ma gaa la tii, gwa pɛli gu matoo a kpaalə ta yii nwɛli a too ma. “ Yálá kɔlɔn bələ, yili mukulaa ɓaa Yálá ɓatoo pələ yii maahɛɠɛɛ ɉaŋaa, ” ya ɓaa lə ? (Zaakə 1:27) Gaa yii Biblə a galan.

1. Lə ɓə maanɛɛ gu wɔ Yálá ɓatoɔ kɔwɔ ə kɛ a vilɛnŋaa mɛi ?

Maanɛɛ gu wɔ Yálá ɓatoo kɔwɔ ə kɛ a vilɛnŋaa Biblə mɛi. Zesu ə mo Yálá ɓa, yɛ ma : “ Ə́ laawoo kaa a teɲa ” (Ɉaan 17:17). Deɲa gaa Yálá Lawoo hu, kalan daɠaa daa nɛɛ laa, daa hwilɛn nukanŋaa di wɔ kalan gɛ pələɠaa pulu da di huwula mɛniɠaa. Kəlaa nuai daa “ Yálá ŋɔ tɔ́n lɛɛ laa, ” di wɛli ho Zehova ɓa (Markə 7:9 ɓo). Kəlaa gwa pɛli gu Zehova kwɛinɛɛ, gwa kɛi Yálá Lawoo ɓo ə lɛɛ guɔ ŋɔ ton-nwooɠaa pɔ tuwɔ ɓo.

2. Maanɛɛ guɔ Zehova ɓatoo ləi ?

Zehova yaa tɔnɔn gbən ɓə maanɛɛ gu matoo, maahɔlɔɓo, ya ɓə ɓaa a gu pɛlimun (Kulɔ ponoŋa hɛɓɛ 4:11). Yili mukula ɓaa maanɛɛ gu nwɛlilakɛ ə lɛɛ gu yaa tɔnɔn gbən ɓatoo, gu ho kwɛli hwilɛn haalə ɓa ə lɛɛ maanininŋaa. (Esai 42:8 ɓo).

Maanɛɛ gu wɔ Yálá ɓatoo pələ ə kɛ a “ maahəɠɛɛ, nwɛli ə ɓo ” Zehova ɓa (Rɔmə 12:1). Yili mukulaa ɓaa maanɛɛ guɔ lɛɛ ŋɔ ton-nwooɠaa mu. Gwa gɔɔmaa həɠə, nuai Zehova wɛli kaa diɛ, ŋɔ ton-nwooɠaai vilɛnŋaa húlu yii ɓoɔ ɓa, da nwɛlilakɛ, diɛ bɔ tuwɔ ɓo. Ə lɛɛ tuwɔ pələɠaa di ho lɛlɛ li guɔ, da nɛɛ la, yɛ pələi sikɛti tɛɛ kaa la, ɉalangbala tɛɛ, lɔɔ kɛnɛ kpəlɛɛ. a

3. Lə mɛni ɓa maanɛɛ guɔ Zehova ɓatoo, gwa gu ɓəlaa kilistalea ?

Gu wɔ ŋaakpɔnŋaa gwa kɛ gɛi lɔwɔ kəlee, a gɛ gu Zehova “ laa tɛ […] ɲaakpɔn ɉu ” (Maatɛnɛ 111:1, 2). Zehova laa tɛ pələ gu yəi ta ɓaa, guɔ hwələ to ma (Maatɛnɛ 104:33 ɓo). Zehova a kɛ guɔ guɔ pa ŋaakpɔnŋaa ɓa maahɔlɔɓo gu wɛli kaa ma ə lɛɛ ə gɔlɔn yɛ diɛ gwa kɛi pa ŋaakpɔnŋaa ɓa, yili kaa pai kpɔnmaa tɛɛ gu pɔ gu yiipoo yii kpɛɛ ho ma hɔlɔɓo. Gwa kɛi pa ŋaakpɔnŋaa ɓa, gwa nu takpɛliɠaa hwaŋalɔ, diɛ kpɛliman di gu hwaŋalɔ.

 Ə́ WƆ MƐNIKƆLƆNŊAA TA PƐLƐ MA

4. Maahonɛɛli, guɔ Zehova ɓatoo a maanininŋaa

5. Gwa kɛi Zehova yaa tɔnɔn gbən ɓatoo, yili a gu maakwea kiliŋahiɛɠaa diɛ, diɛi di hwa kulɔ Biblə hu

 6. Gwa Yálá ɓatoo gu wɔ ŋaakpɔnŋaa ɓa

Gwa kɛi wələ too gu wɔ ŋaakpɔnŋaa ɓa, ə lɛɛ guɔ woopulupənəɠaa tɛɛ, gwa Zehova maatɛnɛɛ ə lɛɛ guɔ gu kee ni hwaŋalɔ. Maatɛnɛ 22:23 [22:22, NWT] ɓo, ə lɛɛ ka lono kɛ gɛɛmaalənŋaa ŋɛi mɛi :

• Woopulupənəɠaai ya kɛ mɛn ɉii ɲaakpɔnŋaa ɓa, a kɛ ə́ kwəinɛɛ ?

• Nwoopulupənəɠaai da kɛ dɛɛi, naa hwɛli kaa yɛ́ ə́i kpɔɔ kpɛtɛ ə́ da tɛɛ ?

7. Mɛniɠaa gwaa maakwɛli, gwa kɛi nɛ nu takpɛliɠaa diɛ, yili a Zehova kwəinɛɛ

Gwa pɛli gu Biblə ŋɔ teɲaɠaa lɛɛ nu takpɛliɠaa diɛ a kpaalə tamaa Maatɛnɛ 9:2 [9:1, NWT] da 34:2 [34:1, NWT] ɓo, ə lɛɛ kaa lono kɛ gɛɛmaalən ŋɛi mɛi :

• Mɛni ləkɛɛɠaa ɓə yaa maakwɛli Biblə hu yii naawɛli kaa pai kɛi yɛ́ ə́ mo nu takpɛli diɛ ?

 YII GU GALAN

Gwa kɛi Zehova yaa tɔnɔ gbən ɓatoo, gwa kɛi maatɛnɛ ŋaakpɔn gɛ pɛlɛɠaa mu, ə lɛɛ yii gu kaa maakwɛlii, gwa kɛi mo nu takpɛliɠaa diɛ, gwa Zehova kwəinɛɛ.

Nɛɛ ə́ kili pɔ

• Pələi gwa pɛli Yálá ɓatoo la, yɛ bələi gaa la bɔ, gwa yili kɔlɔn ləi ?

• Lə mɛni ɓa Zehova ya tɔnɔ gbən ɓə maanɛɛ gu matoo ?

• Nuai di kaa bɔ di Yálá liiɓa kɛ, lə mɛni ɓa maanɛɛ gwa diɛ ni guɔ Yálá ɓatoo gee ɓa ?