Nk’okwo tuboine omwisomo elirabireho, ti dini zona ezili kwikilizibwa omu maisho ga Katonda. Kyonkai, nitubasa kwegashaniza aha mutonzi waitu omu ngeli elikumushemelera. Ni ‘mwegashanizoki’ anga ni diniki ey’alikwikiliza? (Yakobo 1:27, ebishoborozo ebili aha nsi) Enjuza ebintu eby’Ebibulia elikwegesa.

1. Omwegashanizo gwaitu nigwetagwa kwebemberwaki?

Omwegashanizo gwaitu nigwetagwa kwebemberwa Ebibulia. Yesu akagambira Katonda ati: “Ekigambo kyawe gaba mazima.” (Yohana 17:17) Edini ezindi tizilikwetaho amazima agali omu Bibulia, Ekigambo kya Katonda ekyebembeirwe omwoyogwe. Shana, nibahondera emyegeso n’entwaza za abantu. Kyonkai Yehova talikushemelerwa balinya ‘abalikwanga amateka ga Katonda.’ (Shoma Mariko 7:9.) Kyonkai, nitukora omwoyogwe gushemelerwe orwo tulikwekwata Ebibulia n’okuhondera obuhanuzi bwayo.

2. Nitwetagwa kwegashaniza tutai ahali Yehova?

Nitwetagwa kwegashaniza ahali Yehova wenene wenkai aha rw’enshonga niwe yatutonzire. (Okushurulirwa 4:11) Ekyo nikimanyisa nk’okwo nitwetagwa kumugonza n’okwegashaniza ali wenene wenkai, obu takozesa bishushane, emifano, anga epicha.—Shoma Isaya 42:8.

Omwegashanizo gwaitu nigwetagwa kuba “gutakatifu mara oguli kwikilizibwa” ahali Yehova. (Abaroma 12:1, NWT) Ekyo nikimanyisa nk’okwo nitwetagwa kugira emyegendesheleze mirungi omu mikalire yaitu. Obulebero ni bwobu, balinya abali kugonza Yehova nibagonza n’okuhondera amatekage agakwete aha bushwere. Kandi, nibetanga emimanyilire etalikugasha nk’okunywa esigara, kunywa madawa ya kulevya anga kunywa amarwa kushagulirana. *

3. Kubaki nitwetagwa kwegashaniza ahali Yehova twemire hamoi n’abali kumwegashanizaho?

Enkiiko zaitu ezo tulikukora buli wiki nizituha akashango ako ‘okusingiza Yehova omu nteko.’ (Ezaburi 111:1, 2) Engeli emoi eyokusingiza Katonda nikumuhoyera empohoya ezo kumuhaisiliza. (Shoma Ezaburi 104:33.) Yehova nayenda tukiike enkiiko aha rw’enshonga natwenda kandi namanya okwo ziratujuna tushemelerwe emikalire erai lyona. Orwo tulikukiika enkiiko nitutekwamu omwoyo, kandi naichwe nitutamu omwoyo abandi.

 MANYURUZA

4. Titulikwetagwa kukozesa bishushane omu myegashanizo yaitu

5. Katurayegashaniza ahali Yehova wenkai turagira obwegerere obw’okuruga omu myegashanizo y’ebishuba

 6. Nitwegashaniza ahali Katonda kuraba omu nkiiko z’enteko

Nituhaisiliza Yehova n’okutekanganamu omwoyo omu kuhoya n’omu kuhorora omu nkiiko zaitu. Shoma Ezaburi 22:22, mushube mufumoreho ebibazo ebi:

• Isi, noshemelerwa kuhuliliza empororo z’abandi omu nkiiko zaitu?

• Isi, naiwe wakwenda kwetekateka obase kuhorora?

7. Yehova nashemelerwa orwo tulikugambira abandi ebintu ebyo tulikwega

Aliho emihanda mingi eyo twakubasa kukozesa kugambira abandi amazima g’Ebibulia. Shoma Ezaburi 9:1 na 34:1, mushube mufumoreho ekibazo eki:

• Nikintuki eky’oyegire omu Bibulia ekyo wakwenda kugambira abantu abandi?

 OMUBIGUFI

Nitushemeleza omu tonzi waitu omu kwegashaniza ahali wenene wenkai, omu kumuhaisiliza omu nkiiko zaitu n’okugambira abandi ebintu ebyo tulikwega.

Isi ebi wakubihorora otai?

• Nitubasa tutai kwega engeli ey’okwegashaniza ahali Katonda omuhanda ogwo alikwikiliza?

• Kubaki nitwetagwa kwegashaniza ahali Yehova wenkai?

• Kubaki nitwetagwa kwegashaniza ahali Katonda twemire hamoi n’abandi abalikwenda kumushemeleza?