EHONGWA 14
Matu yenene vi okurikotamena ku Mukuru momuano mbu tjata ku ye?
Otja tji twe rihongere mehongwa nda kapita, kazongamburiro azehe nḓe tjata ku Mukuru. Nungwari, matu yenene okurikotamena kOmuute wetu momuano mbu mau mu yorokisa. Okurira ‘omukarere’ wa Mukuru, poo okukara nongamburiro mu ye ku heya tjike? (Jakobus 1:27) Tara ku imbi Ombeibela mbi honga.
1. Omerikotameno wetu maye sokuzikamena ku ye?
Omerikotameno wetu maye sokuzikamenena kOmbeibela. Jesus wa tja ku Mukuru: “Embo roye oro ouatjiri.” (Johanes 17:17) Ozongamburiro tjiva kaze kongorere ouatjiri mbu ri mEmbo ra Mukuru, Ombeibela. Owo ve pingenisa ouatjiri mbwo ku nomahongero wovandu nozombazu. Posi ya Jehova ke nonyuṋe na imba ‘mbe nakaura etwako re.’ (Lesa Markus 7:9.) Tu yorokisa omutima wa Jehova indu tji twa ungurisa Ombeibela nokukongorera omarakiza we.
2. Omomuano uṋe mu matu sokurikotamena ku Jehova?
Eṱe matu sokurikotamena ku Jehova erike, mena rokutja eye Omuute wetu. (Omavandururiro 4:11) Ihi matji hee kutja matu sokumusuvera nokurikotamena ku ye erike, nokuhinakuungurisa oviserekarera.—Lesa Jesaja 42:8.
Omerikotameno wetu ku Jehova maye sokurira ‘omayapuke, Eye me nonyuṋe.’ (Ovaroma 12:1) Ihi matji hee kutja matu sokukara nonḓuviro komatwako we. Otjotjihorera, imba mba suvera Jehova ve suvera nokukongorera ozoveta ze ohunga norukupo. Owo ve nakaura omaungurisiro womaka poo ovipurukise poo omaungurisiro omavi wotjikariha. a
3. Ongwaye tji matu sokurikotamena ku Jehova pu novakambure ovakwetu?
Ozombongarero nḓu tu kara na zo otjivike atjihe ze tjita kutja tu ‘tange Muhona mombongo.’ (Epsalme 111:1, 2) Omuano umwe mu matu yenene okutjita nao omokumutanga momaimburiro. (Lesa Epsalme 104:33.) Jehova u tu ningira okuyenda kozombongarero zombongo, mena rokutja we tu suvera nu u tjiwa kutja maze tu vatere okukayorokera ehupo nga aruhe. Pozombongarero zombongo eṱe tu yanḓiparisa varwe nowo ve tu yanḓiparisa.
KONḒONONA OUKOTO
Konḓonona kutja ongwaye Jehova tje ha yakura omaungurisiro woviserekarera momerikotameneno. Rihonga omiano ominahepero mu matu yenene okutanga Mukuru.
4. Katu sokuungurisa oviserekarera momerikotameneno wetu
Matu tjiwa vi kutja okutjita nao kaku nokuyorokisa Mukuru? Nyanda OKAVIDIO, nu okuzambo hungirira kepuriro ndi mari kongorere kehi mba.
-
Pa tjitwa tjike indu ovakarere tjiva va Mukuru moruveze rwOmbeibela tji va ungurisa otjiserekarera okurikotamena ku ye?
Ovandu tjiva ve ungurisa oviserekarera indu tji mave rikotamene ku Mukuru, mena rokutja ve vanga okutumbuka popezu na ye. Posi ya, okutjita nao ku tjita kutja ma kare kokure na eṱe. Lesa Eksodus 20:4-6 nEpsalme 106:35, 36, nu okuzambo hungirira komapuriro nga:
-
Ovikwaye poo oviserekarera viṋe mbi wa muna ovandu amave ungurisa momerikotameneno wawo?
-
Jehova u noumune uṋe ohunga nomaungurisiro woviserekarera?
-
Hapo ove u noumune uṋe ohunga nomaungurisiro woviserekarera?
5. Okurikotamena ku Jehova erike ku tu kutura komahongero woposyo
Tara kutja okurikotamena ku Jehova momuano omusemba maku tu kutura vi komahongero woposyo. Nyanda OKAVIDIO.
Lesa Epsalme 91:14, nu okuzambo hungirira kepuriro ndi:
-
Hapo Jehova we tu kwizikira tjike indu tji twa raisa kutja twe mu suvera mokurikotamena ku ye erike?
6. Tu rikotamena ku Mukuru pozombongarero zombongo
Tu tanga Jehova nokuyanḓiparisa varwe indu tji matu imbura nokuyandja omaziriro pozombongarero zombongo. Lesa Epsalme 22:22, nu okuzambo hungirira komapuriro nga:
-
Hapo u tjaterwa okuzuva omaziriro pozombongarero zombongo?
-
Mo vanga okurirongerisa okuyandja eziriro?
7. Jehova u tjaterwa tji matu raere varwe oviṋa mbi twe rihongo
Pe nomiano omingi pekepeke mu matu yenene okuhaṋasana ouatjiri wOmbeibela ku na varwe. Lesa Epsalme 9:1 no 34:1, nu okuzambo hungirira kepuriro ndi:
-
Otjikwaye tji we rihongo okuza mOmbeibela tji mo vanga okuraera omundu warwe?
OVANDU TJIVA VE TJA: “Kamaatu yenene okuyorokisa omutima wa Mukuru.”
-
Hapo ove u noumune uṋe?
OKUYARUKIRA PO OUSUPI
Tu yorokisa Omuute wetu indu tji twe rikotamene ku ye erike, natu mu tanga pozombongarero zombongo, nokuhaṋasana imbi mbi twe rihongo ku na varwe.
Okurizemburukisa
-
Matu yenene vi okurihonga omuano omusemba wokurikotamena ku Mukuru?
-
Ongwaye tji matu sokurikotamena ku Jehova erike?
-
Ongwaye tji matu sokurikotamena ku Mukuru pu na varwe mbe vanga okumuyorokisa?
RIHONGA OVINGI
Lesa kutja omomuano uṋe omukazendu umwe ma isa okurikotamena koomukuru wovisenginina mehungi ndi “Ami mba isa okukarera oviserekarera.”
“Ombeibela i rundurura omiinyo vyovandu” (Oruhungu, 1 ku Juli, 2011)
Rihonga kutja ovikwaye mbi mavi yenene okukuvatera okuyandja omaziriro pozombongarero zombongo.
Tara kutja ouwa waye omurumendu umwe omutanda mbwa muna mokuyenda kozombongarero zombongo, nandarire kutja kaya ri oupupu ku ye.
Ovandu ovengi ve kambura kutja otjikoroise tji sokuungurisiwa momerikotameneno wOukriste, posi ya hapo matu sokutjiungurisa?
a Matu kahungirira komapu nga, momahongwa ngu maye kongorere ko.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
