LEKSION 14
Kasano a Maragsakan ti Dios iti Panagdaydayawtayo?
Kas naammuanta iti kalkalpas a leksion, saan a maragsakan ti Dios iti amin a relihion. Ngem mabalintayo a dayawen ti Namarsua kadatayo iti pamay-an a mangparagsak kenkuana. Ngem, ania a “pamay-an ti panagdaydayaw [wenno, relihion]” ti mangparagsak kenkuana? (Santiago 1:27, footnote) Ammuem ti isursuro ti Biblia.
1. Ania koma ti pakaibatayan ti panagdaydayawtayo?
Naibatay koma ti panagdaydayawtayo iti Biblia. Imbaga ni Jesus iti Dios: “Ti saom ket kinapudno.” (Juan 17:17) Saan nga ik-ikkan ti dadduma a relihion iti importansia dagiti kinapudno a masarakan iti Sao ti Dios, ti Biblia. Sinuktanda dayta iti pannursuro ken tradision dagiti tattao. Ngem saan a maragsakan ni Jehova kadagiti ‘mangilaksid iti bilinna.’ (Basaen ti Marcos 7:9.) Iti sabali a bangir, maparagsaktayo ti pusona no ibasetayo ti panagdaydayawtayo iti Biblia ken surotentayo ti pammagbagana.
2. Kasano koma ti panagdaydayawtayo ken Jehova?
Kas Namarsua kadatayo, maikari ni Jehova iti naipamaysa a debosiontayo. (Apocalipsis 4:11) Kayatna a sawen a masapul nga ayatentayo ken isuna laeng ti dayawentayo, ken saantayo nga agusar iti aniaman a rebulto wenno imahen.—Basaen ti Isaias 42:8.
Ti panagdaydayawtayo ket masapul a “nasantuan ken pakaragsakan” ni Jehova. (Roma 12:1) Kayatna a sawen a masapul nga agtulnogtayo kadagiti bilinna. Kas pagarigan, dagiti mangay-ayat ken Jehova masapul nga ayaten ken surotenda dagiti bilinna maipapan iti panagasawa. Ken liklikanda dagiti dakes nga ar-aramid kas iti panagsigarilio, panagdroga, wenno panagbartek. a
3. Apay a masapul nga agdaydayawtayo ken Jehova a kadua dagiti kapammatiantayo?
Dagiti linawas a gimongtayo ket oportunidad tapno ‘maidaydayawtayo ni Jehova iti kongregasion.’ (Salmo 111:1, 2) Ti maysa a pamay-an a maaramidtayo dayta ket ti panagkanta kadagiti kanta a mangidaydayaw iti Dios. (Basaen ti Salmo 104:33.) Kayat ni Jehova a makigimongtayo ta ay-ayatennatayo ken ammona a makatulong dayta tapno agbiagtayo a naragsak iti agnanayon. Kadagiti gimong, mapabilegtayo ti dadduma ken mapabilegdatayo met.
AMMUEM TI AD-ADU PAY
Ammuem no apay a saan a kayat ni Jehova nga agusartayo iti imahen iti panagdaydayawtayo. Ammuem dagiti importante a pamay-an a maidaydayawtayo ti Dios.
4. Saantayo nga agusar iti imahen iti panagdaydayawtayo
Kasanotayo nga ammo a saan a maragsakan ti Dios no agusartayo iti imahen? I-play ti VIDEO, sa pagsaritaan ti sumaruno a saludsod.
-
Idi panawen ti Biblia, ania ti mapasamak kadagiti agdaydayaw iti Dios no agusarda iti imahen nga agdayaw kenkuana?
Marikna ti dadduma a nadekdekketda iti Dios no agusarda iti imahen nga agdayaw kenkuana. Ngem kasta kadi a talaga? Basaen ti Exodo 20:4-6 ken Salmo 106:35, 36, sa pagsaritaan dagitoy a saludsod:
-
Ania dagiti nakitamon a bambanag wenno imahen nga us-usaren dagiti tattao iti panagdaydayawda?
-
Ania ti marikna ni Jehova no agusartayo iti imahen?
-
Sika ngay, ania ti panagriknam maipapan iti panagusar kadagiti imahen?
5. No ni Jehova laeng ti daydayawentayo, mawayawayaantayo kadagiti ulbod nga ideya
Kitaem no kasano a ti umiso a panagdaydayaw ken Jehova wayawayaannatayo kadagiti ulbod nga ideya. I-play ti VIDEO.
Basaen ti Salmo 91:14, sa pagsaritaan daytoy a saludsod:
-
Ania ti inkari ni Jehova nga aramidenna para kadatayo no ipakitatayo nga ay-ayatentayo ken isu laeng ti pagdaydayawantayo?
6. Idaydayawtayo ti Dios kadagiti gimong ti kongregasion
Maidaydayawtayo ni Jehova ken mapabilegtayo ti sabsabali no agkantatayo ken agkomentotayo kadagiti gimong ti kongregasion. Basaen ti Salmo 22:22, sa pagsaritaan dagitoy a saludsod:
-
Magusgustuam kadi dagiti komento a mangmangngegmo kadagiti gimong?
-
Kayatmo kadi ti agsagana tapno makapagkomentoka met?
7. Maragsakan ni Jehova no ibagatayo iti sabsabali dagiti maad-adaltayo
Adu ti pamay-an tapno maibagatayo iti sabsabali dagiti kinapudno iti Biblia. Basaen ti Salmo 9:1 ken 34:1, sa pagsaritaan daytoy a saludsod:
-
Ania ti naammuam iti Biblia a kayatmo nga ibaga iti dadduma?
KUNA TI DADDUMA: “Imposible a maparagsak ti Dios.”
-
Ania ti makunam?
SUMARIO
Maparagsaktayo ti Namarsua kadatayo no isu laeng ti pagserbiantayo, no idaydayawtayo kadagiti gimong ti kongregasion, ken no ibagatayo iti sabsabali dagiti maad-adaltayo.
Rebiu
-
Kasanotayo a maammuan no ania a panagdaydayaw ti akseptaren ti Dios?
-
Apay a ni Jehova laeng ti masapul a daydayawentayo?
-
Apay a masapul nga agdaydayawtayo iti Dios a kadua dagiti agserserbi kenkuana?
AGDISKOBREKA PAY
Iti artikulo a “Saanakon nga Adipen Dagiti Idolo,” basaem no kasano a naisardeng ti maysa a babai ti panagdaydayaw kadagiti imahen.
“Ti Biblia Balbaliwanna ti Biag” (Ti Pagwanawanan, Hulio 1, 2011)
Ammuem dagiti makatulong kenka tapno makapagkomentoka kadagiti gimong ti kongregasion.
“Idaydayawyo ni Jehova iti Kongregasion” (Ti Pagwanawanan, Enero 2019)
Kitaem no kasano a nakatulong iti maysa nga agtutubo dagiti gimong ti kongregasion uray no narigat dayta para kenkuana.
Adu ti mamati a ti krus ket simbolo dagiti Kristiano, ngem masapul kadi nga usarentayo dayta?
a Mailawlawag dagitoy a topiko kadagiti sumaruno a leksion.
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
