ĨSOMO YA 14
Tũtonya Kwĩka Ata Nĩ Kana Ũthaithi Witũ Ũmwendeesye Ngai?
O tondũ tũnoonie ĩsomonĩ ĩvĩtu, ti ndĩni syonthe imwendeeasya Ngai. Ĩndĩ o na vailye ũu, nĩ ũndũ ũtonyeka tũkamũthaitha Mũmbi witũ kwa nzĩa ĩla wendaa. Nĩ “ũthaithi” wĩva kana ndĩni yĩva ĩmwendeeasya Ngai? (Yakovo 1:27) Sisya wone kĩla Mbivilia ĩmanyĩasya.
1. Mũsingi wa ũthaithi witũ waĩle kwĩthĩwa ne kyaũ?
Ũthaithi witũ waĩlĩte kwĩthĩwa umanĩte na Mbivilia. Yesũ eeie Ngai atĩĩ: “Ndeto yaku nĩyo wʼo.” (Yoana 17:17) Ndĩni imwe iilũnganaa na ũwʼo ũla wĩ Ndetonĩ ya Ngai mbeveee. Vandũ va kũmanyĩsya ũwʼo ũsu imanyĩasya momanyĩsyo ma andũ na syĩthĩo sya andũ. Ĩndĩ Yeova ndendeeawʼa nĩ ala ‘maleaa na maũĩ kũkwata mĩao yake.’ (Soma Maliko 7:9) Ĩndĩ kĩvathũkanyʼo na ũu, ngoo yake nĩtanaa mũno yĩla twalũmanyʼa na Mbivilia na twaatĩĩa ũtao wayo.
2. Twaĩle kũmũthaitha Yeova ata?
Nũndũ Yeova nĩwe Mũmbi witũ, twaĩle kũmũthaitha e weka. (Ũvuanyʼo 4:11) Ũu nĩ kwasya kana no nginya tũmwende na tũimũthaitha e weka tũte kũtũmĩa mĩvwʼanano kana syĩndũ ingĩ ta isu.—Soma Isaia 42:8.
Ũthaithi witũ waĩlĩte kwĩthĩwa wĩ ‘mũtheu na wĩtĩkĩlĩka’ kwa Yeova. (Alomi 12:1) Ũu wĩonanyʼa kana twaĩlĩte kwĩkala kwosana na myolooto yake ya ũlũngalu. Kwa ngelekanyʼo, ala mamwendete Yeova nĩmendete kũatĩĩa myolooto yake ĩla ĩkonetye mũtwaano. O na ĩngĩ, nĩmevathanaa na imanyĩo nthũku ta ũthengi, kũtũmĩa mbakĩ, kana o ndawa ingĩ sya kũmila. a
3. Nĩkĩ twaĩlĩte kũmũthaitha Yeova twĩ vamwe na athaithi ala angĩ?
Maũmbano maitũ ma kĩla kyumwa nĩmatũnengae mwanya wa ‘kũmũtaĩa Yeova . . . ũmbanonĩ.’ (Savuli 111:1, 2) Nzĩa ĩmwe twĩkaa ũu nĩ kũmwinĩa Ngai mbathi sya kũmũtaĩa. (Soma Savuli 104:33.) Yeova atwĩaĩe tũendae maũmbanonĩ nũndũ nũtwendete, na nĩwĩsĩ kana no matũtetheesye tũkesa kũtanĩa thayũ tene na tene. Yĩla twoombana vamwe, no ithyĩ tũtethekaa nũndũ nĩtũthangaanasya.
ĨMANYĨSYE MŨNANGO
Ĩmanyĩsye wone nĩkĩ Yeova ũtendaa tũitũmĩa mĩvwʼanano yĩla tũũmũthaitha. O na ĩngĩ ĩmanyĩsye wone nzĩa sya vata ila tũtonya kũtũmĩa kũmũtaĩa Ngai.
4. Tũyaĩle kũtũmĩa mĩvwʼanano ũthaithinĩ witũ
Twĩsĩ ata kana kwĩka ũu kũimwendeeasya Ngai? Ĩloelei VITIO, na ĩndĩ mũineenea ĩkũlyo yĩĩ:
-
Kwaendie ata yĩla andũ amwe ma Ngai ĩvinda ya tene matatie kũmũthaitha matũmĩĩte mũvwʼanano?
Andũ amwe monaa ta meũmũthengeea Ngai mũnango matũmĩa mĩvwʼanano ũthaithinĩ woo. Ĩndĩ kwĩka ũu nĩkũtonya kũtuma Ngai ethĩwa vaasa namo? Somai Kuma 20:4-6, na Savuli 106:35, 36, na ĩndĩ mũineenea makũlyo aa:
-
Nĩ syĩndũ ta syĩva kana mĩvwʼanano ta yĩva wonete andũ maitũmĩa ũthaithinĩ woo?
-
Yeova ewʼaa ata ĩũlũ wa kũtũmĩa mĩvwʼanano?
-
We wĩwʼaa ata ĩũlũ wa kũtũmĩa mĩvwʼanano?
5. Kũmũthaitha Yeova e weka nĩ kũtũvathanaa na momanyĩsyo ma ũvũngũ
Sisya wone ũndũ kũmũthaitha Yeova kwa nzĩa ĩla wĩtĩkĩlĩte kũtonya kũtũvathana na momanyĩsyo ma ũvũngũ. Ĩloelei VITIO.
Somai Savuli 91:14, na ĩndĩ mũineenea ĩkũlyo yĩĩ:
-
Yeova atwathĩte kyaũ twamwonyʼa kana nĩtũmwendete kwa kũmũthaitha e weka?
6. Nĩtũmũthaithaa Ngai maũmbanonĩ maitũ
Nĩtũmũtaĩaa Yeova na tũkathangaanyʼa yĩla twaina na twaumya maelesyo maũmbanonĩ ma kĩkundi. Somai Savuli 22:22, na ĩndĩ mũineenea makũlyo aa:
-
We nũtanĩaa kwĩwʼa angĩ mayumya maelesyo maũmbanonĩ?
-
We no wende kwĩyũmbanyʼa nĩ kana umye maelesyo maũmbanonĩ?
7. Yeova nũtanaa mũno yĩla twatavya angĩ maũndũ ala twĩmanyĩisye
Nĩvethĩawa na myanya mingĩ ya kũtavya andũ angĩ ũwʼo wa Mbivilia ũla twĩmanyĩĩtye. Somai Savuli 9:1 na 34:1, na ĩndĩ mũineenea ĩkũlyo yĩĩ:
-
We nĩ ũndũ wĩva wĩmanyĩĩtye kuma Mbivilianĩ ũtonya kwenda kũtavya mũndũ ũngĩ ĩũlũ wawʼo?
ANDŨ AMWE MAASYA: “Ngai nĩ mũtheu mũno, na nũndũ twĩ ene naĩ ti ũndũ wĩ laisi kũmwendeesya.”
-
We wĩona ata?
KĨLA TWEEMANYĨSYA
Nĩtũmwendeeasya Mũmbi witũ yĩla twamũthaitha e weka, twamũtaĩa maũmbanonĩ ma kĩkundi, na twatavya andũ angĩ maũndũ ala twĩmanyĩĩtye.
Makũlyo ma Kũsyokeleela
-
Tũtonya kũmanya ata ũndũ Ngai wendaa tũmũthaithe?
-
Nĩkĩ twaĩle kũmũthaitha Yeova e weka?
-
Nĩkĩ twaĩle kũthaitha twĩ na andũ ala angĩ me na wendi wa kũmwendeesya Ngai?
MAŨNDŨ ANGĨ MA KWĨMANYĨSYA
Nthĩnĩ wa ngewa yĩ na kyongo, “Nĩnaekie Kũthaitha Mĩvwʼanano,” soma wone ũndũ mũndũ mũka ũmwe waekie kũthaitha Ngai sya mĩvwʼanano.
“Mbivilia Nĩalyũlaa Andũ” (Mũsyaĩĩsya, Ĩtukũ 1, Mwei wa 7, 2011)
Ĩmanyĩsye wone kĩla kĩtonya ũkũtetheesya ũkaumasya maelesyo maũmbanonĩ ma kĩkundi.
Sisya wone ũndũ mũndũũme ũmwe wa mũika watethekie nĩ maũmbano ma kĩkundi, o na kau ndwaĩ ũndũ wĩ laisi kwake kũthi maũmbanonĩ asu.
Andũ aingĩ maĩkĩĩaa kana ngelanyʼo nĩyaĩle kũtũmĩwa nĩ Aklĩsto, ĩndĩ kwawʼo nĩtwaĩle kũmĩtũmĩa ũthaithinĩ witũ?
“Nĩkĩ Ngũsĩ sya Yeova Itatũmĩaa Ngelanyʼo Ĩla Iũthaitha?” (Ũvoo wĩ kĩsesenĩ)
a Maũndũ aa makaneenewa masomonĩ angĩ me mbee.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
