ERISOMO 14
Eriramya Lyethu Lyanga Tsemesya Lithi Nyamuhanga?
Ngoku kiri omw’isomo ery’ahanyuma, amadini wosi syali tsemesaya Nyamuhanga. Aliwe, thwangana ramya Omuhangiki wethu omwa nzira eyikamutsemesaya. “Ekisomo” kutse edini eyikamutsemesaya y’eyahi? (Yakobo 1:27) Lebaya ekya Biblia yikakangiriraya.
1. Eriramya lyethu litholere iryaseghemera okuki?
Eriramya lyethu litholere iryaseghemera okwa Biblia. Yesu mwabwira Nyamuhanga athi: ‘Ekinywe kyawu ni mwatsi w’ekwenene.’ (Yoane 17:17) Awandi madini akagheghena ekwenene eyiri omwa Kinywe kya Nyamuhanga, e Biblia. Bakasubaya omo mwanya w’ekwenene eyo mw’esyongangirirya sy’abandu n’emirwa yabu. Aliwe Yehova syali tsemera ‘abakapona ekihano kya Nyamuhanga.’ (Soma Mariko 7:9.) Erithendibya ng’ibo, ithwe thukatsemesaya omuthima wiwe thukamakirira e Biblia n’erighendera okw’ihabulha lyayu.
2. Thutholere ithwaramya thuthi Yehova?
Iyo ng’Omuhangiki wethu, Yehova musa yutholere eriramibwa. (Eribisulirwa 4:11) Eki kikamanyisaya kithi thutholere ithwamwanza n’erimuramya iyo musa, ahathe erikolesya esanamu yosi-yosi, ekisosekanio, kutse akaminyikalho.—Soma Isaya 42:8.
Eriramya lyethu litholere iryabya ‘iribuyirire kandi erikatsemesaya’ Yehova. (Abanya Roma 12:1) Eki kikamanyisaya kithi thutholere ithwaghendera okwa bihano biwe eby’esyongeso. Ng’eky’erileberyako, abanzire Yehova banzire ebihano biwe ebihambire okwa butheke kandi bakabighenderako. Kandi bakayihighulha okwa mitse mibi, ng’erinywa ethaba kutse erikolesya nabi emibatsi kutse obwabu. a
3. Busana naki thutholere ithwaramya Yehova ithune haghuma n’abaramya balikyethu?
Emihindano yethu y’obuli wiki yikathuha akaghisa ‘k’eripipa Omwami Mukulhu omw’ihindana ly’abandu.’ (Esyonyimbo 111:1, 2) Enzira nguma eya thukakoleramo eki ly’eriimba esyonyimbo sy’eripipa Nyamuhanga. (Soma Esyonyimbo 104:33.) Yehova akathubwira athi ithwahindana okwa mihindano kundi athwanzire kandi anasi ngoku yangana thuwathikya eritsemera engebe kera na kera. Okwa mihindano thukaghasirawa omw’ihimbangana.
THASYIGHA BINGYI
Lebaya ekikaleka Yehova iniathaligha erikolesya esyosanamu omw’iramya. Minya esyonzira ngulhu-ngulhu esyo thwanga pipiramo Nyamuhanga.
4. Si thutholere thukakolesya esyosanamu omw’iramya lyethu
Thukaminya thuthi ngoku erikolha ekyo ikikendi ponesya Nyamuhanga? Mubughaye Evidiyo, mwanakania okwa kibulyo ekikakwamako.
-
Ni kyahi ekyabya omughulhu abandi bandu ba Nyamuhanga omwa buthuku bwe Biblia balengesaya erimuramya omw’ikolesya esanamu?
Abandi bandu bakalengesaya eriyithunda hakuhi na Nyamuhanga omw’ikolesya esyosanamu kutse ehiminyikalho omw’iramya lyabu. Mbwino ekyo sikirimusegheraya haali okw’ibo? Soma Eriluayo 20:4-6 na Esyonyimbo 106:35, 36, mwanakania okwa bibulyo bino:
-
Ni himinyikalho hyahi kutse esyosanamu esyo wabirilhangira abandu bakakolesya omw’iramya lyabu?
-
Yehova akayowa athi okw’ikolesya esyosanamu omw’iramya?
-
Wukayowa wuthi okw’ikolesya esyosanamu omw’iramya?
5. Eriramya Yehova musa kikaleka ithwabya bwiranda okwa syongangirirya sy’amabehi
Lhangira ngoku eriramya Yehova omo nzira eyo akaligha kikaleka ithwabya bwiranda okwa syongangirirya sy’amabehi. Mubughaye EVIDIYO.
Soma Esyonyimbo 91:14, mwanakania okwa kibulyo kino:
-
Yehova akayilhagha erithukoleraki omughulhu thukakanganaya ku thumwanzire omw’imuramya iyo musa?
6. Thukaramaya Nyamuhanga okwa mihindano y’ekithunga
Thukapipa Yehova n’erihimbangana omw’imba n’erisubirya okwa mihindano y’ekithunga. Soma Esyonyimbo 22:22, mwanakania okwa bibulyo bino:
-
Wunemutsemera eriowa abandu bakasubirya okwa mihindano?
-
Wangananza eriyithegheka nuku wasyasubiraya?
7. Yehova akatsema thukabwira abandi okwa bya thuk’igha
Hali nzira nyingyi esyo thwangana kolesya eribwira abandi okwa kwenene ye Biblia. Soma Esyonyimbo 9:1 na 34:1, mwanakania okwa kibulyo kino:
-
Ni kyahi ekya wabirigha omwa Biblia ekya wanganza eribwirako owundi?
ABANDI BAKABUGHA BATHI: “Si kikulhu mbulha wukaramaya wuthi Nyamuhanga.”
-
Wanga bugha wuthiki?
OMWA BIKUHI
Thukatsemesaya Omuhangiki wethu thukamuramya iyo musa, thukamupipa okwa mihindano y’ekithunga, kandi thukabwira abandi okwa bya thuk’igha.
Eriyibukya
-
Thwang’igha thuthi eriramya Nyamuhanga omwa nzira eyo akaligha?
-
Busana naki thutholere ithwaramya Yehova musa?
-
Busana naki eritsemesya Nyamuhanga thutholere ithwamuramya ithune haghuma n’abandi?
MINYA BINGYI
Omo mwatsi “Singakiri Mukobe w’Esyosanamu,” minya ngoku omukali mughuma aleka eriramya esyosanamu.
“E Biblia Yikahindulha Esyongebe” (The Watchtower, Okwomusanju 1, 2011)
Minya ebyanga kuwathikya erisubirya okwa mihindano y’ekithunga.
Lhangira ngoku omulhume mughuma aghasirawa omwa mihindano y’ekithunga nomwakine indi sikyabya kyolho iyo erihindana.
Abandu bangyi bakabugha bathi omusalaba ni kaminyikalho k’Abakristayo, aliwe thunatholere ithwakolesyagho omw’iramya lyethu?
“Busana Naki Abema ba Yehova Sibali Kolesaya Omusalaba omw’Iramya Lyabu?” (Omwatsi okwa muthahulha)
a Emyatsi eyi yikendi kanibwako omwa masomo awali embere.
