Faso beto me longoka yawu na kileso yina me luta, mabuundu nyonso ve ke pesá Nzambi kilengi. Kasi beto lenda sambila Nzambi na faso mosi yina ke sepelisa yandi. Na yawu, wapi yina ke “faso ya kusambila [to dibuundu]” yina yandi ke ndimaka? (Zaki 1:27, note ya yisi ya paje) Beto tala yinki Biblia ke zonzaka.

1. Yinki zolá twadisa faso ya beto ya kusambila?

Ni Biblia zolá twadisa faso ya beto ya kusambila. Yesu zonzá na Nzambi mambu yayi: “Mambu ya nge kele butsyelika.” (Yoane 17:17) Mabuundu ya nkaka ke sadilá ve matsyeleka yina ke na Biblia. Na kisika ya yawu, ba ke sadilá malongi ya bantu mpe malongi ya bankooko. Kasi, Yehova ke sepelá ve na ba yina nyonso ke “mangaka musiku ya Nzambi.” (Tanga Marke 7:9.) Beto ke sepelisa Nzambi ntangu beto ke sadila malongi ya Biblia mpe kubika yawu twadisa faso ya beto ya kusambila.

2. Wa’ faso beto me bonga kusambila Yehova?

Beto me bonga kuzola mpe kusambila kaka Yehova samu ti ni yandi yidikaka beto. (Luzabusu 4:11) Na yawu, beto zolá sadila ve biteki to bima ya nkaka samu na kusambila yandi.—Tanga Izaya 42:8.

Faso ya beto ya kusambila me bonga kuvanda “ya santu mpe yina Yehova ke ndimaka.” (Baroma 12:1, nwt-MK) Ya zola zonza ti beto zolá tumama na misiku ya yandi. Na kifwani, ba yina ke zolá Yehova ke tumamá na misiku yina me tadila makwela, mpe ke losá bima ya yimbi faso tabaka, cigarette, dyamba mpe kunwa malafu mingi. a

3. Samu na yinki beto me bonga kusambila Yehova kintwadi na bampangi ya nkaka?

Balukutakanu ya beto ke pesá beto bweso ya “kukembila Yehova . . . na dibuundu.” (Nkunga 111:1, 2) Na yawu, banzimbu ke mosi ya bafaso yina beto ke salaka yawu. (Tanga Nkunga 104:33.) Yehova me lomba beto na kuvukana na balukutakanu samu yandi zola beto, mpe samu yandi zaba ti, kusala yawu ke natina beto luzingu ya ntangu nyonso. Kuna beto ke pesá ngolo na bampangi, mpe bampangi mpe ke pesá beto ngolo.

 SOSA KUZABA MBOTE-MBOTE

4. Beto me bonga ve kusadila biteki na bizizi samu na kusambila

5. Kusambila kaka Yehova ke basisá beto na malongi ya luvunu

 6. Beto ke sambilá Nzambi na balukutakanu ya beto ya kimvuka

Beto ke kembilá Yehova mpe ke kindisá bampangi ntangu beto ke yimbá mpe ke pesá bamvutu na balukutakanu ya beto. Tanga Nkunga 22:22, mpe na manima beto zonzila byuvu yayi:

• Nge ke sepelá na bamvutu yina nge ke kuwaka na balukutakanu?

• Nge me zola mpe kubongama samu na kupesa bamvutu na balukutakanu?

7. Yehova ke zolá ntangu beto ke longá mambu ya yandi na bantu ya nkaka

Ya ke na bafaso mingi yina beto lenda longa mambu ya Biblia na bantu ya nkaka. Tanga Nkunga 9:1 na 34:1, mpe na manima beto zonzila kyuvu yayi:

• Wapi mambu nge me longoka na Biblia, yina nge me zola kuzonzila na muntu ya nkaka?

 NA BUNKUFI

Yehova ke sepelá na beto ntangu beto ke sambilá kaka yandi, ntangu beto ke kembilaka yandi na balukutakanu ya beto mpe ntangu beto ke zonzilá na bantu ya nkaka mambu yina beto ke longokaka.

Mambu ya kusimba

• Wapi mutindu beto lenda longoka faso ya kusambila yina Nzambi ke ndimaka?

• Samu na yinki beto me bonga kusambila kaka Yehova?

• Samu na yinki beto me fwana kusambila Yehova kintwadi na bampangi yina ke zolaka yandi?