SOMO 14
Mungu u tso nari ká kʉ ngba dini?
Anziro kʉ ná somo nǎ, ko chueri nari bbai Mungu nyǒ nzɨ krʉ kʉ ná dini adi tho ri. Ni mai ri kʉ fø ro, ko ka ko má ko no ná ke ngba tho ke nyǒ ná chulu. Mungu adi hwè ba dho nari ká kʉ “ngbà di ná madha inga [ngbà di ná dini]”? (Yakobo 1:27, maelezo ya chini) Anja Biblia ddi ná lo.
1. Ko bbʉ ná madha dho ká ringani ndi dyʉ ndi ngbá lo ro?
Ko bbʉ ná madha dho ringani ndi dyʉ ndi Biblia nǎ lo ro. Yesu pongʉeri Mungu dho: “Nidzá lo kʉ bbʉbbʉlo.” (Yohana 17:17) Nja dini nzá churie Biblia nǎ bbʉbbʉlo ro ri. Kpa adi ri thika lé ndrŭ dho longaddidha na ndirigoti ndrŭ chi ná yadha na. Yova nanga nzɨ adi jini “ndidzá yadha be pá ná ndrŭ dho ri.” (Azø Marko 7:9.) Ro ko adi hwè bbʉ Yova thí dho ko di Biblia zø ndirigoti ko di njínji ri nǎ lo na ró.
2. Kodho ká ringani ko bbʉ madha Yova dho ngbaribbai?
Kodho ringani ko bbʉ madha Yova dho, dhonalo ke kʉ ko no ná ke. (Ufunuo 4:11) Føri na mana kʉ kodho ringani ko ji ke ji ndirigoti ko bbʉ madha ke ddiro dho dhé, nzá ko ma ke sanamu chulu ro.—Azø Isaya 42:8.
Yova dho ko bbʉ ná madha dho ringani ndi e “tse ndi tse ro ndirigoti ngbà ke u ndi tso ro.” (Waroma 12:1) Føri na mana kʉ, kodho ringani ko njínji ke bbʉ ná yadha na. Loroji na, ngbà ji Yova ná ndrŭ adi ngarr ndoa djo ke bbʉ ná yadha dho. Ndirigoti kpa adi che kʉ ná nyí tso nyinyi, loroji na føri kʉ mbaz le ddá nari ma, inga rɨ le rɨ ná ritsi na le njínji nari ma. a
3. Addu dzá lodho ká ringani ko má Yova ko lai Wakristo ma na?
Krʉ yenga ddo ró ko njuni nari adi rili ko “má Yova . . . kutaniko nǎ.” (Zaburi 111:1, 2) Fø ko adi rinji ná ddikpa chu kʉ, dyi chulu ko madha bbʉ Mungu dho nari. (Azø Zaburi 104:33.) Yova adi rinzi ko si njudha dhi ngana dhonalo kʉ ke ji ko ji ndirigoti ke churi nari kʉ, føri si ko tsotso ko ndiro ko njí maisha hwè theinga dho d’e. Njudha dhi ngana ko adi ko li kpakpa ko kana.
ANE LONANGA BBO
Aneri ni chu addudho ma Yova nzɨ adi ri u le bbʉ madha ndi dho ritsi ró ji chulu ri nari. Aneri ni chu bblo ko ka ko má Mungu ná chu.
4. Kodho nzá ringani ko bbʉ madha Mungu dho ritsi ró ji chulu ri
Fø le rinji nari nzá ka ndi bbʉ hwè ro Mungu thí dho ri, nari ká ko chu ngbaribbai? Aninja VIDEO, ndirigoti anitilo i ngadhudha djo.
-
Anziro ngʉ njínji Mungu dho ná ndrŭ ngʉ rine ndima bbʉ madha ke dho ritsi ró ji chulu ná saa na, ká ngbá lo bangʉe fø ndrŭ?
Nja ndrŭ adi ndima mbu chøchø kʉ Mungu ró nari bbai ndima madha bbʉ ke dho ritsi ró ji chulu nari dho. Nde føri ká ka ndi ndo kpa kana nga nzá Mungu na? Azø Kutoka 20:4-6 ndirigoti Zaburi 106:35, 36, ndirigoti anitilo i ngadhudha djo:
-
Ni ká njari ndrŭ adi njínji ngbá ritsi ró ji na ndiri chulu ndima bbʉ madha Mungu dho d’e?
-
Yova ká adi ndi mbu ritsi ró ji chulu le madha bbʉ ndi dho nari dho ngbaribbai?
-
Ni ká adi ni mbu ngbaribbai ritsi ró ji chulu ndrŭ madha bbʉ Mungu dho nari dho?
5. Ko di Yova ddiro dhé má ró føri ka ndi tu kali dhi mafundisho tu ko djǒ nǎ ro
Anja ngbaribbai ma Yova dhò le madha bbʉ ngbà tso ke u ná chulu nari ka ndi tu kali dhi mafundisho ko djǒ nǎ ro nari. Aninja VIDEO.
Azø Zaburi 91:14, ndirigoti anitilo i ngadhudha djo:
-
Yova ká tsoni ndi si addu nji ko dho njati ko dhǒ jidha ke dho ndirigoti ko di madha bbʉ ke ddiro dho dhé ró?
6. Ko adi Mungu má njudha dhi ngana
Ko adi Yova má ndirigoti ko adi ko li kpakpa ko kana dyì ko ngo ndirigoti jibu ko bbʉ njudha dhi ngana nari chulu. Azø Zaburi 22:22, ndirigoti anitilo i ngadhudha djo:
-
Ni nanga ká adi jini nì njudha dhi nga nǎ ndrŭ jibu bbʉ nari dho?
-
Ni nanga ká ka ndi jini ngbà ndiro ni tayarisha ni si bbʉ ná jibu ro d’e?
7. Yova nanga adi jini ji ko di ko chu ná lo ro d’ra nja ndrŭ dho ró
Biblia nǎ bbʉbbʉlo ko ka ko d’ra nja ndrŭ dho ná chu kʉ bí. Azø Zaburi 9:1 ndirigoti 34:1, ndirigoti anitilo i ngadhudha djo:
-
Biblia nǎ ro ni chu ná lo kana ro ká ni ka ni jiri ni d’ra ngbá lo ro nja ndrŭ dho?
NJA NDRŬ ADI RIPO: “Ri ro nzá ka ndi ka le njí Mungu nyǒ tho ná lo ro ri.”
-
Nde ni ká adi riddi ngbǎ?
LO DZÁ DɄNGA
Ko adi hwè bbʉ Ngano ná ke thí dho, njati ko di madha bbʉ ke dho njudha dhi nga nǎ ndirigoti ko di ko chu ná lo ro d’ra nja ndrŭ dho ró.
Lo djolu le ngʉ nari
-
Ko ká ka ko chu Mungu dho ko madha bbʉ ngbà tso ke u ná chulu nari ngbaribbai?
-
Kodho ká ringani ko má Yova ddiro dhé addudho?
-
Ká addudho ringani ko má Mungu ddinga nja ndrŭ ma na?
NI KA NI CHU NÁ NJA LO
Azø addudho ma ddikpa isɨle kʉ hwè na sanamu ndi ngʉ má nari tso ndi bba nari dho nari, ɨ djǒ ripo ná lo nǎ “Nilishakaacha Kuabudu Sanamu.”
“Biblia Inabadilisha Maisha ya Watu” (Munara wa Mulinzi, 1 Mwezi wa 7, 2011)
Aneri ni chu ni tsotso ka ndi kó ná lo ndiro ni ngʉ jibu njudha dhi ngana d’e.
“Umusifu Yehova Katika Kutaniko” (Munara wa Mulinzi, Mwezi wa 1, 2019)
Anja ngbaribbai ma ddikpa jadda ke bangʉe faida njudha dhi ngana ndi si nari nǎ ro nari, nga mai fø ndi rinji nari ngʉe dhʉdhʉ ndi dho ro.
Bí kʉ ná ndrŭ adi riddi musalaba kʉ Wakristo le adi nja ró ná alama, ro kodho ká ringani ko bbʉ madha Mungu dho musalaba chulu?
“Juu ya Nini Mashahidi wa Yehova Hawatumiake Musalaba mu Ibada?” (Jw.org djó kʉ ná lo)
a Fø lo djo ko si loti gosi ná somo nǎ.
