KIFUNDWA 14
Bya Kulonga pa Kusaka’mba Muswelo Otutōta Leza Umusangaje
Monka mokinenenwe mu kifundwa kibadikile, ke bipwilopo byonso bisangaja Leza. Nansha nankyo, tubwanya batwe kutōta Leza mu muswelo umusangaja. Le i ‘mutōtelo’ka nansha butōtyi’ busangaja Leza? (Yakoba 1:27, kunshi kwa dyani) Tala byobya bifundija Bible.
1. Le muswelo wetu wa kutōta ufwaninwe kwimanina paka?
Muswelo wetu wa kutōta ufwaninwe kwimanina pa Bible. Yesu wānenene kudi Leza amba: “Kinenwa kyobe i bubine.” (Yoano 17:17) Bipwilo bimo kebiyukilepo bubine butanwa mu Bible, Kinenwa kya Leza kya ku bukomo bwa mushipiditu ujila. Bapingakanyanga binena Bible na mfundijo ne bisela bya bantu. Ino Yehova Leza kasangelangapo boba ‘bapēlula mbila yandi.’ (Tangai Mako 7:9.) Batwe shi tulamate ku Bible ne kulonda madingi andi, nabya, tubasangaja mutyima wa Leza.
2. I muswelo’ka otufwaninwe kutōta Yehova?
Yehova byadi Umpangi wetu, i aye kete otufwaninwe kulamata. (Kusokwelwa 4:11) Ko kunena’mba, tufwaninwe kusanswa ne kutōta’nka aye bunka bwandi, kwampikwa kwingidija bankishi, bifwatulo, ne byelekejo.—Tangai Isaya 42:8.
Muswelo wetu otutōta ufwaninwe kwikala ‘ujila kadi witabijibwa’ na Yehova. (Bene Loma 12:1) Kino kishintulula’mba būmi bwetu bufwaninwe kulonda mbila yandi ya mu mwikadilo. Kimfwa, boba basenswe Yehova, basenswe ne mbila yandi itala pa busongi, kadi beilondanga. Bepukanga bibidiji bya disubi, kimfwa kutoma mfwanka, dyamba, ne mutomeno-mpata wa mālwa akolwañana. a
3. Mwanda waka tufwaninwe kutōta Yehova pamo na batōtyi-netu?
Kupwila kwetu kwa yenga ne yenga kwitupanga mukenga wa ‘kutendela Yehova mu kipwilo.’ (Ñimbo ya Mitōto 111:1, 2) Muswelo umo bidi otutendelanga Yehova Leza i na kumwimbila mitendelo. (Tangai Ñimbo ya Mitōto 104:33.) Yehova usakanga tupwile, mwanda witusenswe kadi uyukile amba kupwila’kwa, kuketukwasha twikale na būmi bwa nyeke. Potwibungila pamo mwanda wa kwikankamika, tumwenanga’mo batwe bonso.
LANGULUKA BININGE
Bandaula mwanda waka Yehova ketabijangapo twingidije byelekejo potumutōta. Wifunde miswelo palapala ya mvubu yotubwanya kutendela Leza.
4. Ketufwaninwepo kwingidija byelekejo mu butōtyi bwetu
Le tubayuka namani amba kwingidija byelekejo mu butōtyi kekusangajangapo Leza? Talai VIDEO, ne kwisambila pa kino kipangujo:
-
I bika byālongekele pātompele bantu ba Leza ba pa kala kumutōta na kwingidija nkishi?
Bantu bamo bemonanga bu badi pabwipi na Leza kitatyi kyobengidija byelekejo pa kumutōta. Ino le kulonga namino kubulwe kumupalwila kulampe? Tangai Divilu 20:4-6 ne Ñimbo ya Mitōto 106:35, 36, ne kwisambila pa bino bipangujo:
-
Le i bintu’ka nansha i byelekejo’ka byokodi mumone bantu bengidija mu butōtyi bwabo?
-
Le Yehova umonanga namani kwingidija bankishi mu butōtyi?
-
Le abe nobe ubebimone namani?
5. Kutōta Yehova bunka bwandi kwitunyongololanga ku milangwe ya bubela
Tala muswelo otubwanya kunyongololwa ku milangwe ya bubela shi tutōta Leza mu muswelo waitabije. Talai VIDEO.
Tangai Ñimbo ya Mitōto 91:14, ne kwisambila pa kino kipangujo:
-
Le Yehova i mwitulaye bika batwe balombola’mba tumusenswe na kumutōta’nka aye bunka bwandi?
6. Tutōtanga Leza potupwila pa kipwilo
Tutendelanga Yehova ne kwikomeja batwe bonso potwimba ne potulondolola ku kupwila. Tangai Ñimbo ya Mitōto 22:22, ne kwisambila pa bino bipangujo:
-
Lelo usangelanga kuteja malondololo ku kupwila?
-
Le usaka nobe kwiteakanya amba ukalondolole’ko?
7. Yehova usangalanga potusapwila bakwabo byobya byotwifunda
Kudi miswelo mivule yotubwanya kusapwila bakwabo bubine bwa mu Bible. Tangai Ñimbo ya Mitōto 9:1 ne 34:1, ne kwisambila pa kino kipangujo:
-
Le kudi kintu kampanda kyofundile mu Bible kyokimba kusapwila bantu bakwabo?
BANTU BAMO BANENANGA’MBA: “Kebibwanikapo kusangaja Leza.”
-
Le abe ulanga’po namani?
MU KĪPI
Tusangajanga Umpangi wetu kitatyi kyotumutōta bunka bwandi, kyotumutendela mu kipwilo, ne kyotusapwila bantu bakwabo byobya byotwifundile.
Pitulukai’mo
-
Le tukayuka namani muswelo wa kutōta Leza umusangaja?
-
Mwanda waka tufwaninwe kutōta’nka Yehova kete?
-
Mwanda waka tufwaninwe kutōtela pamo na boba basaka kusangaja Leza?
KIMBA
Tanga nsekununi inena’mba “Nkikingidilangapo Bankishi,” umone muswelo walekele mwana-mukaji umo kutōta bankishi.
“Bible Ushintanga Būmi” (Kiteba kya Mulami, 1 Kweji 7, 2011)
Wifunde umone bintu bibwanya kukukwasha ulondolole ku kupwila.
“Tendela Yehova mu Kipwilo” (Kiteba kya Mulami, Kweji 1, 2019)
Tala muswelo wamwenine nsongwalume umo mu kupwila kwa pa kipwilo nansha byokebyadipo bipēla kwadi kukatanwa’ko.
Bantu bavule bamwene kwingidija musalaba bu bwine Kidishitu, le i biyampe kwingidija’o mu butōtyi bwetu?
a Ino myanda ikesambilwa’po mu bifundwa bilonda’ko.
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
