Ik tzeʼn el qnikʼ tiʼj toj xnaqʼtzbʼil kyaj, nya kykyaqil okslabʼil bʼaʼn in che ela toj twitz Dios. Noqtzun tuʼnj, jaku qo kʼulin te Dios ik tzeʼn tajbʼil. ¿Alkye «ajbʼebʼl» moqa okslabʼil in xi tkʼamoʼn Dios? (Santiago 1:​27). Qo xnaqʼtzan tiʼj tiʼ in tzaj tqʼamaʼn Tyol Dios.

1. ¿Jatumel in tzaj qʼamaʼn tzeʼn tuʼn qkʼulin te Dios?

Atz in tzaj qʼamaʼn toj Biblia tzeʼn tuʼn qkʼulin te Dios. Xi tqʼamaʼn Jesús jlu te Dios: «Aju tyola axix tok» (Juan 17:​17). Ateʼ junjun okslabʼil moqa nimbʼil mintiʼ in nok kyqʼoʼn toklen axix tok tkuʼx toj Tyol Dios, sino in che ok lepeʼ kyiʼj xnaqʼtzbʼil nimen kyuʼn xjal ex tiʼj kykostumbr. Noqtzun tuʼnj, in che el tikʼun Jehová qe xjal mintiʼ in xi kybʼiʼn qe «tmandamyent» (uʼjinktza Marcos 7:9). Pero in tzalaj Jehová quʼn qa ma tzʼok qqʼoʼn toklen Tyol ex qa ma chex qbʼiʼn qe tconsej.

2. ¿Alkye tten tuʼn qkʼulin te Jehová?

At toklen Jehová tuʼn qkʼulin oʼkx te tuʼnju a Bʼinchal qe (Apocalipsis 4:​11). ¿Tiʼ t-xilen jlu? Atz in yolin tiʼj qa oʼkx te kʼokel qkʼujlaʼn ex qa oʼkx te qo kʼulil. Mintiʼ tuʼn kyajbʼen tilbʼilal quʼn aj qnaʼn Dios te (uʼjinktza Isaías 42:8).

Il tiʼj tuʼn tok qkʼulbʼil te saq ex tuʼn tel te tbʼanel toj twitz Jehová (Romanos 12:1). A t-xilen jlu qa il tiʼj tuʼn qanqʼin ik tzeʼn in tzaj kyqʼamaʼn tkawbʼil. Jun techel, aqeju kʼujlaʼn Jehová kyuʼn in xi kynimen qe tkawbʼil at tiʼj mejebʼleʼn. Ax ikx in nel kyikʼun qe tiʼchaq jaku tzaj tiʼn nya bʼaʼn kyiʼj, ik tzeʼn tuʼn kysichʼen, tuʼn kykʼan droga ex tuʼn t-xi kykʼaʼn nim qʼeʼn. a

3. ¿Tiquʼn il tiʼj tuʼn qkʼulin te Jehová junx kyukʼil xjal in che nimen te?

Aqeju qchmabʼile in che ok tkyaqil seman, in tzaj kyqʼoʼn ambʼil tuʼn tjaw qnimsaʼn tbʼi Jehová junx kyukʼil erman (Salmo 111:​1, 2). Jaku bʼant jlu quʼn aj tjaw qnimsaʼn tbʼi kyukʼil bʼitz (uʼjinktza Salmo 104:​33). In tzaj tqʼamaʼn Jehová tuʼn tok qchmon qibʼ tuʼnju kʼujlaʼn qoʼ tuʼn ex tuʼnju ojtzqiʼn tuʼn qa jaku che onin chmabʼil qiʼj tuʼn qtzalaj tiʼj qchwinqlal te jumajx. Aj tok qchmon qibʼ, in bʼaj qqʼuqbʼaʼn qkʼuʼj qxolx.

 QO JYON MAS TQANIL

4. Mintiʼ tuʼn kyajbʼen sant quʼn aj qkʼulin te Dios

5. Qa ma qo kʼulin oʼkx te Jehová, mlayx qo kubʼ sbʼuʼn kyuʼn nya ax tok xnaqʼtzbʼil

 6. In qo kʼulin te Jehová kyoj chmabʼil

In jaw qnimsaʼn tbʼi Jehová ex in bʼaj qqʼuqbʼaʼn qkʼuʼj qxolx aj qbʼitzin ex aj t-xi qqʼoʼn jun qyol kyoj chmabʼil. Kyuʼjinktze Salmo 22:​22 ex che yoline kyiʼj xjel lu:

• ¿In tzalajpe teya aj t-xi kyqʼoʼn erman kyyol kyoj chmabʼil?

• ¿Tajpe teya tuʼn tkubʼ tbʼinchaʼna jun tyola ex tuʼn t-xi tqʼamaʼna toj chmabʼil?

7. Tgan Jehová tuʼn qyolin kyukʼil txqantl tiʼjju in nel qnikʼ tiʼj toj Tyol

At nimku tumel tzeʼn jaku qo yolin kyukʼil txqantl tiʼjju in nel qnikʼ tiʼj toj Tyol Dios. Kyuʼjinktze Salmo 9:1 ex 34:1, ex che yoline tiʼj xjel lu:

• Tiʼj tkyaqilju o tzʼel tnikʼa tiʼj toj Tyol Dios, ¿tiʼ taja tuʼn t-xi tqʼamaʼna kye txqantl?

 TOJ CHʼIN YOL

In tzalaj Jehová quʼn aj qkʼulin oʼkx te, aj tjaw qnimsaʼn kyoj chmabʼil ex aj t-xi qqʼamaʼn kye txqantl aju o tzʼel qnikʼ tiʼj toj Tyol.

Aju ma qo yolin tiʼj

• ¿Jatumel in tzaj qʼamaʼn tzeʼn taj Dios tuʼn qkʼulin te?

• ¿Tiquʼn oʼkx te Jehová tuʼn qkʼulin?

• ¿Tiquʼn il tiʼj tuʼn qkʼulin te Jehová junx kyukʼil qe xjal in che nimen te?