Soo aus wie en daut väaje Kapitel sagen, talt Gott nich aule Gloowes fa rajcht. Oba wie kjennen Gott soo deenen, daut hee sikj freit. Woont es “een reina un ajchta Gottesdeenst”? (Jakobus 1:27). See wie mol, waut de Schreft doatoo sajcht.

1. Opp waut saul ons Deenst sikj stetten?

Ons Deenst saul sikj opp de Schreft stetten. Jesus säd to Gott: “Dien Wuat es de Woarheit” (Johanes 17:17). Eenje Jemeenten hoolen sikj nich aun de Woarheit ut Gott sien Wuat, de Schreft. Dee vetuschen dee met menschelje Lieren un Väaschreften. Oba Jehova kaun daut nich vedroagen, wan se sien Jeboot auntsied saten (läs Matäus 15:3). Wan wie ons oba aun Gott sien Wuat hoolen un sienen Rot nokomen, dan freit hee sikj.

2. Woo sell wie Jehova deenen?

Jehova es daut wieet, daut wie bloos am deenen, wiels hee ons jemoakt haft (Openboarunk 4:11). Wie sellen am leewen un motten bloos am aunbäden un nich noch Aufjetta ooda Bilda ooda sestwaut doatoo brucken (läs Jesaja 42:8).

Ons Deenst mott heilich sennen un soo, daut Jehova dän “aunnämen kaun” (Reema 12:1). Daut meent, daut wie motten no siene Jesazen läwen. Wäa Jehova leeft, woat biejlikj daut Jesaz äwa de Ehe leewen un nokomen. Un dee woat nich soont doonen, waut toom Schoden es, soo aus Tobbak ooda Droggs brucken ooda too väl stoakjet drinkjen. a

3. Wuarom sell wie Jehova met Gloowesbreeda toop deenen?

En onse Toopkomes, waut wie jieda Wäakj haben, kjenn wie Jehova preisen (Psalm 111:1-2). Eene Wajch, woo wie daut doonen kjennen, es Leeda sinjen (läs Psalm 104:33). Jehova well haben, daut wie ons sellen vesaumlen. Woosoo? Hee leeft ons un weet, daut ons daut halpt, noch mol fa emma een scheenet Läwen to haben. Un bie de Toopkomes kjenn wie ons uk unjarenaunda oppmuntren.

 DOLLA UNJASTONEN

4. Wie sellen bie de Aunbädunk nich Bilda brucken

5. Bloos Jehova aunbäden, moakt ons frie von faulsche Iedeeen

 6. Bie onse Toopkomes doo wie Gott aunbäden un deenen

Wan wie enne Vesaumlunk sinjen un Auntwuaten jäwen, dan doo wie Jehova lowen un ons unjarenaunda oppmuntren. Läst Psalm 22:23 un dan got toop dise Froagen derch:

• Jleichst du daut, daut se enne Toopkomes auntwuaten kjennen?

• Wurscht du die jleichen, eene Auntwuat reedtomoaken?

7. Jehova jefelt daut, wan wie aundre daut vetalen, waut wie lieren

Daut kaun veschieden sennen, woo wie kjennen met aundre äwa de Woarheit ut de Schreft räden. Läst Psalm 9:2 un 34:2 un dan got toop dise Froag derch:

• Waut wurscht du aundre jleichen to vetalen von daut, waut du aul ut de Schreft jelieet hast?

 KAPITEL TOOPJEFOT

Wie kjennen Gott jefaulen, wan wie bloos am aunbäden un deenen, wan wie am enne Vesaumlunk lowen un aundre daut vetalen, waut wie jelieet haben.

Waut hast du jelieet?

• Woo kjenn wie daut lieren, woo wie Gott rajcht aunbäden un deenen sellen?

• Wuarom sell wie bloos Jehova aunbäden un deenen?

• Wuarom sell wie Gott met soone toop aunbäden un deenen, waut am uk jefaulen wellen?