LECCIÓN 14

Keʼe sunthuʼuna para ke Dio sinchexruxiʼin kexrein sunthusayeʼená

SÍKUNI O TSI̱ʼINI NGAI THÁ

Ínchi kuanginá ngai lección batho, jiʼa kainxin religión nchexruxiʼin Ndo Dio. Aro jaan nchao sunthuxruxiʼina Ndo Diuana ko sunthuʼuna ke ruchee. Kexrein chunda ke “sunthusayeʼena” o “kexeʼe religión” jaan dayee Ndo (Santiago 1:27; nota). Rutsjeʼená keʼe tjago Biblia.

1. Thino ndachro kexrein sinchesayeʼeni Dio

Ngai Biblia ndachro kexrein sinchesayeʼeni Dio. Jesús ndache Dio: “Thaa yaa thi ndua” (Juan 17:17). Inchi religión nchegundaʼana Biblia para tjaguna thi ndua ke thixin de Dio; icha jian, tjaguna thi jeʼena xraxauna ko rueena thi ncheʼe ni icha. Aro Jehová nchexruxiʼan Ndo ke tathinthuʼena thi jeʼe Ndo thetuʼan Ndo (tsjeʼe Marcos 7:9). Aro jaʼana, nchao sunthuʼuna ke ruchee, are tjaguná ke nthurenthena thi ndachro ngaa Biblia ko duthikauna thi tjago.

2. Kexrein chunda ke sunthusayeʼena Jehová

Ixi Jehová thi juinthachjianá, jikininxin ke juʼo jeʼe sunthusayeʼena (Apocalipsis 4:11). Jiʼi ruchro ke ruthjueʼená ko juʼo jeʼe sunthusayeʼena, ko rugundaʼaná ke sunthugundana naa imagen para sunthusayexina (tsjeʼe Isaías 42:8).

Ke thi sunthusayeʼena Ndo “thjua seʼe ko ke sinchexruxiʼin Ndo” (Romanos 12:1). Jiʼi ruchro ke sunthuʼuna thi tetanginá. Ínchi ni tekaʼo chuo, ni thjueʼe Jehová tjaguna ke ncherenthena ko dithikauna thi jeʼe Ndo thetuʼan Ndo. Kai ncheʼana thi nuʼena ke sincheniʼina, ínchi droga, kajno o xrandasua. a

3. Unda sunthusayeʼena Jehová ngai ni jaan dithikaun Ndo

Kainxin semana ke xrathená nchao tsjaguná ke nthusayeʼena “Jehová [...] ngai congregación” (Salmo 111:1, 2). Naa thi tsjaguxiná ke nthusayeʼena yaa are tsjená are xrathená (tsjeʼe Salmo 104:33). Si Jehová danchianá ixi ruxrathená yaa ixi anto rinauná ko jeʼe nuʼe jian ke are xrathená jiʼi tsengijnaná para ke icha jian tsjiana. Are xrathená thengijnaná ni icha ko jeʼena thengijnanana kai.

TANGI ICHA

Rutsjeʼená unda Jehová rinauʼan ke sunthugundana imagen para sunthusayeʼena. Kai tsanginá kekaa nchao sunthuʼuna para sunthusayeʼena Ndo.

4. Nchauʼa jii ke sunthugundana imagen para sunthusayeʼena Dio

Kexrein nuanxina ke jiʼi nchexruxiʼan Dio. Tsjeʼera VIDEO ko tjaura de jiʼi:

VIDEO: A rinao Dio ke sunthugundana imagen para sunthusayeʼena (3:26)

Keʼe kuʼen rajnee Jehová are inchina binchegundana naa imagen para juinchesayexina.

Inchina tunuʼena ke icha chiaun tena de Dio are nchegundana imagen para nchesayexina. Aro, a jeʼa icha tatetunkjina de jeʼe Ndo are nchegundana jiʼi. Tsjeʼera Éxodo 20:4-6 ko Salmo 106:35, 36, ko tjaura de jiʼi:

Kekaa degikun ke dundeʼe chujni.
Keʼe xraxaun Jehová are nchegundana imagen.
Ko kexrein degikuʼen suixin.

5. Si sunthusayeʼena juʼo Jehová, i suthikauʼana thi tjago ichana

Rutsjeʼená unda ixi sunthusayeʼena Jehová ínchi jeʼe rinao jiʼi thengijnaná para suthikauʼana thi tjago ni icha. Tsjeʼera VIDEO.

VIDEO: Juasaya ixi batsuan thi ndua (5:16)

Tsjeʼera Salmo 91:14 ko tjaura de jiʼi:

Si tsjaguná ke jeʼo Jehová thjueʼená ko nthusayeʼena, keʼe sincheʼe jeʼe ixi jaʼana.

6. Nthasayaana Dio are xrathená

Tsjená ko nthacomentaana are xrathená ngai congregación, nthasayaana Jehová ko kai nthasuji chiana naana ko inaana. Tsjeʼera Salmo 22:22 ko tjaura de jiʼi: