Hitantsika tamy fianara taloha teo iny hoe tsy ty fivavaha iaby ro ekè-Ndranahary. Fe misy raha azontsika atao mba ho ekeny ty fanompoantsika azy. Fivavaha manao akory ro ekè-Ndranahary? (Jakoba 1:27) Diniho moa ty raha ampianarini-Baiboly.

1. Tokony hiory amin’ino ty fanompoantsika a-Ndranahary?

Tokony hiory amy Baiboly ty fanompoantsika a-Ndranahary. Nivola ho zao Jesosy: “Ty [safà-Ndranahary] ro fahamarina.” (Jaona 17:17) Tsy midary ty fahamarina amy Baiboly ao ty fivavaha sisany. Soloan-drozy amy fampianaran’olombelo noho ty fomban-draza raha rey, kanefa tsy teani-Jehovah mihintsy ze olo tsy manoriky ty didiny. (Vakio Marka 7:9.) Fa laha tsika tsy miala amy ty Baiboly sady manoriky ty torohevitsy anatiny ao, le hampifalifaly ty fony.

2. Akory ty tokony hanompoantsika ani-Jehovah?

Tokony hanompo ani-Jehovah raiky avao tsika satria ie ro Mpamoro antsika. (Apokalypsy 4:11) Midika zay fa tokony ho ie avao ro teantsika noho ivavahantsika. Tsy mety mihintsy zany laha mampiasa sary na sarivongana na raha hafa tsika mba hivavaha aminy.​—Vakio Isaia 42:8.

Tokony ho ‘masy noho mahazo hatò’ amy Jehovah ty fanompoa ataontsika. (Romanina 12:1) Midika zay fa tokony horihintsika amy ty fiainantsika ty didiny. Laha ta hahazo hatò aminy, ohatsy, tsika le mila manoriky ty lalànany mikasiky ty fanambalea. Tsy hanao raha hanimba ty vatantsika koa tsika, ohatsy hoe hitroky sigara na jamala na hino toaky maro marè. a

3. Manino tsika ro tokony hanompo ani-Jehovah miaraky amin’olo hafa?

Ty fivoria ataontsika saky herinandro, le ahafahantsika ‘midera ani-Jehovah amy fiangona eo.’ (Salamo 111:1, 2) Midera azy zao tsika lafa mihira am-pivoria any. (Vakio Salamo 104:33.) Manasa antsika hamonjy fivoria Jehovah satria teany tsika sady hainy hoe hanampy antsika hahazo tavy ty fiaina raha zay. Afaky mifampahery koa tsika lafa miaraky mivory, le mahasoa antsika raha zay.

 DINIHO LALIKY

4. Tsy tokony hampiasa sarivongana tsika lafa mivavaky

5. Tsy voafitakini-hevitsy diso sasy tsika lafa manompo ani-Jehovah raiky avao

 6. Manompo a-Ndranahary tsika lafa mivory

Midera ani-Jehovah noho mampahery olo tsika lafa mandramby anjara amy hira noho valin-teny am-pivoria any. Vakio Salamo 22:22, bakeo iaraho midiniky fanontanea retoa:

• Teanao va ty maharè valin-teny ataon’olo lafa am-pivoria any?

• Teanao va ty manoma mialoha ty valin-teny hataonao am-pivoria any?

7. Falifaly Jehovah lafa volanintsika amin’olo hafa ty raha nianarantsika

Misy fomba sankarazany azontsika ivolana ty fahamarina amy Baiboly ao amin’olo hafa. Vakio Salamo 9:1 noho 34:1, bakeo iaraho midiniky fanontanea toy:

• Ino amy ty raha nianaranao amy Baiboly ao ro teanao horesahy amin’olo?

 FAMINTINA

Falifaly Mpamoro antsika iny lafa manompo azy raiky avao tsika, midera azy am-pivoria any, le miresaky amin’olo hafa ty raha nianarantsika.

Famerena

• Aia ty ahaizantsika ty raha tokony hatao mba hanompoa a-Ndranahary?

• Manino tsika ro tokony hanompo ani-Jehovah raiky avao?

• Manino tsika ro tokony hanompo ani-Jehovah miaraky amin’olo ta hampifalifaly azy?