WEKELO 14
Ngande wakoka ɔtɛmwɛlɔ aso ngɛnyangɛnya Nzambi?
Oko wakatakɛtshanya lo wekelo wetshi, aha ɛtɛmwɛlɔ tshɛ mbangɛnyangɛnya Nzambi. Koko, sho kokaka ntɛmɔla Otungi aso lo yoho yɔɔngɛnyangɛnya. Ko “ɔtɛmwɛlɔ” akɔna wɔɔngɛnyangɛnya? (Jakɔba 1:27) Tɔsɛdingole kɛnɛ ketsha Bible.
1. Ɔtɛmwɛlɔ aso pombaka mpikama lo na?
Ɔtɛmwɛlɔ aso pombaka mpikama lo Bible. Yeso akatɛ Nzambi ate: “Ɔtɛkɛta ayɛ wekɔ mɛtɛ.” (Joani 17:17) Ɛtɛmwɛlɔ ɛmɔtshi mɔnyɔlaka akambo wa mɛtɛ watanema l’Ɔtɛkɛta wa Nzambi wakasambiyama, Bible. Vɔ mbɔhɛnyaka la wetshelo ndo la mbekelo y’ashidi. Koko Jehowa hangɛnangɛna wanɛ ‘wɔnyɔla ɛlɛmbɛ ande.’ (Adia Makɔ 7:9.) Lo wedi okina, sho ngɛnyangɛnyaka Nzambi etena kahikama ɔtɛmwɛlɔ aso lo Bible ndo kayelaso alako wa lɔkɔ.
2. Ngande wahombaso ntɛmɔla Jehowa?
Sho pombaka ntɛmɔla Jehowa ndamɛ oto nɛ dia nde mbele Otungi aso. (Ɛnyɛlɔ 4:11) Kɛsɔ nembetshiyaka dia sho pombaka mboolanga ndo mbɔɔtɛmɔla paka ndamɛ, aha la nkamba la dikishi kana la esato.—Adia Isaya 42:8.
Ɔtɛmwɛlɔ aso pombaka monga “w’ekila ndo wetawɔma” le Jehowa. (Rɔmɔ 12:1) Kɛsɔ nembetshiyaka dia sho pombaka kitanyiyaka ɛlɛmbɛ ande wendana la lɔkɛwɔ. Ɛnyɛlɔ, wanɛ walanga Jehowa, nangaka ndo ndjelaka ɛlɛmbɛ ande wendana la diwala. Ndo vɔ mbewɔka ditshelo dia kɔlɔ, diele oko ɔnwɛlɔ wa mfɔka, didjoyadjoya ndo wodjwelo wa wanu. a
3. Lande na kahombaso ntɛmɔla Jehowa kaamɛ l’asekaso ambetawudi?
Nsanganya yɔtɔso lomingu la lomingu toshaka diaaso dia ‘ntombola Jehowa lo etshumanelo.’ (Osambo 111:1, 2) Yoho mɔtshi yasalaso dikambo sɔ ele lo ntombola Nzambi la esambo. (Adia Osambo 104:33.) Jehowa tɔlɔmbaka dia mbɔtɔka lo nsanganya nɛ dia nde tolangaka ndo mbeyaka dia yɔ yayotokimanyiya dia ngɛnangɛnaka la lɔsɛnɔ pondjo pondjo. Lo nsanganya, sho keketshaka anto akina ndo vɔ tokeketshaka.
NYOMOTSHIMOLA
Tɔsɛdingole lande na kele Jehowa hetawɔ sho nkamba l’esato l’ɔtɛmwɛlɔ aso. Eka toho t’amɛna takokaso ntombola Nzambi.
4. Hatohombe nkamba l’esato l’ɔtɛmwɛlɔ aso
Ngande weyaso dia nsala dikambo sɔ ayonyangiya Nzambi? Nyende VIDƐO, ndo oma laasɔ, nyɔkɛtshanya dimbola diayela nɛ:
-
Kakɔna kakatombe etena kakahembe ekambi ɛmɔtshi waki Nzambi wa lo nshi yakafundamaka Bible dia mbɔtɛmɔla l’ekimanyielo k’ekishi kɛmɔtshi?
Anto amɔtshi kambaka la esato etena katɛmɔlawɔ Nzambi nɛ dia vɔ nangaka ndeka ndjaoka suke la nde. Onde tshelo shɔ koka mbawanganya la Nzambi? Nyadia Etombelo 20:4-6 ndo Osambo 106:35, 36, ndo oma laasɔ, nyɔkɛtshanya ambola anɛ:
-
Naa diangɔ kana esato wakayɛnyi anto wakamba la diɔ l’ɔtɛmwɛlɔ awɔ?
-
Naa kanyi yele la Jehowa lo kɛnɛ kendana l’okambelo wa l’esato?
-
Naa kanyi yaso lo kɛnɛ kendana l’okambelo wa l’esato?
5. Ntɛmɔla Jehowa ndamɛ oto totshungolaka oma lo tokanyi ta kɔlɔ
Enda woho wele ntɛmɔla Jehowa lo yoho yetawɔnde koka totshungola oma lo tokanyi ta kɔlɔ. Nyende VIDƐO.
Nyadia Osambo 91:14, ndo oma laasɔ, nyɔkɛtshanya dimbola nɛ:
-
Kakɔna kalaka Jehowa dia tosalɛ naka sho mɛnya dia sho mbookaka ngandji lo mbɔɔtɛmɔlaka ndamɛ oto?
6. Sho tɛmɔlaka Nzambi lo nsanganya ya l’etshumanelo
Sho tombolaka Jehowa ndo keketshanaka lam’asaso lo membaka esambo ndo lo mbishaka kɔmatɛrɛ lo nsanganya ya l’etshumanelo. Nyadia Osambo 22:22, ndo oma laasɔ, nyɔkɛtshanya ambola anɛ:
-
Onde wɛ akangɛnangɛna mboka kɔmatɛrɛ yashama lo nsanganya?
-
Onde wɛ nangaka ndjalɔngɔsɔla dia tosha kɔmatɛrɛ kɛmɔtshi?
7. Jehowa ngɛnangɛnaka etena katɛso anto akina kɛnɛ kekaso
Ekɔ toho efula takokaso mbutɛ anto akina akambo wa mɛtɛ wa lo Bible. Nyadia Osambo 9:1 ndo 34:1, ndo oma laasɔ, nyɔkɛtshanya dimbola nɛ:
-
Naa dikambo dimɔtshi diakayeke oma lo Bible dialangayɛ mbutɛ onto okina?
ANTO AMƆTSHI MBUTAKA ƆNƐ: “Hatokoke ngɛnyangɛnya Nzambi.”
-
Naa kanyi yayɛ lo dikambo sɔ?
LO TSHENA PE
Sho ngɛnyangɛnyaka Otungi aso etena kɔɔtɛmɔlaso ndamɛ oto, kootombolaso lo nsanganya ya l’etshumanelo, ndo etena katɛso anto akina kɛnɛ kamboteka.
Ovuswelo
-
Ngande wakokaso mbeka dia ntɛmɔla Nzambi lo yoho yetawɔnde?
-
Lande na kahombaso ntɛmɔla Jehowa ndamɛ oto?
-
Lande na kahombaso ntɛmɔla kaamɛ l’anto akina walanga ngɛnyangɛnya Nzambi?
SALA EYANGELO
Adia lande na kele womoto ɔmɔtshi ekɔ l’ɔngɛnɔngɛnɔ l’ɔkɔngɔ wa nde mpembola losambi l’ɔtɛmwɛlɔ wa dikishi.
“Bible tshikitanyaka nsɛnɔ y’anto” (Tshoto y’Etangelo, Ngɔndɔ ka dikumi 1, 2011)
Eka kɛnɛ kakoka kokimanyiya dia mbishaka kɔmatɛrɛ lo nsanganya ya l’etshumanelo.
“Totombole Jehowa lo etshumanelo” (Tshoto y’Etangelo, Ngɔndɔ ka ntondo 2019)
Enda woho wakakondja ɔlɔngɔlɔngɔ ɔmɔtshi wahɔ oma lo nsanganya ya l’etshumanelo kaanga mbaki komonga wɔdu le nde dia ndjiɔtɔ.
Anto efula fɔnyaka dia kurusɛ kekɔ didjidji dia Lokristo, ko onde sho pombaka nkamba la tɔ l’ɔtɛmwɛlɔ aso?
“Lande na kele Ɛmɛnyi wa Jehowa hawokambe la kurusɛ l’ɔtɛmwɛlɔ awɔ?” (Sawo dia l’Ɛtɛrnɛtɛ)
a Akambo asɔ tayoyakɛtshanya lo waa wekelo w’otsha l’ekomelo.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
