CIIYO 14
Mbuti Bukombi Bwesu Mbobukonzya Kumukkomanisya Leza?
Mbubwenya mbotwakaiya muciiyo cainda, tazili zikombelo zyoonse zimukkomanisya Leza. Nokuba boobo, tulakonzya kumukomba Mulengi wesu munzila njakkomanina. ‘Mbukombi’ naa ncikombelo nzi cimukkomanisya Leza? (Jakobo 1:27) Amubone Bbaibbele ncoliyiisya.
1. Ino bukombi bwesu bweelede kuyaama anzi?
Bukombi bwesu bweelede kuyaama a Bbaibbele. Jesu wakaambila Leza kuti: “Jwi lyako nkasimpe.” (Johane 17:17) Zikombelo zimwi tazikabikkili maano kasimpe kajanika mu Jwi lya Leza lyakasololelwa amuuya, Bbaibbele. Zibikkila maano kunjiisyo zyabantu alimwi atunsiyansiya. Pele Jehova tabakkomanini aabo ‘baubikka ambali mulawo wa Leza.’ (Amubale Marko 7:9.) Kulubazu lumwi, tulamukkomanisya Leza ciindi notukakatila kululayo lwamu Bbaibbele akulutobela.
2. Mbuti mbotweelede kumukomba Jehova?
Tweelede kukomba buyo Jehova alikke, nkaambo ngo Mulengi wesu. (Ciyubunuzyo 4:11) Eeci caamba kuti tweelede kumuyanda alimwi akukomba buyo nguwe alikke, kakunyina kubelesya zibumbwa naa mituni.—Amubale Isaya 42:8.
Bukombi bwesu bweelede kuti ‘kabusalala akuzuminwa’ a Jehova. (Baroma 12:1) Eeci caamba kuti tweelede kupona kweelana azyeelelo zyakwe zyakulilemeka. Mucikozyanyo, aabo bamuyanda Jehova balaziyanda alimwi akuzitobela zyeelelo zyakwe zyalukwatano. Alimwi balazitantamuka zilengwa zibyaabi, mbuli kufweba, kubelesya misamu iikola naa kuciindizya kunywa bukoko. a
3. Nkaambo nzi ncotweelede kumukomba Jehova antoomwe abasyomima?
Miswaangano yesu yansondo ansondo itupa coolwe ‘cakutembaula Jehova mumbungano.’ (Intembauzyo 111:1, 2) Nzila imwi motucita boobu, nkwiinda mukwiimba nyimbo zyakutembaula Leza. (Amubale Intembauzyo 104:33.) Jehova utukulwaizya kuti katujanika kumiswaangano lyoonse, nkaambo ulatuyanda alimwi ulizyi kuti kucita boobu kuyootugwasya kupona buumi butamani. Kumiswaangano tulakulwaizyanya.
AMWIIYE ZINJI
Atulange-lange kaambo Jehova ncatazikkomanini zikombelo zibelesya mituni. Amwiiye nzila ziyandika kapati motukonzya kumutembaula Leza.
4. Tatweelede kubelesya mituni mubukombi bwesu
Ino tuzyi buti kuti kucita boobu takumukkomanisyi Leza? Atweebelele VIDIYO, akubandika mubuzyo uutobela.
-
Ncinzi cakacitika ciindi bantu ba Leza bakaindi nobakasola kumukomba kwiinda mukubelesya mituni?
Bantu bamwi basola kuba acilongwe a Leza kwiinda mukubelesya mituni mubukombi bwabo. Pele kucita boobu takubapi kuba acilongwe anguwe. Amubale Kulonga 20:4-6 a Intembauzyo 106:35, 36, akubandika mibuzyo eeyi:
-
Ino nzintu nzi naa mituni nzi njomwakabona bantu kababelesya mubukombi bwabo?
-
Ino Jehova ulimvwa buti kujatikizya kubelesya mituni?
-
Ino nywebo mulimvwa buti?
5. Kukomba buyo Jehova alikke kulatwaangulula kumizeezo iitaluzi
Amubone kukomba Jehova munzila iiluzi mbokukonzya kutwaangulula kumizeezo iitaluzi. Atweebelele VIDIYO.
Amubale Intembauzyo 91:14, akubandika mubuzyo ooyu:
-
Ino Jehova utusyomezya nzi ciindi notutondezya kuti tulamuyanda kwiinda mukukomba buyo nguwe alikke?
6. Tulamukomba Leza kumiswaangano yambungano
Tulamutembaula Jehova kwiinda mukwiimba alimwi akwiingula lyamiswaangano yambungano. Amubale Intembauzyo 22:22, akubandika mibuzyo eeyi:
-
Sena mulabukkomanina bwiinguzi bupegwa lyamiswaangano?
-
Sena inga mwayanda kulibambila kuyoopa bwiinguzi?
7. Jehova ulakkomana kapati ciindi notwaambila bamwi nzyotwiiya
Kuli nzila zinji nzyotukonzya kubelesya kwaambila bamwi kasimpe kamu Bbaibbele. Amubale Intembauzyo 9:1 a 34:1, akubandika mubuzyo ooyu:
-
Ncinzi ncomwaiya mu Bbaibbele ncomuyanda kuyakwaambila bamwi?
BAMWI BAAMBA KUTI: “Leza ulazikkomanina zikombelo zyoonse, aboobo tacikwe makani ambotumukomba.”
-
Ino nywebo muyeeya buti?
MUBUFWAAFWI
Tulamukkomanisya Mulengi wesu, ciindi notukomba buyo nguwe alikke, notumutembaula lyamiswaangano yambungano, anotwaambila bamwi nzyotwakaiya.
Ncinzi Ncomwaiya?
-
Mbuti mbotukonzya kwiiya kukomba Leza munzila njakkomanina?
-
Nkaambo nzi ncotweelede kukomba buyo Jehova alikke?
-
Nkaambo nzi ncotweelede kukomba Leza antoomwe abantu ibayanda kumukkomanisya?
AMUZYIBE ZINJI
Mucibalo cakuti ”Ndakacileka Kukomba Mituni,” amubale mukaintu umwi mbwaakacileka kukommba mituni.
“Ibbaibbele Lilakonzya Kubacinca Bantu” (Ngazi Yamulindizi, July 1, 2011)
Amwiiye cikonzya kumugwasya kupa bwiinguzi lyamiswaangano yambungano.
“Amumutembaule Jehova Mumbungano” (Ngazi Yamulindizi, January 2019)
Amubone mwaalumi umwi uucili mwana-mwana mbwaakagwasyigwa amiswaangano yambungano nokuba kuti tiicakali cuuba-uba kulinguwe kujanika.
Bantu banji basyoma kuti ciingano ciiminina Bunakristo, pele sena tweelede kucibelesya mubukombi bwesu?
“Nkaambo Nzi Bakamboni ba Jehova Ncobatabelesyi Ciingano Mubukombi Bwabo?” (Cibalo caaintaneti)
a Twaambo ootu tuyoobandikwa muziiyo zili kumbele.
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
