CHIIYO 14
Kujana Twamukomba Biyeni Leza Munzila Njayanda?
Mbuli mbutuyoobona muchiiyo chitobela, teezyoonse pe zikombelo zichita ziyandwa aJehova. Nikuba boobo, tulakonzya kukomba Mulengi wesu munzila njayanda. Pesi mbuubuli “ibukombi” bubotezya Leza? (Jakobo 1:27) Atubone nzilyaamba Bbayibbele.
1. Zintu nzitusyoma zyeelede kuzwa aali?
Zintu nzitusyoma zyeelede kuzwa muBbayibbele. Jesu wakaamba kuti: “Ijwi lyako nkasimpe.” (Johane 17:17) Zilawusisya kuti bapati bazikombelo tabayiisyi bantu kasimpe kali muJwi lyaLeza. Pesi bayiisya bantu zintu nzibayeeya. Jehova tabayandi pe bantu babikka “ambali mulawo wa Leza.” (Bala Marko 7:9.) Kuti twatobela milawu ili muBbayibbele, Jehova ulabotelwa.
2. Tweelede kumukomba biyeni Jehova?
Mbukunga Jehova Mulengi wesu, uyanda kuti tukombe nguwe alikke. (Ciyubunuzyo 4:11) Eezi zyaamba kuti tweelede kumuyanda alubo tweelede kumukomba katutabelesyi zibumbwa naakuti zifanikisyo.—Bala Isaya 42:8.
Bukombi bwesu bweelede ‘kusalala alubo buzuminwa’ aaJehova. (Baroma 12:1) Eezi zyaamba kuti tweelede kupona kweendelana amilawu yakwe. Bantu bayanda Jehova balayiswiilila milawu yakwe ili atala alukwatano. Tababelesyi minsamu iikola mbuli kufwepa polya naakuti kunywa bukande zyiindilide. *
3. Nkamboonzi nitweelede kukomba Jehova katulaamwi abakombima?
Miswaangano yesu itupa mweenya ‘wakutembawula Jehova mumbungano.’ (Intembauzyo 111:1, 2) Imwi nzila yakuchita eezi nkwiimba nyimbo zyakutembawula Leza. (Bala Intembauzyo 104:33.) Jehova uyanda kuti katunjila miswaangano nkaambo ulizi kuti kuchita oobo kupa kuti tubotelwe lino akuti tukabotelwe kukabe kutamani. Miswaangano ipa kuti tujane chiindi chakusungwaazyania abakombima.
YIYA ZYIINGI
Bona kuti nkamboonzi Jehova natayandi kuti tumukombe katubelesya zifanikisyo. Bona nzila nzukonzya kubelesya kuti utembawule Leza.
4. Tatweelede kukomba Jehova katubelesya zifanikisyo
Tuzizi biyeni kuti kubelesya zifanikisyo takumubotezyi pe Leza? Mweebele KAVIDIYO, mpawo musandule mubuzyo uutobela.
-
Niinzi chakachitika chiindi bakombi baLeza nibakamukomba kababelesya zibumbwa?
Bamwi bantu bayeeya kuti Leza ulakonzya kubaswiilila kuti bamukomba kababelesya zifanikisyo. Pesi kuchita oobo kupa kuti Leza atabaswiilili pe. Bala Kulonga 20:4-6 a Intembauzyo 106:35, 36, mpawo musandule mibuzyo iitobela:
-
Nziizili zifanikisyo zibelesegwa abamwi mumacheechi?
-
Jehova ukubona biyeni kubelesya zifanikisyo?
-
Iwe ukubona biyeni kubelesya zifanikisyo?
5. Kukomba Jehova kulatwaangununa kunjiisyo zyakubeja
Bona kukomba Jehova mbukutwaangununa kunjiisyo zyakubeja. Mweebele VIDIYO.
Bala Intembauzyo 91:14, mpawo musandule mubuzyo uutobela:
-
Jehova wakatusyomezya kuti uzootuchitilaanzi kuti twakomba nguwe alikke?
6. Kumiswaangano yesu tukomba Leza
Nitusandula akwiimba kumiswaangano nga tulikulumbayizya Jehova akusungwaazya bamwi. Bala Intembauzyo 22:22, mpawo musandule mibuzyo iitobela:
-
Zilakusungwaazya na nsandulo zipegwa kumiswaangano?
-
Ulayanda na kulibambila kuti ukasandule kumiswaangano?
7. Jehova ulabotelwa kuti twabuzya bamwi nzitwiiya
Tulakonzya kubelesya nzila zisiyene-siyene kubuzya bamwi kasimpe kali muBbayibbele. Bala Intembauzyo 9:1 a 34:1, mpawo musandule mubuzyo uutobela:
-
Muzintu nzwaakayiya muBbayibbele, nziizili nzuyanda kubuzya bamwi?
BAMWI BAAMBA KUTI: “Tazichiti pe kuti tubotezye Leza.”
-
Aniwe utyeni?
CHIFWIINSYO
Kukomba Leza alikke, kunjila miswaangano akubuzya bamwi nzitwayiya kupa kuti Mulengi wesu abotelwe.
Mibuzyo Yakwiindulula
-
Kujana twiiziba biyeni nzila Jehova njayanda kuti tumukombaayo?
-
Nkamboonzi nitweelede kukomba Jehova alikke?
-
Nkamboonzi nitweelede kukomba Leza katulaamwi abakombi bakwe?
YANDUULISISYA
Bona zyakapa kuti umwi mwanakazi abotelwe naakaleka kukomba zibumbwa.
“Tandichili Muzike Wazibumbwa” (Ngaziyakulinda, July 1, 2011)
Bona zikonzya kukugwasya kuti ukasandule kumiswaangano.
“Tembawula Jehova Mumbungano” (Ngaziyakulinda, January 2019)
Bona umwi mwaalumi mbaakagwasigwa akunjila miswaangano nikuba kuti kwakali kumuyumina kuchita oobo.
Bantu biingi bakomba babelesya chiingano, iswe tweelede kuchibelesya na?
“Nkamboonzi Bakamboni baJehova Nibatabelesyi Chiingano?” (Chiiyo chijanika aaIntaneti)
^ Nkani eezi ziyoowambuulwa muzyiiyo zitobela.
