Sugad han ginhisgotan han nahiuna nga leksyon, diri ngatanan nga relihiyon nakakapalipay ha Dios. Pero puydi naton singbahon an aton Maglalarang ha paagi nga makakapalipay ha iya. Ano nga “paagi han pagsingba [o, relihiyon]” an nakakapalipay ha iya? (Santiago 1:27, footnote) Hibaroi kon ano an igintututdo han Biblia.

1. Diin kinahanglan ibasar an aton pagsingba?

An aton pagsingba kinahanglan ibasar ha Biblia. Hi Jesus nagsiring ha Dios: “An imo pulong kamatuoran.” (Juan 17:17) Iginbalewaray han iba nga relihiyon an kamatuoran nga aada ha giniyahan nga Pulong han Dios, an Biblia. Ira ito ginbalyoan hin mga katutdoan ngan tradisyon han tawo. Pero diri nalilipay hi Jehova ha mga ‘nagbabalewaray ha sugo han Dios.’ (Basaha an Marcos 7:9.) Ha luyo nga bahin, napapalipay naton an iya kasingkasing kon iginbabasar naton an aton pagsingba ha Biblia ngan ginsusunod an mga sagdon hito.

2. Ano an husto nga paagi han pagsingba kan Jehova?

Hi Jehova gud la an angay kumarawat han aton eksklusibo nga debosyon kay hiya an aton Maglalarang. (Pahayag 4:11) Karuyag sidngon, kinahanglan higugmaon naton hiya ngan hiya gud la an aton singbahon, nga diri nagamit hin bisan ano nga idolo, imahen, o ladawan.—Basaha an Isaias 42:8.

An aton pagsingba kinahanglan “baraan ngan kinakarawat” ni Jehova. (Roma 12:1) Karuyag sidngon, kinahanglan kita magkinabuhi uyon ha iya mga suruklan ha moral. Pananglitan, an mga nahigugma kan Jehova nahigugma ngan nasunod ha iya mga suruklan ha pag-asawa. Ngan ginlilikyan nira an nakakadaot nga mga buhat sugad han pagtabako, pagdroga, o paghubog. a

3. Kay ano nga kinahanglan naton singbahon hi Jehova kaupod an aton mga igkasi-tumuroo?

Ha aton sinemana nga mga katirok, may higayon kita nga ‘dayawon hi Jehova ha kongregasyon.’ (Salmo 111:1, 2) An usa nga paagi nga mahihimo naton ini amo an pagkanta hin mga pagdayaw ha Dios. (Basaha an Salmo 104:33.) Ginsusugo kita ni Jehova nga umatender ha mga katirok tungod kay hinigugma kita niya ngan maaram hiya nga mabulig ito ha aton nga mabuhi hin malipayon ha waray kataposan. Ha mga katirok, gindadasig naton an iba ngan nadadasig liwat kita.

 DUGANG NGA USISAHA

4. Diri kita angay gumamit hin mga imahen ha aton pagsingba

5. Kon hi Jehova la an aton sisingbahon magkakaada kita kagawasan tikang ha buwa nga katutdoan

 6. Ginsisingba naton an Dios ha mga katirok ha kongregasyon

Gindadayaw naton hi Jehova ngan gindadasig an usa kag usa pinaagi ha pagkanta ngan pagkomento ha mga katirok ha kongregasyon. Basaha an Salmo 22:22, katapos, hisguti niyo ini nga mga pakiana:

• Nag-i-enjoy ka ba pagpamati han mga komento ha mga katirok?

• Karuyag mo ba mangandam para makagkomento ka?

7. Nalilipay hi Jehova kon ginsusumat naton ha iba an aton nahibabaroan

Damu an mga paagi nga maisusumat naton ha iba an mga kamatuoran ha Biblia. Basaha an Salmo 9:1 ngan 34:1, katapos, hisguti niyo ini nga pakiana:

• Ano an imo nahibaroan ha Biblia nga karuyag mo isumat ha iba?

 SUMARYO

Napapalipay naton an aton Maglalarang kon hiya la an aton ginsisingba, gindadayaw naton hiya ha mga katirok ha kongregasyon, ngan ginsusumat naton ha iba an aton mga nahibabaroan.

Repaso

• Diin naton mahibabaroan kon paonan-o naton sisingbahon an Dios ha paagi nga iya kinakarawat?

• Kay ano nga hi Jehova gud la an angay naton singbahon?

• Kay ano nga kinahanglan magsingba kita kaupod an mga naruruyag nga mapalipay an Dios?