GURUY NI 14
Uw Rogon ni Nge M’agan’ Got ko Liyor Rodad?
Kad weliyed ko fa binem e guruy ni gathi gubin raba’ e teliw nib m’agan’ Got ngay. Machane rayog ni ngad liyorgad ngak e En Ke Sunmiydad u reb e kanawo’ nra felfelan’ ngay. Ere uw rogon e re miti “liyor” nib m’agan’ ngay? (James 1:27) Ngad guyed e n’en be yog e Bible.
1. Uw rogon ni ngad nanged rogon ni ngad liyorgad ngak Got u reb e kanawo’ nib m’agan’ ngay?
Rayog ni ngad filed e re n’ey u Bible. I gaar Jesus ngak Got: “Mu fil ngorad e tin nib riyul’, ni er e thin rom.” (John 17:17) Bay boch e teliw ndarur folgad ko tin riyul’ ni bay ko Thin rok Got ni kan thagthagnag ni aram e Bible, ma ke mang machib ko girdi’ nge yalen rorad e yad ma fol riy. Machane de m’agan’ Jehovah ko piin kar “n’iged e motochiyel rok.” (Mu beeg e Mark 7:9.) Ere faan gad ra guy rogon ni nge puluw e liyor rodad ko n’en be yog e Bible ma gad fol ko pi fonow riy, ma aram e gad ra felfelan’nag Got.
2. Uw rogon nsusun e ngad liyorgad ngak Jehovah?
Bochan ni Jehovah e Ir e Ke Sunmiydad, ma aram fan nsusun e yigoo ir e ngad liyorgad ngak. (Revelation 4:11) Re n’ey e be yip’ fan nthingari t’uf rodad, ma kemus ni yigoo ir e ngad liyorgad ngak ndab da fanayed e liyos ara yugu boch ban’en.—Mu beeg e Isaiah 42:8.
Liyor rodad ngak Jehovah e thingari machalbog miki “fel’ u wan’.” (Roma 12:1) Re n’ey e be yip’ fan nib t’uf ni ngad folgad ko pi motochiyel rok. Bod ni piin nib t’uf Jehovah rorad e ba ga’ fan u wan’rad e pi motochiyel rok u murung’agen e mabgol ma yad ma fol riy. Yad ma siyeg boch ban’en nib kireb ni yima mecham ngay ni bod e tamagow, ara langad, ara falay ni kireb, ara alkul. a
3. Mang fan nsusun e ngad uned ngak e piin taareb e michan’ rodad ngad liyorgad ngak Jehovah u taabang?
Muulung ni gad ma tay u gubin e wik e ma bing e kanawo’ ngodad ni ngad ‘pininged e sorok ngak Somol . . . u lan e muulung ko girdi’ rok.’ (Psalm 111:1, 2) Reb e kanawo’ ni gad ma rin’ e re n’ey riy e aram e gad ma yon’ boch e tang ni ngad pininged e sorok riy ngak Got. (Mu beeg e Psalm 104:33.) Ma yog Jehovah ngodad ni ngad uned ko muulung ni bochan e gad ba t’uf rok, ma manang nra ayuwegdad e re n’ey ni ngad pared ndariy n’umngin nap’an ni gad ba felfelan’. Nap’an ni gad ra un ko muulung, ma aram e gad be pi’ e athamgil nga laniyan’ yugu boch e girdi’ maku yad be pi’ e athamgil nga lanin’dad.
KUM FIL BOCH BAN’EN U MURUNG’AGEN
Mu fil fan nde m’agan’ Jehovah ngay ni ngaud fanayed e liyos ni fan ko liyor rodad. Mu fil boch e kanawo’ nib ga’ fan nrayog ni ngad pininged e sorok riy ngak Got.
4. Susun e dab da fanayed e liyos ni fan ko liyor rodad
Uw rogon ni kad nanged ni faan gad ra rin’ e re n’ey, ma aram e de m’agan’ Got ngay? Mu yaliyew e re VIDEO ney, mi gimew weliy e fulweg ko re deer ni baaray.
-
Mang e buch u nap’an ni guy boch e girdi’ rok Got kakrom rogon ni ngar liyorgad ngak ni yad be fanay e liyos?
Bay boch e girdi’ ni yad ma fanay e liyos ni fan ko liyor rorad ngak Got ni bochan e yad be lemnag ni aram rogon nrayog ni ngar chugurgad ngak. Machane gur, gathi aram e n’en nra palognag Got rorad? Mu beegew e Exodus 20:4-6 nge Psalm 106:35, 36, mi gimew weliy e fulweg ko pi deer ni baaray:
-
Mang boch ban’en ni kam guy ni ma fanay e girdi’ ni fan ko liyor rorad?
-
Uw rogon u wan’ Jehovah e liyos ni yima fanay ni fan ko liyor?
-
Ga be lemnag nib fel’ ni ngaud fanayed e liyos ni fan ko liyor rodad, fa? Mang fan ni ka mog ni arrogon?
5. Ra yigoo Jehovah e gad be liyor ngak, ma rayog ni ngad pithiged gadad u boch ban’en ni ma mich u wan’uy nde puluw ko Bible
Mu guy rogon nrayog ni ngad pithiged gadad u boch ban’en ni ma mich u wan’uy nde puluw ko Bible ni faan gad ra liyor ngak Jehovah u rogon nib m’agan’ ngay. Mu yaliyew e re VIDEO ney.
Mu beegew e Psalm 91:14, mi gimew weliy e fulweg ko re deer ni baaray:
-
Mang e ke micheg Jehovah nra rin’ ni fan ngodad ni faanra yigoo ir e gad be liyor ngak ni bochan e ba t’uf rodad?
6. Gad ma liyor ngak Got u nap’an e muulung rodad
Gad ra un ko tang ma gad be pi’ e fulweg u nap’an e muulung, ma aram e gad be pining e sorok ngak Jehovah ma gad be pi’ e athamgil nga lanin’dad. Mu beegew e Psalm 22:22, mi gimew weliy e fulweg ko gal deer ni baaray:
-
Ga baadag ni ga ma rung’ag e fulweg ni yima pi’ u nap’an e muulung, fa?
-
Ga baadag ni ngam fal’eg rogon reb e fulweg ni ngam pi’, fa?
7. Ma felfelan’ Jehovah u nap’an ni gad ra weliy e n’en kad filed ko girdi’
Boor e kanawo’ nrayog ni ngad weliyed riy e tin riyul’ u Bible ngak e girdi’. Mu beegew e Psalms 9:1 nge 34:1, mi gimew weliy e fulweg ko re deer ni baaray:
-
Mang reb e ban’en ni kam fil u Bible ni ga baadag ni ngam weliy ngak be’?
MA GAAR BOCH E GIRDI’: “Ma guy Got gum’ircha’dad, ere demtrug rogon ni gad ra liyor ngak ma ra m’agan’ ngay.”
-
Uw rogon ni ga be lemnag?
N’EN KAN FIL
Gad ra felfelan’nag e En Ke Sunmiydad ni faanra yigoo ir e gad be liyor ngak, ma gad be pining e sorok ngak u nap’an e muulung, ma gad be weliy e n’en kad filed ko girdi’.
Ngan Sul u Daken
-
Uw rogon ni ngad nanged rogon ni ngad liyorgad ngak Got u reb e kanawo’ nib m’agan’ ngay?
-
Mang fan nsusun e yigoo Jehovah e ngad liyorgad ngak?
-
Mang fan nsusun e ngad uned ngak e piin yad baadag ni ngar rin’ed e n’en nib m’agan’ Got ngay ngad liyorgad ngak u taabang?
MU GAY MURUNG’AGEN
Mu beeg rogon ni tal be’ nib pin ndaki meybil ko liyos.
Mu beeg murung’agen e n’en nrayog ni nge ayuwegem ni ngam pi’ e fulweg u nap’an e muulung.
“Mu Pining e Sorok ngak Jehovah u Lan e Muulung” (Fare Wulyang ko Damit, January 2019)
Mu guy e n’en ni ayuweg be’ nib pumoon ni nge yib angin e muulung ngak ni yugu aram rogon nde mom ngak ni nge un ko muulung.
Boor e girdi’ ni yad ma lemnag ni kuruth e aram e pow ko Kristiano, machane ba puluw ni ngad fanayed e re n’ey ko liyor rodad, fa?
“Why Don’t Jehovah’s Witnesses Use the Cross in Their Worship?” (Article ni bay ko website)
a Gad ra weliy murung’agen e pi n’ey u lan boch e guruy ko re ke babyor ney.