NÍ KASEMI 15
Mɛnɔ Ji Yesu?
Yesu piɛɛ nihi nɛ a he biɛ wawɛɛ ngɛ yinɔ sane mi ɔ a he. Nihi babauu le e biɛ, se a li níhi fuu kɛ kɔ e he. Nihi fuu hu hɛɛ susumi slɔɔtoslɔɔtohi ngɛ nɔ tutuutu nɛ Yesu ji ɔ he. Se mɛni Baiblo ɔ de kɛ kɔ Yesu he?
1. Mɛnɔ ji Yesu?
Yesu ji mumi mi adebɔ nɔ́ ngɛ hiɔwe nɛ́ e ngɛ he wami wawɛɛ. Yehowa Mawu bɔ lɛ kekle loko e bɔ ní kpahi tsuo. Enɛ ɔ he ɔ, a tsɛɛ lɛ ke, “kekleekle bi ngɛ bɔ níhi tsuo a kpɛti.” (Kolose Bi 1:15) Baiblo ɔ de ke Yesu ji Mawu “bi kake too” ejakaa Yesu pɛ nɛ Yehowa bɔ lɛ tɛɛ. (Yohane 3:16) Yesu kɛ e Tsɛ Yehowa pee kake kɛ tsu ní, nɛ e piɛɛ e he kɛ bɔ ní kpahi tsuo. (Kane Abɛ 8:30.) Loloolo ɔ, huɛ bɔmi gbagbanii ngɛ Yesu kɛ Yehowa a kpɛti. E kɛ anɔkuale yemi ngɛ sɔmɔe kaa Mawu munyu nya jelɔ, nɛ e ngɔɔ Mawu sɛ gbi kɛ e blɔ tsɔɔmi kɛ haa Mawu sɔmɔli, enɛ ɔ he ɔ, a tsɛɛ lɛ ke “Munyu ɔ.”—Yohane 1:14.
2. Mɛni he je nɛ Yesu ba zugba a nɔ ɔ?
Maa pee jeha 2,000 ji nɛ ɔ, Yehowa pee nyakpɛ nɔ́ ko. E ngɔ e mumi klɔuklɔu ɔ kɛ je Yesu wami kɛ je hiɔwe kɛ ba wo yiheyo ko nɛ e ji yomiyo, nɛ a tsɛɛ lɛ ke Maria a fɔmi kotoku mi. Enɛ ɔ ha a fɔ Yesu kaa nɔmlɔ adesa. (Kane Luka 1:34, 35.) Yehowa tsɔ Yesu kɛ ba zugba a nɔ kaa Mesia nɛ a wo e he si ɔ, aloo Kristo, konɛ e ba kpɔ adesahi. a Níhi tsuo nɛ Yehowa ha nɛ a gba kɛ fɔ si ngɛ Baiblo ɔ mi kɛ kɔ Mesia a he ɔ ba mi ngɛ Yesu blɔ fami. Enɛ ɔ ha nɛ nihi yɔse kaa Yesu ji “Kristo ɔ, Mawu hɛ kalɔ ɔ Bi ɔ” nɛ.—Mateo 16:16.
3. Jije Yesu ngɛ amlɔ nɛ ɔ?
Benɛ Yesu gbo ɔ, Mawu tle lɛ si kaa mumi mi nɔmlɔ, nɛ e kpale kɛ ho hiɔwe ya. Benɛ e ho hiɔwe ya a, “Mawu wo e nɔ nɛ e ha lɛ blɔ nya nɛ e nɔ kuɔ.” (Filipi Bi 2:9) Amlɔ nɛ ɔ, Yesu ji bɔfo nɛ e ngɛ blɔ nya nɛ nɔ kuɔ ngɛ hiɔwe. Ngɛ anɔkuale mi ɔ, Yehowa pɛ ji nɔ nɛ e nɔ kuɔ pe Yesu.
MOO KASE BABAUU
Moo kase nɔ tutuutu nɛ Yesu ji ɔ he ní fuu, nɛ́ jehanɛ se hu ɔ, o hyɛ nɔ́ he je nɛ e he hia nɛ o kase Yesu he ní ɔ.
4. Pi Yesu ji Mawu Ope ɔ
Baiblo ɔ tsɔɔ kaa Yesu ji mumi mi adebɔ nɔ́ nɛ e ngɛ he wami wawɛɛ ngɛ hiɔwe mohu lɛɛ, se e baa e he si kɛ haa Yehowa, nɛ ji e Tsɛ kɛ e Mawu ɔ. Mɛni he je nɛ wa ma nyɛ ma de jã a? Mo je VIDEO ɔ, nɛ o hyɛ nɔ́ he je nɛ pi Yesu nɔuu kɛ̃ ji Mawu Ope ɔ.
Ngmamihi nɛ nyɛɛ se ɔ maa ye bua wɔ konɛ waa na slɔɔto nɛ ngɛ Yehowa kɛ Yesu a kpɛti. Nyɛɛ kane ngmami ɔmɛ eko fɛɛ eko, nɛ nyɛ susu sane bimihi nɛ nyɛɛ se ɔ he:
Nyɛɛ kane Luka 1:30-32.
-
Kɛ bɔfo ɔ tsɔɔ slɔɔto nɛ ngɛ Yesu kɛ Yehowa Mawu nɛ ji “Hiɔwe Lokoo No ɔ” a kpɛti ɔ mi ha kɛɛ?
Nyɛɛ kane Mateo 3:16, 17.
-
Benɛ a ngɛ Yesu baptisie ɔ, mɛni nɛ gbi nɛ e je hiɔwe ɔ de?
-
Ke o hyɛ ɔ, mɛnɔ nɛ e tu munyu ɔ?
Nyɛɛ kane Yohane 14:28.
-
Ke o hyɛ ɔ, tsɛ kɛ bi ɔ, mɛnɔ lɛ e se kɛ, nɛ e nɔ kuɔ?
-
Mɛni Yesu ngɛ tsɔɔe benɛ e de ke Yehowa ji e Tsɛ ɔ.
Nyɛɛ kane Yohane 12:49.
-
Anɛ Yesu naa e he kaa lɛ nɔuu kɛ̃ ji Tsɛ ɔ lo? Kɛ o susu kɛɛ?
5. Mɛni tsɔɔ kaa Yesu ji Mesia a?
Gbamihi fuu ngɛ Baiblo ɔ mi nɛ kɔɔ Mesia a, nɔ nɛ Mawu maa tsɔ konɛ e ba kpɔ adesahi ɔ he. Gbami nɛ ɔmɛ ye bua nihi nɛ a nyɛ nɛ a yɔse Mesia a. Mo je VIDEO nɛ ɔ nɛ tsɔɔ gbami komɛ nɛ a ba mi ngɛ Yesu blɔ fa mi benɛ e ba zugba a nɔ ɔ.
Nyɛɛ kane Baiblo gbami nɛ ɔmɛ nɛ nyɛ susu sane bimihi nɛ nyɛɛ se ɔmɛ a he:
Nyɛɛ kane Mika 5:2 ɔ, konɛ nyɛɛ na he nɛ a gba kɛ fɔ si kaa a ma fɔ Mesia a ngɛ ɔ. b
-
Anɛ gbami nɛ kɔɔ he nɛ a ma fɔ Yesu ngɛ ɔ he ɔ ba mi lo?—Mateo 2:1.
Nyɛɛ kane La 34:20 kɛ Zakaria 12:10, konɛ nyɛɛ na gbami komɛ nɛ a gba ngɛ Baiblo ɔ mi kɛ kɔ Mesia a gbenɔ he.
-
Anɛ gbami nɛ ɔmɛ ba mi lo?—Yohane 19:33-37.
-
Anɛ o susu kaa Yesu nitsɛ lɛ to blɔ nya konɛ níhi nɛ gbami ɔ de kɛ kɔ e he ɔ nɛ a ba mi ngɛ e blɔ fa mi lo?
-
Mɛni enɛ ɔ tsɔɔ wɔ ngɛ Yesu he?
6. Ke wa kase Yesu he ní ɔ, wa ma ná he se
Baiblo ɔ tsɔɔ kaa e he hia wawɛɛ nɛ waa kase Yesu he ní konɛ waa le níhi nɛ Yesu ngɛ tsue. Nyɛɛ kane Yohane 14:6 kɛ 17:3 ɔ, nɛ nyɛ susu sane bimi nɛ ɔ he:
-
Mɛni he je nɛ e he hia nɛ waa kase Yesu he ní ɔ?
Yesu bli blɔ ha wɔ konɛ waa pee Mawu huɛmɛ. E tsɔɔ nihi anɔkuale nɛ kɔɔ Mawu he ɔ, nɛ kɛ gu Yesu nɔ ɔ, wa ma nyɛ ma ná neneene wami
NI KOMƐ DEƆ KE: “Yehowa Odasefohi he we Yesu yi.”
-
Ke nɔ ko de jã a, mɛni o ma de lɛ?
NYA MWƆMI
Yesu ji mumi mi adebɔ nɔ́ nɛ ngɛ he wami. E ji Mawu Bi, nɛ lɛ kɛ̃ ji Mesia a nɛ.
Mi Nylɔmi
-
Mɛni he je nɛ a tsɛɛ Yesu ke “kekleekle bi ngɛ bɔ níhi tsuo a kpɛti” ɔ?
-
Mɛni ní tsumi Yesu tsu ngɛ hiɔwe loko e ba zugba a nɔ?
-
Kɛ wa plɛ kɛ le kaa Yesu ji Mesia a kɛɛ?
NÍ KPAHI NƐ MAA YE BUA MO
Moo kase Yesu ní tsumi kaa Mesia a he ní fuu.
“Anɛ Gbamihi Nɛ Kɔɔ Mesia a He ɔ Maa Nɔ Mi Kaa Yesu Ji Mesia a Lo?” (Munyu nɛ ɔ ngɛ Intanɛti ɔ nɔ)
Moo kane munyu nɛ ɔ nɛ o hyɛ kaa Baiblo ɔ de ke Mawu fɔ Yesu kaa bɔ nɛ adesahi fɔɔ a bimɛ ɔ lo.
“Mɛni He Je Nɛ A Tsɛɛ Yesu Ke Mawu Bi ɔ?” (Munyu nɛ ɔ ngɛ Intanɛti ɔ nɔ)
Moo kase nɔ́ he je nɛ Triniti tsɔɔmi ɔ pi Baiblo tsɔɔmi ɔ.
Moo kane nɔ́ nɛ yo ko de benɛ e hla nɔ́ nɛ Baiblo ɔ de kɛ kɔ Yesu he ɔ.
“Yuda No Ko Tsɔɔ Nɔ́ He Je Nɛ E Susu E Hemi Kɛ Yemi ɔ He Ekohu ɔ” (O Hɛ Nɛ Tsɛ̃!, May 2013)
a Ní Kasemi 26 kɛ 27 ɔ maa ye bua wɔ konɛ waa na nɔ́ he je nɛ e sa nɛ a kpɔ adesahi ɔ, kɛ blɔ nɔ nɛ Yesu gu kɛ kpɔ wɔ.
b Hyɛ Nyagbe Ningma 2 ɔ konɛ o na gbami ko nɛ a gba nɛ tsɔɔ be tutuutu nɛ Yesu ba zugba a nɔ.
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
