OZUMALƐDƖYƐ 15

Aninyia Yɛ Lɛ Gyisɛsɩ a

BƆ́

Mmenii mɔɔ bele dima paa wɔ abakɔsɛmɩ nu nɩ, bo nu ɔkʋ̃ yɛ lɛ Gyisɛsɩ. Naasʋ̃ mmenii sʋ̃maa bézi Gyisɛsɩ bʋwɔ, yi dima la yɛ bezi a. Abiyemmɔ sʋ̃ bɔwɔ adwɩnɩ sʋnʋnkʋ̃ wɔ Gyisɛsɩ nwʋ. Mɩnla yɛ Bayɩbʋlʋ yɩ ɩkã ɩfalɩ yɩ nwʋ a?

1. Aninyia yɛ lɛ Gyisɛsɩ a?

Gyisɛsɩ ɩdɩ sunzuma nu abɔdɩ mɔɔ ɩwɔ tumi mɔɔ ɩda sʋlɔ. Mɛyɩ yɛ Gyehova ilili bɔmʋnlɩ ɩwɔlɩ yɩ ansaana ɩbɔɔ dɩyɛ fʋlɔ bela a. Eyi ti yɛ bɔfʋlɔ yɩ “abɔdɩ munwatĩĩ nu abakanɩ” a. (Kolosiyiamaa 1:15, NWT) Bayɩbʋlʋ yɩ ɩfʋlɔ Gyisɛsɩ kɛɛ Nyamɩnlɩ “yɩ Ɣa ɔkʋ̃tɩnyɩɩ” iluwakɛɛ Gyisɛsɩ nkʋ̃ la yɛ Nyamɩnlɩ ɩwɔlɩ yɩ senyii a. (Dwɔɔnʋ 3:16) Gyisɛsɩ nɩɩ yɩ Zɩ Gyehova bɔwɔlɩ numɔ bɛyɛlɩ egyima na ɩwʋwalɩ yɩ ma ɩwɔlɩ nninyeni mvʋlɔ. (Kɩnga Ɛɣɛlɛwulɛ 8:30.) Gyisɛsɩ ɩla nwʋ la ɩ nɩɩ Gyehova wɔ abusunwawɔlɛ mɔɔ numɔ yɛ sɩ. Ɩlɛ nɔhʋanlɛlilɛ ɩsʋ̃mɩɩ kɛɛ Nyamɩnlɩ yɩ ɛdɩndɛlɛvʋlɔ, “Odwokɔ nɩ,” na ɩfa Nyamɩnlɩ yɩ nɣɩlalɩyɛ nɩɩ yɩ ɔhʋanɩhilelɛ ɩma yɛ.—Dwɔɔnʋ 1:14.

2. Mɩnla ti yɛ Gyisɛsɩ ɩɣalɩ azɩlɛ yɩ zʋ a?

Kɛyɛ alʋbɔ 2,000 mɔɔ idua numɔ nɩ, Gyehova iluwalɩ nnwʋánlɩ ɔhʋanɩ zʋ ɩvalɩ yɩ sunzuma nwanzanwanza ɩmanlɩ baalɛ be mɔɔ nɩ benyia ɩlɛ́falɩ yɩ nwʋ ɩlɛ́kanlɩ yɩ kyɩ̃ mɔɔ bɔfʋlɔ yɩ Mɛɛlɩ ma ɩɣɩnzɛlɩ Gyisɛsɩ. Ɔzɔ ɔhʋanɩ yɩ zʋ yɛ bɔwʋlɩ Gyisɛsɩ kɛɛ enii a. (Kɩnga Luuku 1:34, 35.) Gyisɛsɩ ɩɣalɩ azɩlɛ yɩ zʋ kɛɛ Mɛzaya mɔɔ bɔwɔlɩ yɩ nwʋ anʋhʋba nɩ, anzɛnyɩɩ Kɩlayɩsɩ na ɩɣalɩ ileli adasamaa. a Bayɩbʋlʋ nkɔmɩhyɛ azʋlɔtʋ mɔɔ ɩfalɩ Mɛzaya yɩ nwʋ munwatĩĩ ɩɣalɩ numɔ wɔ yɩ zʋ, na eyi ɩmanlɩ mmenii nwʋnlɩ Gyisɛsɩ kɛɛ “Kɩlayɩsɩ, Ɔdʋmankʋma Nyamɩnlɩ yɩ Ɣa nɩ.”—Matiyu 16:16.

3. Sikalɛyɩ Gyisɛsɩ ɩwɔ ɛhɩnla?

Mmɩlɩ mɔ Gyisɛsɩ yɩ ɛbɩlawɔlɛ kɛɛ enii ɩɣalɩ awielɩyɛ nɩ, bodunwonli yɩ kɛɛ sunzuma na izialɩ ɩhɔlɩ sʋlɔ. Ɛkɛnɩ yɛ “Nyamɩnlɩ ibigyia yɩ sʋlɔ” a. (Fɩlɩpɩmaa 2:9) Sikalɛyɩ Gyisɛsɩ ɩwɔ dibilɛ kezile be mɔɔ mɛyɩ yɛ lɛ kɛɛ sɛ Nyamɩnlɩ íni kɛ a, mɛyɩ yɛ ɩwɔ ɛkɛnɩ a.

SUMÁ SƲ̃MAA

Sumá sʋ̃maa falɩ enii kʋ̃ mɔɔ Gyisɛsɩ ɩdɩ ankasa nɩ nwʋ nɩɩ sianti mɔɔ nwʋmɔ ihyinyia kɛɛ yekozuma yɩ nwʋ dɩyɛ.

4. Gyisɛsɩ ɩ́dɩ Dɩyɛ Munwala Zʋ Tumivʋlɔ Nyamɩnlɩ

Bayɩbʋlʋ ikilehile kɛɛ Gyisɛsɩ ɩdɩ sunzuma nu abɔdɩ mɔɔ ɩwɔ tumi mɔɔ ɩwɔ sʋlɔ dɩyɛ, naasʋ̃ iwula yɩ Nyamɩnlɩ nɩɩ yɩ Zɩ Gyehova tʋ. Mɩnla ti mɔɔ yɛkãã ɔzɔ a? Yɩ́ VIDIYO nɩ na kila mɔɔ Bayɩbʋlʋ yɩ ikilehile ɩfalɩ sʋnʋnkʋ̃ mɔɔ ɩwɔ Gyisɛsɩ nɩɩ dɩyɛ munwala zʋ tumivʋlɔ Nyamɩnlɩ yɩ bɛ dibilɛ nu.

VIDIYO : Asʋ̃ Gyisɛsɩ Kɩlayɩsɩ Yɛ Lɛ Nyamɩnlɩ a? (3:22)

Ɛhɛlɛlɛ ndwokɔ mɔɔ ilili ɔzʋlɔ yɩ ɩbʋwa ma yɛtɩ abusunwawɔlɛ mɔɔ ɩwɔ Gyehova nɩɩ Gyisɛsɩ bɛ avinli nɩ tʋ bʋwɔ. Kɩnga ɛhɛlɛlɛ odwokɔ yi nu ɔkʋ̃ bela, na akʋ̃ bozunzú ndwokɔɣizialɛ mɔɔ ilili ɔzʋlɔ nɩ nwʋ.

Kɩnga Luuku 1:30-32.

Mɩnla yɛ bɔvʋlɔ nɩ ɩhanlɩ ɩvalɩ abusunwawɔlɛ mɔɔ ɩwɔ Gyisɛsɩ nɩɩ “Sʋlɔ Sʋlɔnii,” Gyehova Nyamɩnlɩ bɛ avinli nɩ nwʋ a?

Kɩnga Matiyu 3:16, 17.

Mmɩlɩ mɔ bonumaa Gyisɛsɩ nɩ, mɩnla yɛ nnɩ mɔɔ ɩzʋ̃ sʋlɔ nɩ ɩhanlɩ a?
Ekila a, nɩ ɩdɩ aninyia yɩ nnɩ a?

Kɩnga Dwɔɔnʋ 14:28.

Aninyia yɛ ɩdɩ ebani na ɩwɔ tumi kezile a, ɛzɩlɛ anzɛnyɩɩ ɛɣalɛ?
Gyisɛsɩ ɩvʋlɔlɩ Gyehova kɛɛ yɩ Zɩ. Mɩnla yɛ eyi ɩma yɛnwʋ yɩ a?

Kɩnga Dwɔɔnʋ 12:49.

Asʋ̃ Gyisɛsɩ yɩ adwɩnɩ ɩyɛ yɩ kɛɛ ɩ nɩɩ yɩ Zɩ bɛdɩ enii ɔkʋ̃ a? Kɛ ɔdwɩnɩ nwʋmɔ ese a?

5. Gyisɛsɩ ɩmanlɩ ɩlalɩ ali kɛɛ mɛyɩ yɛ lɛ Mɛzaya nɩ

Nkɔmɩhyɛ sʋ̃maa wɔ Bayɩbʋlʋ yi nu mɔɔ ɩkɔwʋwa mmenii ma bɔkɔnwʋ Mɛzaya nɩ, enii mɔɔ Nyamɩnlɩ ɩyɩ yɩ kɛɛ ile adasamaa nɩ. Yɩ́ VIDIYO nɩ na kila nkɔmɩhyɛ azʋlɔtʋ be mɔɔ Gyisɛsɩ ɩmanlɩ ɩɣalɩ numɔ wɔ mmɩlɩ mɔ ɩɣalɩ azɩlɛ yɩ zʋ nɩ.

VIDIYO: Gyisɛsɩ Ɩmanlɩ Nkɔmɩhyɛ Ɩɣalɩ Numɔ (3:03)

Kɩnga Bayɩbʋlʋ nkɔmɩhyɛ eyimmɔ na akʋ̃ bozunzú ndwokɔɣizialɛ mɔɔ ilili ɔzʋlɔ nɩ nwʋ:

Kɩnga Mika 5:2 na kila dɩka mɔɔ nɩ bɔkɔwʋ Mɛzaya nɩ. b

Asʋ̃ dɩka mɔɔ bɔwʋlɩ Gyisɛsɩ nɩ ɩmanlɩ nkɔmɩhyɛ eyi ɩɣalɩ numɔ a?—Matiyu 2:1.

Kɩnga Ndwomi 34:20 nɩɩ Zakalɩya 12:10 na kila nkɔmɩ be mɔɔ bɛhyɛlɩ bɛvalɩ Mɛzaya yi owulo nwʋ.

Asʋ̃ nkɔmɩhyɛ eyimmɔ ɩɣalɩ numɔ a?—Dwɔɔnʋ 19:33-37.
Asʋ̃ osunzu kɛɛ Gyisɛsɩ ilili bɔmʋnlɩ ɩ nɩɩ abiyemmɔ hyɩhyɛlɩ na ama nkɔmɩhyɛ eyi aɣa nu a?
Mɩnla nɔhʋanlɛ odwokɔ yɛ eyi ɩma ɔnwʋ ɛfalɩ Gyisɛsɩ nwʋ a?

6. Sɛ yesuma Gyisɛsɩ nwʋ dɩyɛ a yekenyia ɔzʋlɔ mfasʋ

Bayɩbʋlʋ yɩ ɩkã kɛɛ nwʋmɔ ihyinyia paa kɛɛ yesuma Gyisɛsɩ nɩɩ egyima mɔɔ Nyamɩnlɩ ɩva iwula yɩ sa nɩ nwʋ dɩyɛ. Kɩnga Dwɔɔnʋ 14:6 nɩɩ 17:3, na akʋ̃ bozunzú odwokɔɣizialɛ eyi nwʋ:

Mɩnla ti mɔɔ nwʋmɔ ihyinyia kɛɛ yesuma Gyisɛsɩ nwʋ dɩyɛ a?

Gyisɛsɩ iwukoli ɔhʋanɩ mɔɔ ɩma yɛkʋla yɛfa Nyamɩnlɩ ɔhɔnwʋ. Ihilehileli nɔhʋanlɛ mɔɔ ɩfalɩ Gyehova nwʋ, na iluwa yɩ zʋ nɩ, yɛkɔhʋla yekenyia nnwʋanlɩ mɔɔ íni awielɩyɛ

ABIYEMMƆ BƐKÃ KƐƐ: “Gyehova Dasɩvʋlɔmaa bɛále Gyisɛsɩ bedi.”