LESEN 15
?Hu Ya Jisas?
Jisas i wan long ol impoten man long histri. Plante man oli save nem blong hem, be oli no save plante samting, mo tu oli gat ol defdefren tingting long saed blong hem. ?Be Baebol i talem wanem?
1. ?Hu ya Jisas?
Jisas i wan enjel long heven we i gat bigfala paoa. Jehova i wokem hem fastaem long ol narafala samting. Taswe, Baebol i talem se hem i “fasbon blong olgeta samting we God i mekem.” (Kolosi 1:15) Jisas i “stret Pikinini blong [God], wan nomo we hem i gat,” hemia from we Jehova nomo i wokem hem. (Jon 3:16) Biaen, Jisas i wok wetem Papa blong hem Jehova, blong wokem ol nara samting. (Ridim Ol Proveb 8:30.) Jisas i gohed blong enjoem frensip blong hem wetem Jehova. Hem i man blong karem tok blong God, i stap talemaot ol mesej mo ol instraksen blong God, taswe Baebol i singaot hem se “Tok ya.”—Jon 1:14.
2. ?From wanem Jisas i kam long wol?
Samwe 2,000 yia bifo, Jehova i yusum tabu spirit blong tekem laef blong Jisas long heven, mo i putum long bel blong yangfala woman ya Meri, we i no save man yet. Long rod ya, Jisas i bon long wol ya. (Ridim Luk 1:34, 35.) Jisas i kam long wol blong i kam Mesaea o Kraes olsem we Jehova i promes, mo blong i sevem olgeta man. a Olgeta profet tok blong Baebol long saed blong Mesaea oli kamtru long Jisas. Hemia i halpem ol man blong save se hem i “Kraes ya we i Pikinini blong God ya we i laef i stap.”—Matiu 16:16.
3. ?Jisas i stap wea naoia?
Afta we Jisas i ded, hem i laef bakegen olsem wan spirit man o wan enjel mo i gobak long heven. Nao “God i leftemap hem, i givim wan posisen long hem we i hae.” (Filipae 2:9) Naoia Jisas i gat paoa mo bigfala otoriti, be Jehova i gat moa otoriti long hem.
DIGIM MOA
Faenemaot se Jisas i rili hu, mo from wanem i impoten blong save moa long saed blong hem.
4. Jisas i no God Ya We i Gat Olgeta Paoa
Nating se Jisas i wan spirit man long heven we i gat bigfala paoa, be hem i obei long God mo Papa blong hem, Jehova. ?From wanem yumi talem olsem? Plei VIDEO blong luk olsem wanem Jisas i defren long God ya we i gat olgeta paoa.
Ol vas ya bambae oli halpem yumi blong save olsem wanem Jehova i defren long Jisas. Ridim wanwan vas mo tokbaot ol kwestin we i stap.
Ridim Luk 1:30-32.
-
?Enjel i talem wanem tok blong soem se Jisas i defren long Jehova we i “Hae God”?
Ridim Matiu 3:16, 17.
-
Taem Jisas i baptaes, ?voes we i kamaot long heven i talem wanem?
-
?Yu ting se hemia voes blong hu?
Ridim Jon 14:28.
-
Taem yu tingbaot wan papa mo wan pikinini, ?hu i olfala moa mo i gat moa otoriti?
-
Taem Jisas i singaot Jehova se Papa, ?samting ya i soemaot wanem?
Ridim Jon 12:49.
-
?Jisas i gat tingting ya se hem wetem Papa i sem man nomo? ?Wanem tingting blong yu?
5. Samting we i pruvum se Jisas i Mesaea
I gat plante profet tok long Baebol, we i givhan long ol man blong luksave Mesaea we God i jusum blong sevem ol man. Plei VIDEO blong save sam profet tok we Jisas i mekem i kamtru taem hem i stap long wol.
Ridim ol profet tok ya, mo tokbaot ol kwestin we i stap:
Ridim Maeka 5:2 blong save weples Mesaea bae i bon. b
-
?Profet tok ya i kamtru long Jisas? —Matiu 2:1.
Ridim Ol Sam 34:20 mo Sekaraea 12:10 blong save sam samting long profet tok we i tokbaot ded blong Mesaea.
-
?Ol profet tok ya oli kamtru? —Jon 19:33-37.
-
?Yu ting se Jisas hem wan i mekem ol profet tok ya oli kamtru?
-
?Hemia i pruvum se Jisas hem i hu?
6. Yumi kasem blesing taem yumi save Jisas
Baebol i talem se i impoten blong save Jisas, mo save wok blong hem. Ridim Jon 14:6 mo 17:3, mo tokbaot kwestin ya:
-
?From wanem i rili impoten blong save Jisas?
Jisas i openem rod blong yumi kam fren blong God. Hem i tijim trutok long saed blong Jehova, mo yumi save kasem laef olwe tru long hem.
SAM MAN OLI SE: “Ol Witnes blong Jehova oli no bilif long Jisas.”
-
?Bambae yu talem wanem long olgeta?
SAMARI
Jisas i wan spirit o enjel we i gat paoa. Hem i Pikinini blong God mo i Mesaea.
Tingtingbak
-
?From wanem Baebol i talem se Jisas i “fasbon blong olgeta samting we God i mekem”?
-
?Bifo we Jisas i kam long wol, wanem wok blong hem?
-
?Olsem wanem yumi save se Jisas i Mesaea?
FAENEMAOT
Faenemaot wok we Jisas i mekem olsem Mesaea.
“?Ol Profet Tok Long Saed Blong Mesaea Oli Stret Long Jisas?” (Web atikol)
Faenemaot sipos God i kam papa blong Jisas, long sem fasin olsem we wan man i kam wan papa.
“?From Wanem Baebol i Talem Se Jisas i Pikinini Blong God?” (Web atikol)
Faenemaot from wanem Triniti i no wan tijing blong Baebol.
Ridim olsem wanem wan woman i jenisim laef blong hem, afta we i faenemaot samting we Baebol i talem long saed blong Jisas.
“A Jewish Woman Explains Why She Reexamined Her Faith” (Wekap!, Mei 2013)
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
