IRUẸMWI 15

Gha Re Jesu?

KPẸRE

Gha Re Jesu?

Ọkpa vbe usun emwa ni he yin agbọn na, na ghi họn okhekhe ẹre sẹ, ẹre Jesu khin. Ọrheyerriọ, eni ẹnrẹn ọkpa ẹre emwa mobọ wa rẹn, iran ma gele rẹn aro ọmwa nọ khin. Ẹmwẹ ughughan ẹre emwa ta vbekpa re. Vbe Baibol a ta vbekpa e Jesu?

1. Gha re Jesu?

Ọmwa orhiọn nọ mwẹ ẹtin ẹre Jesu khin. Ẹrinmwi ẹre ọ ye. Irẹn ẹre Jehova ka gha yi, ọ ke yi emwi nikẹre hia. Ọni ẹre ọ si ẹre ne a na tie ẹre ‘ọmọdiọn ọghe emwi na yi hia fẹẹrẹ.’ (Kọlose 1:15) E Baibol tie Jesu “ukpọmọkpa” ọghe Osanobua rhunmwuda, Jesu ọkpa ẹre Jehova wa tobọre yi. (Jọn 3:16) Jesu keghi ku obọ gbe ba Erhae ighẹ e Jehova ya yi emwi nikẹre hia. (Tie Itan 8:30.) Do fi vbene a guan na, te irẹn vbe Erhae wa ye sikẹ egbe. A vbe tie Jesu “nene Ẹmwẹ” rhunmwuda, irẹn ọre ọmunu ne Jehova loo ya gu emwa kevbe avbe odibosa guan kevbe nọ ya rhie adia ne iran.—Jọn 1:14.

2. Vbọzẹ ne Jesu na gha die agbọn na?

Vbe odẹ ukpo 2,000 nọ gberra, e Jehova keghi ru emwi ọyunnuan ọkpa. Ọ na ya orhiọn nọhuanrẹn ọghẹe rhie arrọọ ọghe Jesu ye uwu ako ọmọ ọghe Meri, nọ re uvbi nọ ma rẹn okpia. Erriọ ẹre a ghi ya biẹ Jesu zẹvbe ọmwa nagbọn. (Tie Luk 1:34, 35.) Te Jehova gie Jesu gha die agbọn na, nọ gha re Mẹzaia, ra e Kristi nọ khian miẹn emwa nagbọn fan. a Ẹmwẹ akhasẹ hia ne Baibol tae vbekpa e Mẹzaia keghi mwẹ amusẹ vbe egbe Jesu. Ọna ẹre ọ ghi ya emwa rẹn wẹẹ, irẹn ọre “Mẹzaia, Ovbi Osanobua nọ rrọọ.”—Matiu 16:16.

3. De ehe ne Jesu ye nia?

Vbe Jesu ghi wu nẹ, e Jehova keghi huẹn ọnrẹn kpaegbe gha rrie ẹrinmwi zẹvbe ọmwa orhiọn. Evba ẹre Osanobua na muẹn ye ukpo “nọ yo.” (Filipai 2:9) Ukpo nọ yo, ẹre Jesu ghi ye nia; irẹn ẹre ọ zẹ lele Jehova.

GUALỌ OTỌ RE SAYỌ

Gia ziro yan rẹn sayọ, aro ọmwa ne Jesu gele khin kevbe evbọzẹe nọ na ru ekpataki ne ima ruẹ vbekpa re.

4. Jesu i re Osa Ne Oghodua

E Baibol gi ima rẹn wẹẹ, agharhemiẹn wẹẹ ọmwa orhiọn nọ mwẹ ẹtin vbe ẹrinmwi ẹre Jesu khin, ototọ e Jehova nọ re Erhae kevbe Osa ọghẹe, ẹre ọ ye. Vbọ ya ima kha vberriọ? Kpee VIDIO na, ne u ya rẹn emwi ne Baibol tae vbekpa vbene Jesu ya lughaẹn ne Osa ne oghodua hẹ.

E VIDIO: Jesu Kristi Ọre Osanobua Ra? (3:22)

Avbe ako ọghe evbagbẹn nọhuanrẹn na, ya ima rẹn wẹẹ Jesu lughaẹn ne Jehova. Tie dọmwadẹ ako na, iyeke ọni, uwa ghi ziro yan inọta ni lelẹe.

Tie Luk 1:30-32.

De emwi ne odibosa na tae nọ rhie ẹre ma wẹẹ, Jesu lughaẹn ne Jehova nọ re Osa “Nọ Yo Sẹ”?

Tie Matiu 3:16, 17.

Vbe Jesu dinmwiamẹ, de emwi ne urhu nọ ke ẹrinmwi rre tae?
De ọmwa ne uwẹ yayi wẹẹ ọ yan urhu nii?

Tie Jọn 14:28.

Gha re ọdiọn vbe ọmọ vbe erha? Gha ta ẹmwẹ nọ sẹ vbe iran eva?
Vbe Jesu a yae kha, nọ na tie Jehova Erhae?

Tie Jọn 12:49.

Ọ mwẹ ẹghẹ ọkpa ne Jesu ya roro ẹre wẹẹ, orhunmwu ọkpa ẹre irẹn vbe Erha irẹn khin ra? Vbe uwẹ a vbe ghee ẹre hẹ?

5. Evbọ sosẹ yọ wẹẹ Jesu ọre Mẹzaia

E Baibol ta ẹmwẹ akhasẹ nibun nọ gha ya emwa rẹn Mẹzaia. E Mẹzaia ọre ọmwa ne Osanobua hannọ zẹ nọ do miẹn emwa nagbọn fan. Kpee VIDIO na, ne u ya rẹn ẹmwẹ akhasẹ eso ni mwẹ amusẹ vbe egbe Jesu, vbe ọ rre agbọn na.

E VIDIO: Ẹmwẹ Akhasẹ Ni Mwẹ Amusẹ Vbe Egbe Jesu (3:03)

Tie ẹmwẹ akhasẹ ni rre ako ọghe Baibol na, iyeke ọni, uwa ghi ziro yan inọta ni lelẹe:

Tie Maika 5:2 ne u ya rẹn ẹvbo na wẹẹ a khian na biẹ e Mẹzaia. b

A gele biẹ Jesu vbe ẹvbo na ra?—Matiu 2:1.

Tie Psalm 34:20 kevbe Zẹkaraia 12:10 ne u ya rẹn ẹmwẹ akhasẹ na tae yotọ vbekpa uwu ọghe Mẹzaia.

Avbe ẹmwẹ akhasẹ na mwẹ amusẹ ra?—Jọn 19:33-37.
Uwẹ yayi wẹẹ Jesu ẹre ọ tobọre ru ẹre, ne avbe ẹmwẹ akhasẹ na mwẹ amusẹ vbe egbe ẹre ra?
Vbe ọna maa ruẹ re vbekpa e Jesu?

6. Afiangbe wa rrọọ vbe a ghaa ruẹ vbekpa e Jesu

E Baibol gi ima rẹn evbọzẹe nọ na khẹke, ne ima ruẹ vbekpa e Jesu kevbe ukpo ne Osanobua muẹn yi. Tie Jọn 14:6 kevbe 17:3, iyeke ọni, uwa ghi ziro yan inọta na:

Vbọzẹ nọ na khẹke ne ima ruẹ vbekpa e Jesu?

Jesu keghi zẹ odẹ yọ, ne ima sẹtin gha re ọsie Osanobua. Ọ keghi ya ima rẹn ẹmwata vbekpa e Jehova. Irẹn ẹre ọ zẹe ighẹ ima gha vbe gha mwẹ arrọọ ọghe etẹbitẹ

EMWA ESO KEGHI KHA WẸẸ: “Avbe Osẹe Jehova ma ya e Jesu yi.”