KALANSEN 15

Yesu ye jɔni ye?

A BILA A LA

Yesu ye jɔni ye?

Mɔgɔ minnu tɔgɔ bɔlenba don tariku kɔnɔ, Yesu ye olu dɔ la kelen ye. O bɛɛ n’a ta, mɔgɔ caman bɛ Yesu tɔgɔ dɔn, nka u tɛ fɛn caman dɔn a ko la, ani Yesu ye mɔgɔ min ye tigitigi, mɔgɔ caman hakilinaw tɛ kelen ye o ko la. Bibulu bɛ mun de fɔ Yesu ko la?

1. Yesu ye jɔni ye?

Yesu ye mɛlɛkɛ de ye, a bɛ sankolo la. Jehova Ala ye ale de fɔlɔ da fɛn bɛɛ ɲɛ. O de kama a welela “Dafɛn bɛɛ la fɔlɔ bangelen”. (Kolosekaw 1:15) Bibulu b’a jira ko Yesu ye Ala “Denkɛ kelenpe” ye ka d’a kan Yesu kelenpe de dara Ala fɛ k’a sɔrɔ fɛn wɛrɛ si ma a dɛmɛ o kɛli la. (Yuhana 3:16) Yesu tun b’a Fa Jehova kɛrɛ fɛ ka baara kɛ n’a ye, ka a dɛmɛ ka fɛn tɔw bɛɛ da. (Ntalenw 8:30 kalan.) Yesu bɛ ka ta’a fɛ ka jɛɲɔgɔnya kɛrɛnkɛrɛnnen diyabɔ ni Jehova ye. A bɛ ka baara kɛ kantigiya la iko Ala ka kumalasebaga, ka a ka ciw ni a ka kalanw lase, o de kama a bɛ wele “Kuma”.—Yuhana 1:14.

2. Mun na Yesu nana dugukolo kan?

A bɛ ɲini ka caya ni san 2 000 ye sisan, Jehova ye baara kɛ ni a ka hakili senu ye cogo kabakoma la ka Yesu ka ɲɛnamaya bɔ sankolo la ka na o bila npogotigi dɔ wolonugu la min tun ma cɛ si dɔn fɔlɔ, o tun tɔgɔ ye ko Mariyama. O cogo la, Yesu bangera ka kɛ mɔgɔ ye iko anw cogo, nka jurumu tun tɛ ale la. (Luka 1:34, 35 kalan.) Jehova ye Yesu ci ka na dugukolo kan walasa a ka kɛ Masiya layidu talen, walima Krisita ye, ani ka Hadamadenw kisi. a Bibulu kiraya kuma minnu bɛɛ fɔra Masiya ko la, olu bɛɛ tiimɛna Yesu kan, o y’a to mɔgɔw sera k’a dɔn ko Yesu ye “Krisita, Ala ɲɛnama Denkɛ de ye.”—Matiyu 16:16.

3. Yesu bɛ min sisan?

Yesu salen kɔ, Ala y’a su lakunun a mɛlɛkɛlama, ani a kɔseginna ka taa sankolo la. O yɔrɔ la, “Ala y’a kɔrɔta kosɛbɛ.” (Filipekaw 2:9) Sisan, jɔyɔrɔba bɛ Yesu bolo. Jehova dɔrɔn de barika ka bon ni Yesu ye.

DƆ FARA I KA DƆNNIYA KAN

Yesu ye mɔgɔ min ye tigitigi ani kun min na a nafa ka bon an ka a dɔn, an k’a ɲini ka fɛn caman dɔn o kan.

4. Sebaayabɛɛtigi Ala, Yesu tɛ o ye

Bibulu b’a fɔ ko hali ni Yesu ye mɛlɛkɛ barikama ye sankolo la, a bɛ ka a ka Ala, a Fa Jehova kan minɛ. Mun na an bɛ se ka o fɔ? A’ye WIDEYO lajɛ walasa k’a ye Bibulu b’a jira danfara minnu bɛ Yesu ni Ala Sebaayabɛɛtigi cɛ.

WIDEYO: Yala Yesu Krisita ye Ala de ye wa? (3:22)

Tɛmɛsira ninnu bɛ an dɛmɛ k’a faamu jɛɲɔgɔnya min bɛ Jehova ni Yesu cɛ. A’ye o tɛmɛsiraw kelen-kelen bɛɛ kalan, o kɔ aw ka baro kɛ nin ɲininkaliw kan:

Luka 1:30-32 kalan.

Mɛlɛkɛ y’a jira ko jɛɲɔgɔnya jumɛn de bɛ Yesu ni Jehova, “Ala Kɔrɔtalenba” cɛ?

Matiyu 3:16, 17 kalan.

Yesu batiselen kɔ, kumakan min bɔra sankolo la, o ye mun de fɔ?
E hakili la, o tun ye jɔni de kumakan ye?

Yuhana 14:28 kalan.

Fa ni a denkɛ cɛ, jɔni de ka kɔrɔ ni jɔni ye ani jɔni de ka kuntigiya ka bon ni jɔni ta ye?
Yesu ye Jehova wele a Fa. O bɛ an kalan mun de la?

Yuhana 12:49 kalan.

Yala Yesu b’a miiri ko ale ni a Fa ye mɔgɔ kelen ye wa? E dun, e hakilina ye mun ye?

5. Dalilu minnu b’a jira ko Yesu de ye Masiya ye

Kiraya kuma caman bɛ Bibulu kɔnɔ minnu bɛ mɔgɔw dɛmɛ u k’a dɔn mɔgɔ min ye Masiya ye—Ala ka mɔgɔ sugandilen walasa ka Hadamadenw kisi. A’ye WIDEYO lajɛ walasa ka kiraya kuma dɔw dɔn Yesu ye minnu tiimɛ ka a to dugukolo kan.

WIDEYO: Yesu ye kiraya kumaw tiimɛ (3:03)

Bibulu kiraya kuma ninnu kalan, o kɔ aw ka baro kɛ nin ɲininkaliw kan:

Mise 5:1 kalan walasa k’a dɔn Masiya tun ka kan ka bange b yɔrɔ min na.

Yala Yesu bangeli ye o kiraya kuma tiimɛ wa?—Matiyu 2:1.

Zaburu 34:21 ani Zakari 12:10 kalan walasa k’a ye Bibulu tun kɔnna ka min fɔ Masiya ka saya ko la.

Yala o kiraya kumaw tiimɛna wa?—Yuhana 19:33-37.
Yala e hakili la, Yesu tun bɛ se ka fɛn dɔ kɛ walasa o kiraya kumaw ka tiimɛ wa?
O bɛ mun de jira i la Yesu ko la?

6. K’a ɲini ka Yesu dɔn o bɛ nafa lase an ma

Bibulu b’a fɔ ko nafaba b’a la k’a ɲini ka Yesu ni a jɔyɔrɔ dɔn. Yuhana 14:6 ani 17:3 kalan, o kɔ aw ka baro kɛ nin ɲininkali kan:

Mun na a nafa ka bon kosɛbɛ an k’a ɲini ka Yesu dɔn?

Yesu ye sira dayɛlɛ walasa mɔgɔw ka se ka kɛ Ala teriw ye. Tiɲɛ ye min ye Jehova ko la, a ye mɔgɔw kalan o la, ani an bɛ se ka ɲɛnamaya banbali sɔrɔ ale de sababu la

MƆGƆ DƆW B’A FƆ KO: “Jehova Seerew dalen tɛ Yesu la.”

E bɛ mun fɔ ka o mɔgɔ suguw jaabi?

BAKURUBAFƆLI

Yesu ye mɛlɛkɛ barikama de ye. Ala Denkɛ ani Masiya don.

Seginnkanni

Mun na Yesu welela “Dafɛn bɛɛ la fɔlɔ bangelen”?
Yesu ye mun de kɛ sani a ka na dugukolo kan?
An b’a dɔn cogo di ko Yesu de ye Masiya ye?

Kalansen banna don min na:

A ɲini ka nin kɛ

Wideyo lajɛ min tɔgɔ ye ko, ‘Ala ye a kɛ Matigi ni Krisita ye’—Yɔrɔ I walima Luka tilayɔrɔba 2nan ani 3nan kalan walasa ka fɛn caman dɔn Yesu ka ɲɛnamaya kan k’a to dugukolo kan.

Fɛn wɛrɛ:

Your other goal