ˈCƖƐCƖƐKÏBHË 15
˗Mɔ ˗lɛ ɔ Zezwii ˈnɩ?
Mäˈä ˈpɩwʋ a nɩkpaa ˈwuë glaˈmö, nɩkpɛ a ˗mɔ wa ˗yiɛ teɲii, ˈmö Zezwii glɩnɩɛ. Nɩkpa a ˗bɛ ˗yi ˈɔ ŋlɩɩ, maa waˈaa ɔ ˗gömö a wɛlɩ a ˗bɛ ˗yi. ˗Mɔ Zezwii glɩnɩɛ ˗tiamö, yɩ dɔˈwʋ sɛɛ nɩkpa pää dlɩ ˈnɩɛ ˈwlʋnɩ. Maa, sɛɛ Biblë gbä bhä ɔ dɔˈwʋ ˈnɩ?
1. ˗Mɔ ˗lɛ ɔ Zezwii ˈnɩ?
Lagɔzuzukwë a ˗ma ˈtɛɛ ˈmö, ˗a ˗bhölɩnɩɛ ˗mä zlɩ ˈmö, ˈmö Zezwii glɩnɩɛ. ˈMö Zoova ˈwäla ˈwë ˈn ɔ yiɛ bhla ˈpɩwʋ a ˗lii ˗miˈla ˈwuë ˈwäla. Nza Biblë nʋä nɩɩ, mɔɔ ˗lɛ “˗bhɛbhɛlii ˈwuë a ˈyizii.” (Kolɔɔsɩ a ˗nʋa 1:15) Biblë lɛ nɩɩ, Zezwii mɔɔ glɩnɩɛ Lagɔ ˈa “yuu ˗bhʋlʋ ˗kpɔ.” ˗Yɩ kää ˈŋlɩ miɛ nɩɩ, Zezwii a ˈyize ˈmö Lagɔ ˈwälaa ɔɲɩgäsɛ. (Zaa 3:16) Zezwii ˗ɲɛ ɔ dɩba ˈsɔ ˈn wa yiɛ libho ˈgämö nʋnɩ, ɔ yoo kwänɩ ˈn wa yiɛ ˈpɩwʋ a ˗lii ˈwuë ˈwäla. (Zɛlɩ Proverbes 8:30 ˈmö.) Zezwii ˗ɲɛ ɔ dɩba ˈsɔ wa ˗wʋnɩ ˈkwädlɩ ˈwʋ ˈyize. Lagɔ ˗kä bhïla yii, ˈn ɔ ˗käˈɛ ˈdɩmözʋwɛlɩ ˈɲɛɛ yii, ˈmö ɔ ghlɛnɩɛ ˈmö, nza wa lɔɔ “Wɛlɩɩ.”—Zaa 1:14.
2. ˗Yɩ kä ɔ ŋlɩ ˈn Zezwii yi ɔ mäˈä dʋdʋ ˈwʋ yi ˈnɩ?
˗Mä zlɩ ˈmö ˗mä Zezwii ˗bhölɩnɩ a˗a. ˈN Zoova yiɛ zɩzɛsɛ ˈɔ ˈwugɔmʋʋ ˈmö ghlɛnɩ ˈn ɔ yiɛ ˈɔ zɩkpaa ˈdumöwʋyu ˗ɔɔ ˗bhlɛ tɛkäsɛ ɲɩbhɛlʋ a dɛ ghlɛnɩ, wa laa Malii a ˈmlɩ zʋ, ˗lɛ a ˈylʋbö a mila ˈsɔ a sɛɛ zɩˈɛ dɛˈɛ. Saˈa ˗sɩbhä yɩ ˈplɩɛ ˈwʋ ˈn Zezwii yiɛ ˗aa sɛ a nɩkpɛ ˈzʋ ˈn wa yoo gwälɩ. (Zɛlɩ Lwiikö 1:34, 35 ˈmö.) Zezwii yiɛ mäˈä dʋdʋ ˈwʋʋ, ɔ ˈkä ˗ɔ sa˗a ˗lɛ ˈzʋ nzɩ ɔ ˈkä ˈbhlɩbhëa ˈwuë puë, nza Zoova tioo. a Wɛlɩɩ ˈwuë Biblë bhïlaa ˗ɔ sa˗a ˗lɛ a dɛɛ, yɩ ˈwuë, ˈyli yɩ ˈwlʋnɩɛ ˗mä Zezwii ˈmö. Yɩ kä ˈŋlɩ ˈn nɩkpa yiɛ ˈmö ˈnʋ nɩɩ, Zezwii mɔ glɩnɩɛ “Puëɲɔɔ Lagɔ ˗sɛɛ ˗lɛ, Lagɔ ˗ɔ ˗bhölɩ a Yowli.”—Matie 16:16.
3. Dɛɛ Zezwii ˗wʋ ɔ zɩˈɛ ˈnɩ?
Zezwii ˈkuä ˈwë, bhäla ɔ dɩba yoo glu ˗sɛ ɔ yiɛ lagɔzuzukwë ˈzʋ, ˈn ɔ yiɛ ˗mä zlɩ ˈmö ˈwlu sɩbhä. Ɔ ghlɛɛ ˗mä, ˈn “Lagɔ yoo ˈkɔdɔ ˈwʋ ˈzʋa.” (Filiipö a ˗nʋa 2:9) Zɩˈɛ, lagɔzuzukwë a ˗ma ˈtɛɛ teɲii ˈmöö, ˈmö Zezwii glɩnɩɛ. ˗Maa, Zoova a ˈyize mɔɔ ˈtɛɛ ˈmö, mɔɔ zoo zi ˈwʋ.
ˈCƖƐ ˗LII ˗MIMII
˗Mɔ Zezwii glɩnɩɛ ˗tiamö ˈn ˗yɩ kää ˈŋlɩ ˗a ˈkä ɔ ˗gömö a wɛlɩɩ ˈcɩɛ kää teɲii dɛsɛ, ˈyi ˈylɩmö.
4. Zezwii mɔ ˈnɩɛ Lagɔtapɛ glɩnɩ
Biblë ˈcɩaɲɩ nɩɩ, Zezwii glɩnɩ abhlɩ lagɔzuzukwë a ˗ma ˈtɛɛ ˈmö, maa ɔ zʋ ˈɔ Lagɔ ˗ɔ glɩnɩɛ ɔ dɩba ˈklʋkpamö. ˗Yɩ kä ɔ ˈŋlɩ ˈn ˗a bhɛnɩ ɔ ˗a ˈkä ˗sɩbhä gbä ˈnɩ? ˈZʋ ˗lɛ VIDEO, ˈsaa Biblë ˈcɩaɲɩɛ Zezwii ˗ɲɛ Lagɔtapɛ ˈsɔ a dɔˈwʋ, sɛɛ waˈaa ˈmö mlɩnɩ, ˗n ˈki ˈylɩmö.
Sɛɛ Zoova ˗ɲɛ Zezwii ˈsɔ ˗wʋnɩɛ ˈwʋ, Biblë a gbɛlɩ ˈlɛ ˗yiɲɩ kwänɩ ˗a ˈki ˈmö ˈnʋ. Zeli ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ.
Zɛlɩ Lwiikö 1:30-32 ˈmö.
-
Zoova ˗ɔ ˗lɛ “Lagɔtapɛ,” ɔ ˗ɲɛ Zezwii ˈsɔ a ˈwʋwʋnɛ a dɔˈwʋ, sɛɛ lagɔzuzukwëa gbä ɔ ˈnɩ?
Zɛlɩ Matie 3:16, 17 ˈmö.
-
Zezwii ˈa batɛɛmö a zlɩ, wɛlɩɩ ˗yɩ ˈbhöönɩɛ ˗mä ghäyɩ ˈwʋ sɛ yɩ gbä ɔ ˈnɩ?
-
˗Na dɔˈwʋ, ɔ bhïla bhä ˈnɩ?
Zɛlɩ Zaa 14:28 ˈmö.
-
˗Mɔ glɩnɩ ɔ ˈkɔdɔ ˈn ˗mɔ ˈkämanɩ ɔ ˈnɩ? Yuu mɔ bhä ˈnɩɩ, ˗maa ɔ dɩba mɔ bhä ˗a?
-
Zoova ˈmö Zezwii laa ɔ dɩba. ˈSaa yɩ ˈcɩaɲɩ ɔ ˈnɩ?
Zɛlɩ Zaa 12:49 ˈmö.
-
Zezwii pä a bhä dlɩ nɩɩ ɔ ˗ɲɛ ɔ dɩba ˈsɔ, nɩkpɛ ˗bhʋlʋ wa glɩnɩ bhä ˗a? Sɛɛ ˗n pä ɔ ˗naa dlɩ ˈnɩ?
5. Zezwii tula a˗a nɩɩ mɔ glɩnɩɛ ˗ɔ sa˗a ˗lɛ
˗Mä Biblë ˈmö, wɛlɩ a ˗bɛ ˗wʋ ˗mä ˗yɩ ˈkäa ˗ɔ sa˗a ˗lɛ a dɛ ˈyli ˈwlʋnɩ. Wɛlɩ ˈla mii kwänɩɛ nɩkpa ˈn ˗mɔ Lagɔ ˗sɛ ˗lɛ ɔ ˈkä ˈbhlɩbhëa puëë, wa yoo yɩbhlɩnɩ. ˈZʋ ˗lɛ VIDEO, nzɩ wɛlɩɩ ˗mimii ˗yɩ bhïla a˗a Zezwii a dɛ, ˈn ɔ yiɛ ˈyli ˈwälanɩ mäˈä dʋdʋ ˈwʋ, ˗n ˈkɩ ˈylɩmö.
Wɛlɩɩ ˗yɩ ˈkää zɩkö ˈyli ˈwlʋnɩ Biblë bhïla a˗a, a nɩ zeli ˈmö ˈn a nɩ yɩlɩ nimïyɩbhäkïbhï ˈlɛ yɔwʋ:
Zɛlɩ Michée 5:2 ˈmö, mää wa ˈkää ˗ɔ sa˗a ˗lɛ gwälɩnɩ ˗n ˈkɩ ˈylɩmö. b
-
Mää wa gwälɩnɩɛ Zezwii a dɔˈwʋ, sɛɛ gbɛlʋ ˈlɛ gbää ˗sɩbhä yɩ ˈwlʋnɩ ɔ ˗tiamö ˈyli ˗a? —Matie 2:1.
Zɛlɩ Psaume 34:20 ˈn Zacharie 12:10 ˈmö, nzɩ sɛɛ Biblë gbä a˗a ˗ɔ sa˗a ˗lɛ a ˈkwie a dɔˈwʋ, ˗n ˈkɩ ˈylɩmö.
-
Wɛlɩ ˈlɛ ˈwlʋnɩ ɔ ˗tiamö ˈyli ˗a?—Zaa 19:33-37.
-
˗N pä ɔ dlɩ nɩɩ, Zezwii bhɛnɩ a˗a ɔ ˈkä ˗bhɛ nzɩ wɛlɩ ˈlɛ ˈkä ˈyli ˈwlʋnɩ ˗a?
-
Wɛlɩ ˈlɛ ˈwuë, ˈsaa yɩ ˈcɩamö ɔ Zezwii a dɛ nɩ?
6. ˗A ˈkä Zezwii yɩbhlɩnɩ kä ˗aa ˗li a ˗lii ˈmö
˗A ˈkä Zezwii a ˗gömö a wɛlɩɩ ˈcɩɛ ˈn ˗a ˈkäˈɛ ˈsaa ɔ nʋä yɩbhlɩnɩ, Biblë lɛ nɩɩ dɛsɛ yɩ kää. Zɛlɩ Zaa 14:6 ˈn Zaa 17:3 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
-
˗Yɩ kä ɔ ˈŋlɩ ˈn ˗a ˈkä Zezwii a ˗gömö a wɛlɩɩ ˈcɩɛ kä ɔ teɲii dɛsɛ ˈnɩ?
Zezwii mɔɔ ˗sɛɛ ˈyioo ˗a ˈkää bhli nzɩ ˗a ˈkä Lagɔ a bhɛya ˈzʋ. Ɔ ˈcɩa nɩkpa Zoova a ˗gömö a gbëawɛlɩɩ ˈn ɔ za ˗a bhɛnɩ ˗a ˈkä ˈkwädlɩkwädlɩnɩ a ˗bhölɩbhölɛ ghlɩ.
NƖKPA ˗MUMUË LƐ NƖƖ: “Zoova ˈa Bhlɩnɩwaa ˈnɩɛ Zezwii dlɩ ˈtɛɛnɩ.”
-
Wa ˗kä ˗sɩbhä gbää, sɛɛ ˗n ˈkä ɔ gbä ˈnɩ?
DƐSƐKÄKÏBHÏ
Zezwii ˈmötɛɛnɩzuzukwë ɔ glɩnɩɛ. Mɔ glɩnɩɛ Lagɔ a Yowli ˈn ˗ɔ sa˗a ˗lɛ.
ˈWʋligbanɩkïbhï
-
˗Yɩ kä ɔ ˈŋlɩ ˈn wa la ɔ Zezwii “˗bhɛbhɛlii ˈwuë a ˈyizii” ˈnɩ?
-
Dɛɛ Zezwii ˈnɩɛ a˗a ˗bhlɛ mäˈä dʋdʋ ˈwʋ yii, ˈsaa ɔ nʋ a˗a bhä ˈnɩ?
-
Sɛɛ ˗a ˗yi ɔ sɛ nɩɩ Zezwii mɔ ˗lɛ ˗ɔ sa˗a ˗lɛ ˈnɩ?
YILII YƆWƲ
˗Lii ˗yɩ tulaa nɩɩ Zezwii mɔɔ glɩnɩɛ ˗ɔ sa˗a ˗lɛ ˈcɩɛ yɩ wɛlɩɩ.
Sɛɛ ˈylʋ zɛmö a nɩkpɛ ˈzʋˈɛ ˈyu a dɩba, ˗sɩbhä Lagɔ ˗kä Zezwii a dɩba ˈzʋʋ, ˈsaa Biblë ˈcɩa yɩ dɔˈwʋ, ˈyi ˈylɩmö.
« Pourquoi Jésus est˗il appelé le Fils de Dieu ? » (Ɛtɛnɛtɩ ˈklʋ a ˈcɩɛcɩɛkïbhë)
˗Yɩ kä ɔ ˈŋlɩ ˈn ˗a bhɛnɩ ɔ ˗a ˈkä gbä nɩɩ, Lagɔ kä ˈmö ta a wɛlɩɩ ˈnɩɛ ˗mä Biblë ˈwʋ ˈnɩ?
Sɛɛ Biblë gbää Zezwii a dɔˈwʋ, sɛɛ yɩ zigbanɩ ɔ ˈŋlɔ ˗bhlʋ ˈa zɩkpaa ˈmö ˈnɩ?
« Une femme juive explique pourquoi elle a remis sa foi en question » (Réveillez˗vous !, mai 2013)
a ˗Mä ˈcɩɛcɩɛkïbhï 26 ˈn 27 ˈmö, ˗yɩ kää ˈŋlɩ ˈn nɩkpɛ kää ɔ ˈkä ˈbhlɩbhëa ˈwuë puë ˈn sɛɛ Zezwii puëaɲɩɛ, ˗a yi ˈylɩmö.
b Yɩlɩ ˗mä Dlɩgömösɛsɛnɩkïbhë 2 ˈmö nzɩ dɛɛ Zezwii ˈnɩɛ ˗bhlɛ mäˈä dʋdʋ ˈwʋ yi a wɛlɩɩ Biblë bhïlaa, sɛ yɩ ˈwlʋnɩɛ ˈylii, ˗n ˈkɩ ˈylɩmö.
