ARUFUDAHANI 15
Ka san Hesusubei?
Hesusu ábanbei hádangiñe gürigia hátima uágubaña laganbahóua ubouagu. Ani lau sun subudi hamani saragu gürigia liri Hesusu, lóuguati hasubudirun luagu ani ámuñegueinarügüti le hasaminarubei luagu. Ka tarufudahabei Bíbülia luagu Hesusu?
1. Ka san Hesusubei?
Aban sífiri gabafuti Hesusu le awinwandubei sielu. Ligía ladügübei Heowá lubaragiñe ladügüni le líbiri katei. Ligía lariñawagúnbei “ligía [lan] ígiramaübei, le lóugiñebei sun katei le adügǘbei” (Kolosana 1:15). Watu Bíbülia lun Hesusu “Liráü [Bungiu] le ábanrügüti” ladüga ligíarügüñein lan ladüga Heowá lábuguarügü (Huan 3:16). Nadagimeinti Hesusu úara luma Heowá, le Lúguchi, adügei sun le líbiri katei (aliiha huméi Ariñawagúni 8:30). Buídumemegili lumadagua Heowá luma Hesusu. Hesusu “Dimureibei”, mini lan lira ligía lan ayanuhabei lidan liri Bungiu, asubudiragüdei luganute luma ladundehan Lúguchi (Huan 1:14).
2. Ka meha uagu liabin Hesusu ubouagun?
Kéiburi 2,000 irumu guentó lúmagiñe layusuruni Heowá lani sífiri sandu lun ladügün aban milaguru: lásügüragüdüni libagari Hesusu—aban ánheli gabafuti—turageirugun María, aban nibureintu gañüngiru. Ligía nasirua lubéi Hesusu kei gürigia (aliiha huméi Lúkasi 1:34, 35). Ñǘbuinti Hesusu ubouagun lun ligía lan Kristu o Mesíasi le füramasewabei luma lun lesefuruniña gürigia. a Luagu Hesusu lagunfulira sun profesía le tídanbei Bíbülia luáguti Mesíasi. Ídehati meha lira lun hasubudiruni gürigia ligía lan Krístubei “le Liráü Bungiu le wínwanbei” (Matéu 16:16).
3. Halíañein san Hesusu guentó?
Lárigiñebei lounwen Hesusu kei aban gürigia, aba láguyuguagüdüni Heowá kei aban sífiri, ábati lagiribudun sielun. Ñein líchigei “Bungiu liñun-agei uéiriguni lun” (Filipuna 2:9). Guentó, wéiritimahali lubafu Hesusu, Heowarügüñein gabafutima luéi.
SIGÍ HUMÁ AFURENDEIRA
Sigí humá afurendeira káteitima lan Hesusubei luma ka lan uagu lunti lubéi wasubudiruni.
4. Mama Hesusu Búngiubei le suntigabafu
Lau sun aban lan sífiri gabafuti Hesusu sielu, ariñagatu Bíbülia gaganbadi lan lun Heowá le Lubungiute ani Lúguchi. Ka uagu wariñagei katei le? Ariha huméi BIDÉU, ariha humaamugei le tarufudahabei Bíbülia luagu amu lan Bungiu le suntigabafu luéi Hesusu.
Líderagubadiwa bérusu burí le lunbei waliihani lun warihini amu lan lubara Heowá luéi Hesusu. Aliiha huméi kada bérusu, ábameti hayanuhan luagu álügüdahani burí le:
Aliiha huméi Lúkasi 1:30-32.
-
Según le lariñagubei ánheli, ka lubarabei Hesusu lumoun Heowá, “Bungiu le íñubei”?
Aliiha huméi Matéu 3:16, 17.
-
Ka lariñagubei umalali le aganbúbei siélugiñe dan le labadiseirunbei Hesusu?
-
Subuditi san hun ka lan ayanuhabei siélugiñe?
Aliiha huméi Huan 14:28.
-
Kátima wéiyaalibei ani gabafutima ligía hadan bián gürigia, úguchili o isaani?
-
Ka labusenrubei Hesusu lariñagun dan le lagúarunbei lun Heowá “Núguchi”?
Aliiha huméi Huan 12:49.
-
Saminati meha san Hesusu ábanmeme lan gürigia ligía luma Lúguchi? Agia huguya, ka hasaminarubei?
5. Arufuda lumuti Hesusu ligía lan Mesíasibei
Anihein saragu profesía tidan Bíbülia le íderagubaliña gürigia asubudirei Mesíasi le lanúadirubei Bungiu lun lesefuruniña sun gürigia. Ariha huméi BIDÉU le afuranguagüdübei fiu profesía le agunfulirubei luagu Hesusu dan meha le ya lubéi ubouagu.
Aliiha huméi burí profesía tídangiñeti Bíbülia le, ábameti hayanuhan luagu álügüdahani burí le:
Aliiha huméi Mikeasi 5:2 lun harihini halía lan nasirua lan Mesíasi. b
-
Gúnfuliti san profesía le dan le nasirua lubéi Hesusu? (Matéu 2:1).
Aliiha huméi Sálumu 34:20 luma Sakaríasi 12:10 lun harihini ka lan tariñagubei Bíbülia luáguti lounwen Mesíasi.
-
Gúnfuliti san profesía burí le? (Huan 19:33-37).
-
Afiñetün san adüga lan Hesusu somu katei lun lagunfulirun profesía burí le?
-
Ka larufudahabei le hun luagu Hesusu?
6. Barüti wasubudiruni Hesusu saragu buiti woun
Ariñagatu Bíbülia lunti lan wafurendeirun luagu Hesusu luma luagu wadagimanu le líchugubei Bungiu lun. Aliiha huméi Huan 14:6 luma 17:3, ábameti hayanuhan luagu álügüdahani le:
-
Ka uagu lunti lubéi wasubudiruni Hesusu?
Dará lumuti Hesusu üma lun gamadagua wamá luma Bungiu. Arufudaha lumuti inarüni luagu Heowá. Hesusu giñe ayusurúbei lun gayara lan wibihin ibagari magumuchaditi.
LE HARIÑAGUBEI FIU GÜRIGIA: “Mafiñentiña gefentiña luagu Heowá luagu Hesukrístu”.
-
Kaba hamuga hóunaba?
LE HAFURENDEIRUBEI
Aban sífiri gabafuti Hesusu. Ligía Liraübei Bungiu ani ligía Mesíasibei.
Águyuguagüdüni
-
Ka uagu lariñawagúa Hesusu lan “ígiramaübei, le lóugiñebei sun katei le adügǘbei”?
-
Ka meha ladügübei Hesusu lubaragiñebei liabin ubouagun?
-
Ida liña wasubudiruni Hesusu lan Mesíasibei?
FURENDEI HUMÁ LANWOUN
Ariha humá amu katei le arufudubalin Hesusu lan Mesíasibei.
“Arufuda lumuti san profesía Hesusu lan Mesíasibei?” (Ariñahani lídangiñeti jw.org)
Ítara san kei gasaanigu hamá gürigia ubouagu gasaani lani Bungiu Hesusu?
“Ka uagu laguarúa lun Hesusu Liráü Bungiu?” (Ariñahani lídangiñeti jw.org)
Ariha huméi ka lan uagu mama lubéi aban arufudahani tídangiñeti Bíbülia arufudahani luáguti ǘrüwaguañein lan Bungiu lidan aban.
“Jesús: ¿es Dios?” (La Atalaya, to lánina 1 lidan gádürü-hati, irumu 2009)
Aliiha huméi ida liña lan lasansirun tibagari aban würi lárigiñebei taturiahan luagu Hesusu tidan Bíbülia.
a Lidan arufudahani 26 luma 27, wafurendeirubei ka lan uagu hemegeira gürigia lun hesefurún luma ida liña lan lesefuruniwa Hesusu.
b Ariha huméi lanwoun ariñahani 2 le afuranguagüdübei kaba lan meha dan lachülaagua Mesíasi.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
