CAWN DINGMI 15
Jesuh Cu Ahodah A Si?
Jesuh cu minung tuanbia ah a min a thang bikmi pakhat a si. Mi tampi nih Jesuh min cu an hngalh nain a kong tu cu tampi an hngal lo. Cun Jesuh cu ahodah a si taktak timi kong he aa tlai zongin ruahnak a phunphun an ngei. Jesuh kong he aa tlaiin Baibal nih zeidah a chim?
1. Jesuh cu ahodah a si?
Jesuh cu vancung ah a ummi a ṭhawng tukmi thlarau minung a si. Anih cu Jehovah nih zeizong vialte a ser hlanah a rak sermi a si. Cucaah “Pathian fater, sermi thil vialte hna nakin a cungnung deuhmi” a si. (Kolose 1:15) Jehovah nih direct in a sermi cu amah lawng a si caah Baibal nih Jesuh kha Pathian “Fapa ngeihchunte” in a langhter. (Johan 3:16) A Pa, Jehovah he naih tein rian an ṭuanṭi i a dang thil vialte sernak zongah a bawmh. (Phungthlukbia 8:30 rel.) Jesuh cu Jehovah he a ṭhami pehtlaihnak a ngei peng. Pathian biachimtu, “Bia” in zumhfek tein rian a ṭuan peng i Pathian bia le a lamhruainak kong kha a chim.—Johan 1:14.
2. Jesuh cu vawleicung ah zeicah a rat?
A luancia 2,000 lio hrawngah Jehovah nih Jesuh nunnak kha vancung in ngaknu thiang Mary nauinn ah ṭhial dingin a thiang thlarau kha khuaruahhar lam in a rak hman. Cuticun Jesuh cu minung pakhat in hrin a rak si. (Luka 1:34, 35 rel.) Jesuh cu biakammi Messiah asiloah Khrih si awk le minung nunnak khamh awkah vawlei ah a ra. a Messiah kong he aa tlaiin Baibal chimchungmi vialte cu Jesuh cungah a tling. Mah nih Jesuh cu “a nungmi Pathian Fapa, Messiah” a si ti hngalh awkah mi pawl kha a bawmh hna.—Matthai 16:16.
3. Atu ah Jesuh cu khoika ah dah a um?
Jesuh cu minung pakhat in a thih hnuah thlarau pum in a tho ṭhan i vancung ah a kai ṭhan. “Cunglei a sannak bik hmun ah khin Pathian nih a cawi.” (Filipi 2:9) Atu ah Jesuh cu a ṭhawng tukmi vancungmi pakhat a si cang i amah nakin a ṭhawng deuhmi cu Jehovah lawng a si.
TAM DEUH IN HLATHLAI
Jesuh cu ahodah a si taktak timi kong le a kong hngalh cu zeicah a biapit tuk timi kong kha tam deuh in hlathlai.
4. Jesuh cu Lianngan Bik Pathian a si lo
Baibal nih Jesuh cu vancung ah a ṭhawng tukmi vancungmi pakhat a si ko nain a Pathian le a Pa, Jehovah nawl kha a ngaih tiah a kan cawnpiak. Zeicah cutin kan chim khawh? Jesuh cu Pathian he zeitindah an i lawh lo timi kong he aa tlaiin Baibal cawnpiakmi kong hngalh awkah, VIDEO kha piah.
A tanglei Baibal caang hna nih Jehovah le Jesuh an i pehtlaihnak kong kha hngalhthiam awkah a kan bawmh. Baibal caang pakhat cio kha rel law a tanglei biahalnak hna hi i ruah u.
Luka 1:30-32 rel.
-
Vancungmi pakhat nih “Cungnung Bik” Pathian Jehovah le Jesuh an i pehtlaihnak kha zeitindah a langhter?
Matthai 3:16, 17 rel.
-
Jesuh tipil a in lioah vancung in zei bia dah theih a si?
-
Mah cu aho aw dah a si tiah na ruah?
Johan 14:28 rel.
-
Ahodah a upa deuh i nawl a ngei deuh? A pa maw asiloah a fapa dah?
-
Jesuh nih Jehovah kha ka Pa tiah a auh tikah zeidah a chim duhmi a si?
Johan 12:49 rel.
-
Jesuh nih a Pa le amah cu kan i khat tiah a ruat maw? Zeitindah na ruah?
5. Jesuh cu Messiah a si ti kha zeinihdah a langhter?
Baibal ah Pathian nih minung khamh awkah a thimmi Messiah kong he aa tlaiin chimchungbia tampi a um. Mah nih mi pawl kha Messiah cu ahodah a si ti kha hngalh awkah a bawmh hna. Jesuh vawleicung i a rat tikah a rak tlingmi chimchungbia cheukhat kong hngalh awkah, VIDEO kha piah.
Mah Baibal chimchungbia hna hi rel u law a tanglei biahalnak hna hi i ruah u:
Messiah cu khoika hmun ah dah a chuah lai timi kong hngalh awkah Mikah 5:2 rel. b
-
Jesuh chuahnak nih mah chimchungbia hi a rak tlinter maw?—Matthai 2:1.
Messiah thihnak he aa tlaiin Baibal chimchungbia kong hngalh awkah Salm 34:20 le Zekhariah 12:10 rel.
-
Mah chimchungbia hna cu an tling maw? —Johan 19:33-37.
-
Jesuh nih mah chimchungbia hna kha a tlinter khawh tiah na ruat maw?
-
Mah nih Jesuh kong he a tlaiin zeidah a langhter?
6. Jesuh kong hlathlainak in ṭhathnemhnak kan hmu
Baibal nih Jesuh le a rian kong hlathlai cu a biapi tukmi a si tiah a ti. Johan 14:6 le 17:3 rel law mah biahalnak hi i ruah u:
-
Jesuh kong hlathlai cu zeicah a biapit tuk?
Jesuh nih Pathian hawikom si khawh awkah lam a kan hunpiak. Jehovah kong he aa tlaiin biatak kha a kan cawnpiak i amah thawngin zungzal nunnak kan hmu kho
MI CHEUKHAT CHIMMI: “Jehovah Tehte Hna nih Jesuh kha an zum lo.”
-
Zeitindah na leh lai?
A TAWINAK
Jesuh cu a ṭhawng tukmi thlarau minung a si. Cun Pathian Fapa a si i Messiah zong a si.
I Ruahṭi Ṭhannak
-
Jesuh cu zeicah “Pathian fater, sermi thil vialte hna nakin a cungnung deuhmi” tiah auh a si?
-
Jesuh nih vawleicung a rat hlanah zeidah a rak tuah?
-
Jesuh cu Messiah a si ti kha zeitindah kan hngalh khawh?
HLATHLAI CHAP
Messiah in Jesuh a rian kong kha tam deuh in hlathlai.
“Messiah kong Chimchungbia nih Jesuh cu Messiah a Si ti a Langhter Maw?” (Website capar)
Minung nih fa an ngeih bantukin Pathian cu Jesuh i a pa a hung si tiah Baibal nih a kan cawnpiak maw timi kong kha hlathlai.
“Jesuh cu Pathian Fapa tiah Zeicah Auh a Si?” (Website capar)
Thumkomh pathian timi cu zeicah Baibal cawnpiaknak a si lo timi kong kha hlathlai.
Nu pakhat cu Jesuh kong he aa tlaiin Baibal chimmi kong a hlathlai hnuah zeitindah a nunning aa thlen timi kong kha rel.
“Judah Mi Nu Pakhat nih a Zumhnak a Dothlat Ṭhannak a Ruang a Chim” (2013, May, I Hlau!)
a Cawn Dingmi 26 le 27 ah minung cu zeicah khamh kan herh timi kong le Jesuh nih zeitindah a kan khamh timi kong kha a fianter lai.
b Jesuh cu zeitikah dah vawleicung ah a rat lai timi chimchungbia kong a dikthliar kha A Donghnak I Fianternak 2 ah zoh.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
