ZANNOO 15
Aŋ La Yezu?
Yezu eɛ neɛ na kaŋa naŋ taa yuori yaga zaa a teŋɛ ŋa zuŋ. Kyɛ o yuori yoŋ la ka noba yaga baŋ, kyɛ ba ba lɛ baŋ yelzaa kyaaroo. Noba yaga meŋ taaɛ teɛrɛ tɛɛtɛɛ a kyaare neɛ naŋ la Yezu meŋɛmeŋɛ. Kyɛ wala ka a Baabole yel kyaare Yezu?
1. Aŋ la Yezu?
Yezu eɛ maleke naŋ taa kpeɛ̃o yaga zaa a be sazuŋ. Ona ka Jehoova Naaŋmen daŋ maale sɛre kyɛ maale boma zaa. Azuŋ ka a Baabole yelka ona la “a bi-dɛndɛŋ a bon-iri-zaa poɔ.” (Kolosi 1:15) A Baabole yeleeŋ ka Yezu e la Naaŋmen “bidɔɔ yeni” bonso, Jehoova meŋɛ yoŋ la maale Yezu. (Gyɔɔn 3:16) Yezu neŋ o Saa Jehoova da laŋ tonɛɛ toma, Yezu da somooŋ Oŋ maale boma zaa. (Kanne Yeng Yelibie 8:30.) A yi ana saŋa na zaa a waana zenɛ, Jehoova neŋ Yezu taaɛ niiloŋ naŋ e kpeɛŋaa yaga zaa. A Baabole boɔlɛɛ Yezu ka “a Yelbiri,” bonso ona la maŋ are Naaŋmen gbɛbɔgreŋ a yele yɛlɛ korɔ Naaŋmen noba. Ka Naaŋmeneŋ wa boɔrɔ ka o de duoro, bee sowuli mine ko noba, o maŋ de ko la Yezu oŋ manne ko ba.—Gyɔɔn 1:14.
2. Bonso ka Yezu da wa a teŋɛzu?
Aŋa yuomo 2,000 naŋ pare la ŋa, ka Jehoova da tu soseɛlee poɔ a de o vooroŋ soŋ na a leɛre Yezu nyɔvore a yi sazu a wa eŋ pɔge kaŋa naŋ da ba baŋ dɔɔ baŋ boɔlɔ Mareya poɔŋ. Azuŋ, ba da dɔgɛɛ Yezu aŋa nensaalaa. (Kanne Luka 1:34, 35.) Jehoova da eŋɛɛ noɔre ka, neɛ kaŋa na wa la a donɛɛ ŋa zu a wa e Mɛzaaya bee Krista, a faa nensaaleba yi ba yelwonni zaa poɔŋ. Saŋa na Yezu naŋ da wa a teŋɛzu na ana toma ŋa la oŋ da wa toŋ. a Baabole daŋyelbo na zaa naŋ kyaare a Mɛzaaya bee a Krista na zaa da nyɛɛ eebo a kyaare Yezu, lɛ da vɛŋɛɛŋ ka noba wa baŋ ka Yezu la “a Krista, a Naaŋmen-vore Bidɔɔ.”—Matio 16:16.
3. Yeŋ ka Yezu be pampana?
Yezu naŋ da wa a teŋɛ ŋa zu a wa kpi na, Naaŋmen da seŋooŋ yi kũũni poɔŋ. O da seŋooŋ oŋ leɛ maleke, bebie awala mine puoreŋ, o da leɛ do la sazu. Saŋa na oŋ da gaa sazu na, “Naaŋmen da zɛge O la ka O do saa yaga zaa.” (Filipae 2:9) Pampana ŋa, a yi Jehoova yoŋ puoreŋ, Yezu la taa kpeɛ̃o yaga zaa a gaŋ neɛzaa naŋ be sazuŋ ane teŋɛzuŋ.
ZANNE YƐLƐ YAGA POƆ
Zanne yɛlɛ yaga a kyaare neɛ na meŋɛ naŋ la Yezu ane ananso a naŋ e nimizeɛ ka te zanne o yɛlɛ.
4. Yezu ba e a Kpeɛ̃o Zaa Daana Naaŋmen
A Baabole wuleeŋ ka Yezu taa la kpeɛ̃o yaga zaa sazuŋ, kyɛ o sigree o meŋɛ yaga zaa a ko Jehoova, bonso Jehoova la o Saa ane o Naaŋmen. Ananso la wala teŋ yel lɛ? Ŋmɛ a VIDIO a nyɛ lɛ a Baabole naŋ wuli wɛltaa naŋ be Yezu ane a kpeɛ̃o zaa daana Naaŋmen kpakyagaŋ.
A sɛgre ŋa naŋ tu na na soŋ teŋ ka te nyɛ wɛltaa naŋ be Jehoova ane Yezu kpakyagaŋ. Ka yɛ naŋ wa kanne a sɛgre kaŋa zaa, yɛ gyieli a soorebie naŋ tu na yɛlɛ.
Kanne Luka 1:30-32.
-
Sobuo ka yɛlɛ na a maleke naŋ yel na vɛŋ teŋ baŋ wɛltaa naŋ be Yezu ane Jehoova “a Daana Naaŋmen bee Kpeɛ̃o Zaa Daana” na kpakyagaŋ?
Kanne Matio 3:16, 17.
-
Yezu suobu deebo na zieŋ, boŋ ka a kɔkɔre naŋ da yi sazu na da yel?
-
Ho teɛre ka nembuo kɔkɔre da la?
Kanne Gyɔɔn 14:28.
-
Bi-saa ane o bidɔɔ, buo sobaŋ kore o tɔsoba? Ka buo sobaŋ taa kpeɛ̃o o tɔ zuŋ?
-
Yezu boɔlɛɛ Jehoova ka o Saa. Azuŋ, boŋ ka a yɛlɛ ŋa wulo te?
Kanne Gyɔɔn 12:49.
-
Yezu teɛre ka o neŋ o Saa Jehoova seŋɛɛ taa bee? Wala hoŋ meŋ teɛre?
5. Sieree naŋ bebe a wuli ka Yezu la a Mɛzaaya
Daŋyelbo yaga be la a Baabole poɔŋ a kyaare a Mɛzaaya. A Mɛzaaya la neɛ Naaŋmen naŋ kaa iri ka o wa deɛ nensaaleba yi ba yelwonni zaa poɔŋ. Ana daŋyelbo ŋa la da soŋ noba baŋ baŋ neɛ na naŋ la a Mɛzaaya. Saŋa na Yezu naŋ da wa a teŋɛzu na, a daŋyelbo naŋ kyaare a Mɛzaaya na zaa da nyɛɛ eebo o eŋɛŋ. Ŋmɛ a VIDIO a nyɛ a Mɛzaaya daŋyelbo na mine naŋ nyɛ eebo Yezu eŋɛŋ.
Kanne a daŋyelbo tɛɛtɛɛ naŋ be a Baabole poɔŋ na, a kyɛ gyieli a soorebie naŋ tu na yɛlɛ:
Kanne Maika 5:2 a nyɛ zie na baŋ na dɔge a Mɛzaaya. b
-
Ka lɛ zie na baŋ da dɔge Yezu na vɛŋɛɛŋ ka a daŋyelbo ŋa nyɛ eebo bee?—Matio 2:1.
Kanne Yieme 34:20 ane Zekaraiya 12:10 a nyɛ daŋyelbo naŋ bebe kyaare a Mɛzaaya kũũ yɛlɛ.
-
Ana daŋyelbo ŋa da nyɛɛ eebo bee?—Gyɔɔn 19:33-37.
-
Ho teɛre ka Yezu neŋ noba mine la da sɛgre yɛlɛ biŋ ka lɛ na vɛŋ ka a daŋyelbo ŋa zaa na nyɛ eebo o eŋɛŋ bee?
-
Boŋ ka a yɛlɛ ŋa wuli bo a kyaare Yezu?
6. Ka teneeŋ zanna Yezu yɛlɛ te na nyɛ la tɔnɔ
A Baabole wuleeŋ ka a eɛ nimizeɛ yaga zaa ka te zanne Yezu yɛlɛ ane toma Naaŋmen naŋ koo ka o tonɔ na yɛlɛ. Kanne Gyɔɔn 14:6 ane 17:3, a kyɛ gyieli a soorebiri naŋ tu na yɛlɛ:
-
Bonso aŋ e nimizeɛ ka te zanne Yezu yɛlɛ?
Yezu yuo la sori ko te ka te wa e Naaŋmen zɔmenne. O da wulee yelmenne naŋ bebe a kyaare Jehoova. A tuuro Yezu eŋɛŋ, te na baŋ nyɛɛ nyɔvore naŋ ba taa baaraa
NOBA MINE MAŊ YELEŊ KA: “Jehoova Sieree Deme ba sage Yezu di.”
-
Wala hoŋ meŋ na yel?
A ZANNOO YELNIMIZEERE
Yezu eɛ maleke naŋ taa kpeɛ̃o yaga. Ona la a Naaŋmen Bidɔɔ ane a Mɛzaaya.
Boŋ Hoŋ Zanne
-
Bonso ka a Baabole yelka Yezu la “a bi-dɛndɛŋ a bon-iri-zaa poɔ”?
-
Sɛre ka Yezu na wa a donɛɛ zu na, boŋ toma oŋ da tonɔ sazuŋ?
-
Wala teŋ e baŋ ka Yezu la a Mɛzaaya?
YƐLƐ MINE NAŊ LƐ BEBE
Zanne yɛlɛ yaga naŋ wuli ka Yezu la a Mɛzaaya.
“A Mɛzaaya Daŋyelbo Yɛlɛ Na Di La Sieree Ka Yezu La A Mɛzaaya Bee?” (Intanɛt zu gane)
Lɛ na nensaaleba naŋ maŋ dɔge biiri na, lɛ meŋ neŋ o zu ka Naaŋmen da dɔge Yezu bee? Zanne nyɛ lɛ a Baabole naŋ yel.
Noba mine maŋ yeleŋ ka a Trinity bee a Saa ane a Bie ane a vooroŋ soŋ laŋɛɛ taa a e Naaŋmen. Zanne nyɛ ananso teŋ na baŋ yelka ana wuluu ŋa ba yi a Baabole poɔŋ.
Kanne nyɛ lɛ pɔge kaŋa zemmo naŋ leɛre saŋa na oŋ wa peɛre nyɛ lɛ a Baabole naŋ yel kyaare Yezu na.
“Gyuu Pɔge Kaŋa Mannɛɛ Ananso Oŋ Leɛ Peɛre O Sagediibu Yɛlɛ Soŋ” (Awake!, May 2013)
a A zannoo 26 ane 27 poɔŋ, te na nyɛɛ ananso a naŋ fɛre ka nensaaleba nyɛ faabo ane sori na Yezu naŋ tu kyɛ faa te.
b Kanne Yɛlɛ Mine Ba Naŋ Wuli A Muni 2 soba na a nyɛ daŋyelbo naŋ wuli saŋa na meŋɛ Yezu naŋ na wa a donɛɛ ŋa zu.
