KALENSEN 15

Yezu ye jɔn lo ye?

A LAMƐN KAAN NIN NA

Yezu ye jɔn lo ye?

Mɔgɔ minw tɔgɔ bɔra kosɔbɛ, u la dɔ ye Yezu ye. Mɔgɔ caaman b’a tɔgɔ lɔn, nka u tɛ koo bɛrɛ lɔn a koo la. Yezu ye mɔgɔ min ye tigitigi, mɔgɔ caaman tɛ ni miiriya kelen ye o koo la. Bibulu be mun lo fɔ a koo la?

1. Yezu ye jɔn lo ye?

Yezu ye mɛlɛkɛ barikaman ye sankolo la. Jehova Ala kɔnna k’ale lo dan fɛɛn bɛɛ ɲɛ. O lo kama a weelela ko “dafɛn bɛɛ la fɔlɔ bangelen.” (Kɔlɔsikaw 1:15, Bible Senuma). Bibulu kɔnɔ, Yezu weelela ko Ala “Denkɛ kelenpe,” sabu Jehova y’ale kelenpe lo dan n’a yɛrɛ bolow ye (Zan 3:16, Bible Senuma). Yezu ye baara kɛ n’a Faa Jehova ye ka fɛɛn tɔɔw bɛɛ dan (Talenw 8:30 kalan). Ale ni Jehova magwɛrɛnin lo ɲɔgɔn na kosɔbɛ. Yezu weelela fana ko “Kuma,” sabu a ye Ala ka kuma lasebaga ye. A ye Ala ka kuma n’a ka cikanw lase kantigiya la mɛlɛkɛw ni adamadenw ma.—Zan 1:14.

2. Mun na Yezu nana dugukolo kan?

A saan 2000 ye nin ye, Jehova ye kabako dɔ kɛ: a ye Yezu niin ta sankolo la k’a don npogotigi dɔ wolonugu la min tɔgɔ ko Mariyamu. O cogo la, Yezu wolola adamaden cogo la (Luka 1:34, 35 kalan). Yezu nana dugukolo kan ka kɛ Masiya ye, o kɔrɔ Krista, walisa ka adamadenw kisi. a Kiraya kuma minw bɛɛ be Bibulu kɔnɔ Masiya koo la, u bɛɛ dafara Yezu koo la. O y’a to mɔgɔw sera k’a faamu ko Yezu lo ye “Ala ka Mɔgɔ wolomanin nin ye, [o kɔrɔ Krista,] Ala Dencɛ.”—Matiyo 16:16.

3. Bi bi nin na, Yezu be min?

Yezu ka ɲɛnamaya bannin kɔ dugukolo kan, Jehova Ala y’a lakunu k’a kɛ mɛlɛkɛ ye ani a kɔsegira sankolo la. O yɔrɔ la, “Ala ka a kɔrɔta k’a sigi fɛn bɛɛ kunna.” (Filipikaw 2:9, Biblu Ala ta Kuma). Bi bi nin na, Yezu lɔyɔrɔ ka bon kosɔbɛ. Ka Jehova niin bɔ a la, ale lo ye duniɲa kuru bɛɛ mɔgɔba ye.

A ƝINI KA DƆ LƆN TUGUN

Yezu ye mɔgɔ min ye tigitigi, an k’a ɲini ka dɔ lɔn tugun o koo la. Ani, an k’a filɛ fɛɛn min kama a kɔrɔtanin lo kosɔbɛ an k’a ɲini ka Yezu lɔn.

4. Yezu tɛ Sebagayabɛɛtigi Ala ye

Bibulu b’a yira ko hali ni Yezu ye mɛlɛkɛ barikaman ye sankolo la, a be kolo a Faa Ala Jehova ye. Mun lo b’o yira? A’ ye VIDEWO filɛ walisa k’a lɔn Yezu lɔyɔrɔ ye min ye Sebagayabɛɛtigi Ala kɔrɔ.

VIDEWO: Yezu Krista ye Ala ye wa? (3:22)

Vɛrise minw be jukɔrɔ, u b’an dɛmɛ k’a faamu jɛnɲɔgɔnya min be Jehova ni Yezu cɛ. A’ y’o vɛrise kelen kelen bɛɛ kalan. O kɔ, a’ ye baro kɛ ka ɲiningali nunu jaabi.

Luka 1:30-32 kalan.

Mɛlɛkɛ ka fɔta la, jɛnɲɔgɔnya juman lo be yen “Fɛɛn bɛɛ kuntigi Ala” ni Yezu cɛ?

Matiyo 3:16, 17 kalan.

Yezu batizenin kɔ, kumakan dɔ bɔra sankolo la ka mun lo fɔ?
E ka miiri la, jɔn kumakan tun lo?

Zan 14:28 kalan.

Faa n’a deen cɛ, jɔn lo ka kɔrɔ ani jɔn lo be kuntigiya kɛ tɔɔ kelen kan?
Yezu ye Jehova weele ko a Faa. O b’an dɛmɛ ka mun lo faamu?

Zan 12:49 kalan.

Yala Yezu tun b’a miiri ko ale n’a Faa ye mɔgɔ kelen lo ye wa? E be mun lo miiri o la?

5. Dalilu jumanw b’a yira ko Yezu lo ye Masiya ye?

Kiraya kuma caaman be Bibulu kɔnɔ minw b’an dɛmɛ k’a lɔn mɔgɔ min lo ye Masiya ye, o kɔrɔ, Ala ye mɔgɔ min sugandi ka adamadenw kisi. Yezu ye kiraya kuma minw dafa k’a to dugukolo kan, a’ ye VIDEWO filɛ k’u dɔw lajɛ.

VIDEWO: Yezu ye kiraya kuma dɔw dafa (3:03)

A’ y’o kiraya kumaw kalan. O kɔ, a’ ye baro kɛ ka ɲiningali nunu jaabi:

Mise 5:1 kalan walisa k’a lɔn Masiya tun ka ɲi ka wolo yɔrɔ min na. b

O kiraya kuma dafara wa?—Matiyo 2:1.

Zaburuw 34:21 ani Zakari 12:10 kalan walisa k’a lɔn Bibulu tun kɔnna ka min fɔ Masiya saya koo la.

O kiraya kuma dafara wa?—Zan 19:33-37.
Yala Yezu tun be se ka koow cogoya yɛlɛma walisa o kiraya kumaw ka dafa ale koo la wa?
O be mun lo yira i la Yezu koo la?

6. A kɔrɔtanin lo k’a ɲini ka Yezu lɔn

Bibulu b’a yira ko a kɔrɔtanin lo kosɔbɛ an k’a ɲini ka Yezu lɔn ani k’a lɔn fana a lɔyɔrɔ ye min ye. Zan 14:6 ani 17:3 kalan. O kɔ, a’ ye ɲiningali nin kɛ ani ka baro kɛ o kan:

Mun na a kɔrɔtanin lo kosɔbɛ an k’a ɲini ka Yezu lɔn?

Yezu ye sira yɛlɛ walisa an ka se ka kɛ Ala teriw ye. A ye mɔgɔw dɛmɛ ka tiɲɛn lɔn Jehova koo la. Ale sababu la, an be se ka ɲɛnamaya banbali sɔrɔ.

NI MƆGƆ DƆ Y’A FƆ I YE KO: “Jehova Seerew lanin tɛ Yezu la.”