UKPEPN̄KPỌ 15
Anie ke Jesus Edi?
Jesus enen̄ede ọwọrọ etop. Edi ata ediwak owo ẹdiọn̄ọ enyịn̄ esie kpọt, mmọ inen̄ekede idiọn̄ọ ata owo emi enye edide. Okpobụp mme owo m̀mê Jesus edi anie, nsio nsio n̄kpọ ke edikop. Nso ke Bible enen̄ede etịn̄ aban̄a Jesus?
1. Anie ke Jesus edi?
Jesus odu ke heaven; enye enen̄erede enyene odudu. Jesus ke Jehovah Abasi ekebem iso obot. Oro anam ẹkot enye “akpan ke otu kpukpru edibotn̄kpọ.” (Colossae 1:15) Bible okot Jesus “ikpọn̄-ikpọn̄ edibon Eyen” Abasi, sia Jesus kpọt ke Jehovah akada ubọk esie obot. (John 3:16) Ekem Jesus ama adiana ye Ete esie Jehovah anam utom, an̄wam enye obot kpukpru n̄kpọ eken. (Kot Mme N̄ke 8:30.) Jesus enen̄ede ekpere Jehovah Abasi. Bible okot enye “Ikọ,” sia enye edi etịn̄ikọ ke ibuot Abasi ke ata ediwak isua, esinyụn̄ anam ẹdiọn̄ọ se Abasi oyomde.—John 1:14.
2. Nso ikanam Jesus edi isọn̄?
Ke n̄kpọ nte isua 2,000 emi ekebede, Jehovah ama anam utịben̄kpọ kiet. Enye ama ada edisana spirit esie anam Jesus edimana nte owo mi ke isọn̄. Eyenan̄wan emi mîkọfiọkke erenowo akaman Jesus—enye ekekere Mary. Nte Jesus akasan̄ade edimana nte nsekeyen edi oro. (Kot Luke 1:34, 35.) Jehovah ọkọnọ Jesus edi isọn̄ man edidi Messiah, m̀mê Christ, oro ẹken̄wọn̄ọde, onyụn̄ anyan̄a ubonowo. a Kpukpru profesi oro ẹketịn̄de ẹban̄a Messiah ke Bible ama osu Jesus ke idem onyụn̄ anam mme owo ẹdiọn̄ọ ke Jesus edi “Christ, Eyen odu-uwem Abasi.”—Matthew 16:16.
3. Jesus odu ke m̀mọ̀n̄ idahaemi?
Ke Jesus ama akakpa, ẹma ẹnam enye eset nte angel afiak ọnyọn̄ heaven. Ke enye ama akafiak ọnyọn̄ aka ekesịm heaven, Abasi ama emenede enye itie, onyụn̄ ọnọ enye “itie emi okon̄de.” (Philippi 2:9) Idahaemi Jesus enen̄ede okpon itie—Jehovah Abasi kpọt okpon itie akan enye.
SỊN IDEM KPEP
Se nsio nsio n̄kpọ en̄wen oro owụtde owo emi Jesus enen̄erede edi, ye ntak emi enen̄erede ọfọn ikpep n̄kpọ iban̄a enye.
4. Idịghe Jesus edi Ata Ọkpọsọn̄ Abasi
Bible owụt ke kpa ye oro Jesus enen̄erede okpon itie ke heaven, ke enye osụk odu ke idak Ete esie, Jehovah Abasi. Isan̄a didie idiọn̄ọ? Se VIDIO emi ke oyokụt se iwụtde ke idịghe Jesus edi Ata Ọkpọsọn̄ Abasi.
Itie Bible kiet kiet oro ẹtienede mi ẹwụt ke Jehovah ye Jesus ẹdi nsio nsio owo. Kot itie Bible emi kiet kiet, ẹbọrọ mbụme oro ẹtienede, ẹnyụn̄ ẹneme ẹban̄a mmọ.
Kot Luke 1:30-32.
-
Ikọ angel oro owụt ke Jesus edi nso ọnọ Jehovah Abasi, emi edide “Ata Edikon̄”?
Kot Matthew 3:16, 17.
-
Ke ini Jesus akanade baptism ama, uyo emi okotode heaven ọkọdọhọ didie?
-
Ekere ke anie iketie ke heaven itịn̄ ikọ oro?
Kot John 14:28.
-
Ke otu ete ye eyen, anie isisọn̄ọ owo inyụn̄ ikpon itie ikan?
-
Jesus ndikọdọhọ ke Jehovah edi Ete imọ owụt nso?
Kot John 12:49.
-
Ndi Jesus ada nte ke imọ ye Ete imọ idi ukem owo? Afo ada mmọ didie?
5. Se ikowụtde ke Jesus edi Messiah
Bible ọdọn̄ọ ediwak prọfesi emi akan̄wamde mme owo ẹdiọn̄ọ Messiah—owo emi Abasi ekemekde nte andinyan̄a ubonowo. Se VIDIO emi man okụt ndusụk prọfesi oro okosude Jesus ke idem ini enye odude mi ke isọn̄.
Kot prọfesi oro ọdọn̄ọde ke mme itie Bible oro ẹtienede mi:
Kot Micah 5:2 man okụt ebiet emi ẹkedọhọde ke Messiah edimana do. b
-
Ndi Jesus akamana do nte ẹkedọhọde?—Matthew 2:1.
Kot Psalm 34:20 ye Zechariah 12:10 man okụt ndusụk prọfesi oro akaban̄ade n̄kpa Messiah.
-
Ndi ofụri prọfesi oro ama osu ke idem Jesus?—John 19:33-37.
-
Ndi emekere ke Jesus okodiomi ete ẹnam mme n̄kpọ oro?
-
Oro owụt fi ke Jesus edi nso?
6. Iyadia ufọn n̄kpọ oro ikpepde iban̄a Jesus
Bible owụt ke enen̄ede ọfọn ikpep n̄kpọ iban̄a Jesus ye utom emi Abasi ọnọde enye. Kot John 14:6 ye 17:3, ekem ẹbọrọ mbụme emi ẹnyụn̄ ẹneme ẹban̄a enye:
-
Ntak emi ọfọnde ikpep n̄kpọ iban̄a Jesus?
Jesus akanam nnyịn ikeme ndidi ufan Abasi. Enye ama ekpep mme owo akpanikọ aban̄a Jehovah; nnyịn imonyụn̄ ikeme ndinyene uwem nsinsi ke ntak esie
NDUSỤK OWO ẸSIDỌHỌ ẸTE: “Mme Ntiense Jehovah idiọn̄ọke Jesus.”
-
Nso ke ọkpọdọhọ utọ owo oro?
SE IKPEPDE
Jesus odu ke heaven nte angel; enye onyụn̄ enen̄ede enyene odudu. Enye edi Eyen Abasi ye Messiah.
Se M̀mê Emeti
-
Ntak emi ẹkotde Jesus “akpan ke otu kpukpru edibotn̄kpọ”?
-
Nso ke Jesus akanam mbemiso enye edide isọn̄?
-
Nso iwụt ke Jesus edi Messiah?
KPEP N̄KPỌ EN̄WEN
Se nsio nsio n̄kpọ en̄wen oro anamde idiọn̄ọ ke Jesus edi Messiah.
“Ndi Mme Prọfesi Oro Aban̄ade Messiah Owụt ke Jesus Ekedi Messiah?” (Odu ke jw.org)
Se m̀mê Bible ọdọhọ ke Abasi okobon Jesus ukem nte mme owo ẹsibonde nditọ.
Se se iwụtde ke Bible idọhọke ke Abasi edi ita-ke-kiet.
Se se ikanamde eyenan̄wan kiet okpụhọde, ke enye ama okodụn̄ọde se Bible etịn̄de aban̄a Jesus.
“N̄wan Jew Etịn̄ Ntak Emi Enye Ọkọkpọn̄de Ido Ukpono Esie” (Ẹdemede!, July 2013)
a Ke Ukpepn̄kpọ 26 ye 27, oyokụt ntak emi nnyịn mme owo iyomde edinyan̄a, ye nte Jesus anyan̄ade nnyịn.
b Se Se Ẹwetde Ẹdian 2 ke oyokụt prọfesi oro akaban̄ade nnennen ini emi Jesus ediwụtde idem nte Messiah.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
