ADZESUA 15
Woana Nye Jesus?
Sɛ yɛka hɔn a wɔagye dzin paa wɔ abakɔsɛm mu a, Jesus ka ho. Nyimpa pii nyim Jesus ne dzin, naaso wonnyim noho nsɛm pii, na ɔsor adwen a nyimpa pii so wɔ wɔ noho. Ebɛn asɛm na Bible no ka fa noho?
1. Woana nye Jesus?
Jesus yɛ ɔbɔfo bi a ɔwɔ tum. Ɔtse sor. Jehovah Nyankopɔn na ɔbɔɔ no, na ɔbɔɔ no ana ɔrobɔ biribiara. Iyi ntsi, wɔfrɛ no “abɔdze nyina abakan.” (Colossaefo 1:15) Bible no frɛ Jesus dɛ Nyankopɔn ne “Ba a ɔwoo no kor” osiandɛ aber a nna Jehovah robɔ Jesus no, nna obiara nnka noho. (John 3:16) Nna mframa mmfa Jesus na n’Egya Jehovah ntamu koraa, na ɔboaa n’Egya ma ɔbɔɔ ndzɛmba afofor a aka no. (Kenkan Mbɛbusɛm 8:30.) Jesus nye Jehovah da ho ara wɔ ebusuabɔ a no mu yɛ dzen. Ɔdze nokwardzi rosom dɛ Nyankopɔn ne kasamaafo, na osiandɛ ɔdze Nyankopɔn ne nkra na n’akwankyerɛ ma ntsi, wɔfrɛ no “Asɛm no.”—John 1:14.
2. Ebɛnadze ntsi na Jesus baa asaase do?
Bɔbor mfe 2,000 a abɛsen kɔ no, Jehovah yɛɛ anwanwadze bi. Oyii Jesus no nkwa fii sor, na ɔdze kɛhyɛɛ ɔbaabun bi a wɔfrɛ no Mary n’awodze mu. Ɔdze no sunsum krɔnkrɔn no na ɔdze yɛɛ dɛm. Ɔnam dɛm kwan yi do maa wɔwoo Jesus dɛ nyimpa. (Kenkan Luke 1:34, 35.) Jesus baa asaase yi do dɛ Messiah, anaa Christ a nna wɔahyɛ no ho bɔ no, na ɔaabɛgye adasamba so nkwa. a Messiah no ho asɛm biara a nna Jehovah aka ato hɔ wɔ Bible no mu no, ɔbaa mu wɔ Jesus do, na iyi boaa nkorɔfo ma wohun dɛ Jesus ‘nye Christ, Nyankopɔn tseasefo ne Ba no.’—Matthew 16:16.
3. Henfa na Jesus wɔ sesei?
Jesus wui ekyir no, Nyankopɔn nyaan no dɛ ɔbɔfo, na ɔsanee kɔr sor. Ɔkɔr hɔ no, ‘Nyankopɔn dze no sii adze nyina do.’ (Ephesusfo 1:22) Ndɛ, Jesus yɛ ɔbɔfo a ɔwɔ tum kɛse. Jehovah nkotsee na ɔwɔ tum kyɛn Jesus.
PƐNSAPƐNSA MU KƆ EKYIR
Ma yensua onyii ankasa a Jesus yɛ no ho adze pii na yɛnhwɛ siantsir a no ho hia dɛ yesua noho adze.
4. Jesus nnyɛ Adze Nyina Do Tumfo Nyankopɔn
Bible no kyerɛkyerɛ dɛ ɔmmfa ho dɛ Jesus yɛ ɔbɔfo a ɔwɔ tum wɔ sor no, ɔhyɛ ne Nyankopɔn nye n’Egya, Jehovah, n’ase. Ebɛnadze ntsi na yebotum aka dɛm? Ma yɛnhwɛ VIDEO yi, na yɛnhwɛ nsonsonee a ɔwɔ Jesus na adze nyina do tumfo Nyankopɔn no ntamu.
Kyerɛwnsɛm a odzidzi do yi ma yehu ebusuabɔ a ɔda Jehovah na Jesus ntamu. Ma yɛnkenkan kyerɛwsɛm no mu biara, na yensusu nsɛmbisa a odzidzi do no ho.
Ma yɛnkenkan Luke 1:30-32.
-
Ɔbɔfo no kaa dɛ ebɛn ebusuabɔ na ɔda Jesus na Jehovah Nyankopɔn, “nyia ɔwɔ sorsor” no, ntamu?
Ma yɛnkenkan Matthew 3:16, 17.
-
Aber a wonumaa Jesus wiei no, ndze a ofi sor no kaa dɛn?
-
Ehwɛ a nna ɔyɛ woana ne ndze a?
Ma yɛnkenkan John 14:28.
-
Woana na ɔwɔ tum sen ne nyɛnko? Egya anaa ɔba?
-
Jesus frɛɛ Jehovah dɛ n’Egya. Iyi ka dɛn kyerɛ hɛn?
Ma yɛnkenkan John 12:49.
-
Aso Jesus hu noho dɛ ɔnoara nye Egya no? Edwen ho dɛn?
5. Dza ɔma yehu dɛ nna Jesus nye Messiah no
Nna Messiah no nye nyia Nyankopɔn eyi no dɛ ɔbɛgye adasamba. Bible no hyɛɛ no ho nkɔm pii. Dɛm nkɔnhyɛ yi boaa nkorɔfo ma wohun nyia nna ɔbɛyɛ Messiah no. Ma yɛnhwɛ VIDEO yi, na yɛnhwɛ nkɔnhyɛ ahorow bi a onyaa mbamu wɔ Jesus do aber a nna ɔwɔ asaase do no.
Ma yɛnkenkan Bible nkɔnhyɛ ahorow yi, na yensusu nsɛmbisa a odzidzi do no ho:
Ma yɛnkenkan Micah 5:2 na yɛnhwɛ beebi a nna wɔbɔwo Messiah no. b
-
Aso beebi a wɔwoo Jesus no maa dɛm nkɔnhyɛ yi baa mu?—Matthew 2:1.
Ma yɛnkenkan Ndwom 34:20 na Zechariah 12:10 na yɛnhwɛ dza Bible no kae faa Messiah no no wu ho.
-
Aso nkɔnhyɛ ahorow yi baa mu?—John 19:33-37.
-
Ehwɛ a, Jesus narankasa na ɔmaa dɛm nkɔnhyɛ ahorow yi baa mu wɔ no do a?
-
Ebɛnadze na iyi ma ihu fa Jesus ho?
6. Sɛ yesua Jesus ho adze a, yebenya do mfaso
Bible no ka dɛ no ho hia paa dɛ yesua Jesus nye dza Nyankopɔn pɛ dɛ ɔyɛ no ho adze. Ma yɛnkenkan John 14:6 na 17:3, na yensusu asɛmbisa yi ho:
-
Ebɛnadze ntsi na ohia dɛ yesua Jesus ho adze?
Jesus ama yeehu kwan a yebotum afa do abɛyɛ Nyankopɔn ne nyɛnko. Ɔkyerɛkyerɛɛ nokwar a ɔfa Jehovah ho, na ɔnam Jesus do na yebotum enya onnyiewiei nkwa
BINOM KA DƐ: “Jehovah Adasefo dze, wɔnngye Jesus nndzi.”
-
Sɛ obi ka dɛm a, ibeyi no ano dɛn?
DZA ESUA
Jesus yɛ ɔbɔfo a ɔwɔ tum. Ɔyɛ Nyankopɔn ne Ba nye Messiah no.
Mbobɔdo
-
Ebɛnadze ntsi na wɔfrɛ Jesus dɛ “abɔdze nyina abakan”?
-
Ebɛnadze na Jesus yɛe ansaana ɔreba asaase do?
-
Yesi dɛn hu dɛ Jesus nye Messiah no?
HWEHWƐ PII KA HO
Sua siantsir a yɛreka dɛ Jesus nye Messiah no ho adze pii.
“Aso Nkɔnhyɛ A Ɔfa Messiah Ho No Da No Edzi Dɛ Jesus Nye Messiah No?” (Asɛm bi a ɔwɔ wɛbsaet do)
Kwan a nyimpa fa do wo ba no, aso dɛm kwan no ara do na Nyankopɔn faa do bɛyɛɛ Jesus n’Egya anaa? Hwɛ dza Bible no ka.
“Ebɛnadze Ntsi Na Wɔfrɛ Jesus Dɛ Nyankopɔn Ne Ba?” (Asɛm bi a ɔwɔ wɛbsaet do)
Hwɛ siantsir a Baasakor nkyerɛkyerɛ no nngyina Bible do.
Ɔbaa bi hwehwɛɛ dza Bible no ka fa Jesus ho no mu, na iyi sesaa n’asetsena koraa. Kenkan iyi ho asɛm.
“Jewnyi Ɔbaa Bi Kyerɛkyerɛɛ Siantsir A Ɔsanee Susuu Ne Gyedzi Ho No Mu” (Nyan!, May 2013)
a Wɔ adzesua 26 na 27 mu no, yebosua siantsir a nna ohia dɛ wɔgye adasamba nye kwan a Jesus faa do gyee hɛn no ho adze.
b Hwɛ Nsɛm Bi A Wɔakyerɛ Mu 2 no, na ibohu nkɔnhyɛ a ɔkyerɛ ber pɔtsee a nna Messiah no bɛba.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
