LESONI 15
O Cei o Jisu?
O Jisu e dua vei ira na tamata rogo duadua e vuravura. E levu era kila na yacana, ia era sega ni kila e levu na ka me baleti koya qai duidui nodra nanuma. Na cava e kaya na iVolatabu?
1. O cei o Jisu?
O Jisu e dua na kabula vakayalo kaukaua e tiko mai lomalagi. E buli koya sara ga e liu na Kalou o Jiova, qai muri na ka kece. Oya na vuna e vakatokai kina me “ulumatua ni kabuli kece.” (Kolosa 1:15) E tukuna na iVolatabu ni o Jisu e ‘Luve duabau ga ni Kalou,’ ni buli koya sara ga o Jiova. (Joni 3:16) O Jisu e cakacaka vakavoleka kei na Tamana o Jiova ena nodra buli na ka kece. (Wilika Vosa Vakaibalebale 8:30.) E marautaka tiko ga o Jisu na nona veivolekati kei Jiova. E yalodina me gusunivosa ni Kalou oya me “Vosa,” ni vakasavuya na nona itukutuku kei na nona ivakaro.—Joni 1:14.
2. Na cava e lako mai kina e vuravura o Jisu?
Rauta na 2,000 na yabaki sa oti, e vakayagataka vakacakamana o Jiova nona yalo tabu me tokitaka na bula i Jisu mai lomalagi ina nona katonigone e dua na goneyalewa na yacana o Meri. Qori na sala e mai sucu kina vakatamata e vuravura o Jisu. (Wilika Luke 1:34, 35.) E lako mai vuravura o Jisu me Mesaia yalataki, se o Karisito, me vakabulai ira tale ga na kawatamata. a Na parofisai vakaivolatabu kece me baleta na Mesaia e vakayacori ena vukuna, e rawarawa kina nira kilai koya e levu me “Karisito, na Luve ni Kalou bula.”—Maciu 16:16.
3. Sa tu e vei nikua o Jisu?
Ni mai cava na nona bula vakatamata e vuravura, e vakaturi me dua na kabula vakayalo qai lesu i lomalagi. E “vakacerecerei koya kina na Kalou ena dua na itutu cecere.” (Filipai 2:9) Na gauna qo, sa tiko tale ga vei Jisu na lewa, e taravi Jiova.
VAKEKELI
Kila e levu tale na ka me baleti Jisu kei na vuna e bibi kina meda kilai koya.
4. E sega ni Kalou Kaukaua Duadua
E kaya na iVolatabu ni o Jisu e dua na kabula kaukaua vakayalo mai lomalagi, ia se vakamalumalumu tiko ga vua na nona Kalou na Tamana o Jiova. Eda kila vakacava? Sarava na VIDIO mo kila kina na ka e tukuna na iVolatabu me baleta na itutu nei Jisu kei na Kalou kaukaua duadua.
Eda na kila ena vica na tikinivolatabu qo na kedrau duidui o Jiova kei Jisu. Wilika na tikinivolatabu yadua, qai veivosakitaka na taro tarava:
Wilika Luke 1:30-32.
-
E vakamacalataka vakacava na agilosi na nodrau veiwekani o Jisu kei na Kalou o Jiova o koya e “Cecere Duadua”?
Wilika Maciu 3:16, 17.
-
Na gauna e papitaiso kina o Jisu, na cava e kaya na domo e rogo mai lomalagi?
-
Na cava o nanuma, na domo i cei ya?
Wilika Joni 14:28.
-
O cei e cecere qai levu cake na nona lewa? O tama se o luvena?
-
Na cava e vakaibalebaletaka o Jisu ni vakatokai Jiova me Tamana?
Wilika Joni 12:49.
-
E tukuna tiko o Jisu ni rau tautauvata kei Tamana? Na cava o nanuma?
5. E vakadeitaka o Jisu ni o koya na Mesaia
E tu ena iVolatabu e levu na parofisai ena kilai kina na Mesaia, o koya e digitaka na Kalou me vakabula na kawatamata. Sarava na VIDIO mo kila kina eso na parofisai e vakayacora o Jisu ni gole mai e vuravura.
Wilika e vica na parofisai vakaivolatabu qo, qai veivosakitaka na taro tarava:
Wilika Maika 5:2 mo kila na vanua e sucu kina na Mesaia. b
-
Vakacava e yaco dina na parofisai qo?—Maciu 2:1.
Wilika Same 34:20 kei na Sakaraia 12:10 mo kila kina eso tale na parofisai me baleta nona mate na Mesaia.
-
E vakayacori dina na parofisai qori?—Joni 19:33-37.
-
Vakacava e kila kece tu o Jisu ni na vakayacori na parofisai qori?
-
Na cava o vakadeitaka eke me baleti Jisu?
6. Ena yaga nida vulica na veika me baleti Jisu
E kaya na iVolatabu ni bibi meda vulica na veika me baleti Jisu kei na nona itavi. Wilika Joni 14:6 kei na 17:3, qai veivosakitaka na taro qo:
-
Na cava e bibi kina meda vulica na veika me baleti Jisu?
E vakaraitaka o Jisu na sala meda itokani kina ni Kalou. E vakavulica na ka dina me baleti Jiova, eda na rawata tale ga na bula tawamudu ena vukuna
KA ERA KAYA ESO: “Era sega ni vakabauti Jisu na iVakadinadina i Jiova.”
-
O na sauma vakacava?
KA O VULICA
O Jisu e dua na kabula vakayalo kaukaua. E Luve ni Kalou, e Mesaia tale ga.
Railesuvi
-
Na cava e vakatokai kina o Jisu me “ulumatua ni kabuli kece”?
-
Ni bera ni mai bula e vuravura, na cava e dau cakava tu?
-
Eda kila vakacava ni Mesaia o Jisu?
IKURI
Vulica eso tale na ka me baleti Jisu ena nona itavi vakaMesaia.
“E Vakadinadinataki ena Parofisai me Baleti Jisu ni o Koya ga na Mesaia?” (Ulutaga ena jw.org)
Vakacava e tautauvata na sala e kunekunetaki kina o Jisu kei keda? Dikeva na ka e kaya na iVolatabu.
“Cava e Vakatokai Kina o Jisu me Luve ni Kalou?” (Ulutaga ena jw.org)
Dikeva na vuna e sega ni tokona kina na iVolatabu na Letoluvakalou.
Dikeva nona veisautaka e dua na marama na nona rai ni wilika ena iVolatabu na ka me baleti Jisu.
“Vakamacalataka e Dua na Marama Jiu na Vuna e Dikeva Tale Kina na Nona Vakabauta” (Yadra!, Me 2013)
a Eda na dikeva na Lesoni 26 kei na 27 na vuna meda vakabulai kina na kawatamata kei na sala e cakava kina qori o Jisu.
b Raica na iKuri ni iVakamacala 2 me baleta na parofisai ena gauna me basika kina e vuravura o Jisu.
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
