REIREI 15
Antai Iesu?
Iesu bon temanna i buakoia aomata aika a rangi n tanoata taekaia ma rimoa. A bati aomata aika a kinaa Iesu n arana, ma a aki atai baika bati riki ibukina, ao a bati aika a kakaokoro aia iango ibukin Iesu bwa antai raoi ngaia. Ma tera ae taekinaki n te Baibara ibukin teuaei?
1. Antai Iesu?
Iesu bon te anera ae mwaaka ae maeka i karawa. E karikaki iroun Iehova ae te Atua imwaini karikani bwaai ni kabane. Ibukin anne, e a aranaki bwa “te moanibung i buakoni baika karikaki ni kabane.” (I-Korote 1:15) E taekinaki Iesu n te Baibara bwa ‘Natin te Atua ae ana rikitemanna’ ibukina bwa e karikaki Iesu iroun Iehova n tii ngaia. (Ioane 3:16) E mwamwakuri Iesu i rarikin Tamana ae Iehova, ni buokia ni karikii bwaai ni kabane. (Wareka Taeka N Rabakau 8:30.) E teimatoa Iesu ni karekea ana iraorao ae kaan ma Iehova. E kakaonimaki ni beku bwa ana tia taetae te Atua, ao e aranaki bwa “te Taeka,” bwa e karorokoa Ana rongorongo ao ana kaetieti te Atua.—Ioane 1:14.
2. Bukin tera ngke e roko n te aonnaba Iesu?
Tao 2,000 te ririki n nako, e kabongana taamneina Iehova n te aro ni kakai ni kamwainga maiun Iesu mai karawa nako nanoni biroton te aine ae tuai ni boo ma te mwaane ae arana Maria. N te aro aei, e a bungiaki Iesu bwa te aomata. (Wareka Ruka 1:34, 35.) E roko Iesu n te aonnaba bwa te Mesia are beritanaki, ke te Kristo, ao e na kamaiuia aomata. a A bane ni kakororaoaki taetae ni burabeti aika n te Baibara ibukin te Mesia, rinanon teuaei. Ao a a buokaki iai aomata n ataia ae Iesu bon “te Kristo . . . ae Natin te Atua are maiu.”—Mataio 16:16.
3. E a nga ngkai Iesu?
Ngke e toki maiun Iesu n aomata ao e a kautaki bwa te taamnei iroun te Atua, ao e a okira karawa. Ikanne are “e a karietataaki iai iroun te Atua nakon te nakoa ae rietata riki.” (I-Biribi 2:9) E a riki ngkai Iesu bwa te anera ae te kauoman ni mwaaka i aan Iehova.
REIAKINA AE BATI RIKI
Noria riki bwa antai raoi Iesu ao e aera ngkai e rangi ni kakawaki reiakinan taekana.
4. Bon tiaki te Atua ae Moan te Mwaaka Iesu
E angareirei te Baibara bwa e ngae ngke bon te anera ae mwaaka Iesu i karawa, ma e ongeaba nakon Atuana ao Tamana ae Iehova. E aera ngkai ti kona n taekina aei? Kaota te TAAMNEI n nora iai ana reirei te Baibara ni kaineti ma te kaokoro n nakoan Iesu ao te Atua ae moan te mwaaka.
A na buokira kiibu aikai n ataa irekereken Iehova ao Iesu. Wareki kiibu nako, ao maroroakin titiraki aikai:
Wareka Ruka 1:30-32.
-
E kangaa te anera ni kabwarabwaraa irekereken Iesu ao Iehova ae te Atua are “Teuare Moan te Rietata”?
Wareka Mataio 3:16, 17.
-
Ni bwabetitoan Iesu, tera ae taekinna te bwanaa mai karawa?
-
Iroum, antai bwanaana arei?
Wareka Ioane 14:28.
-
Antai ae ikawai riki ao ae e kakannato riki? Te tama ke te nati?
-
Tera are nanonna Iesu ngke e wetea Iehova bwa Tamana?
Wareka Ioane 12:49.
-
E iangoia Iesu bwa e titeboo ma Tamana? Tera ngkoe am iango?
5. Iesu bon te Mesia
A bati taetae ni burabeti n te Baibara aika a na buokiia aomata n ataa te Mesia, are teuare e rineia te Atua bwa e na kamaiuia aomata. Kaota te TAAMNEI n reiakin iai taetae ni burabeti tabeua ake e kakororaoi Iesu ngke e roko n te aonnaba.
Wareki taetae ni burabeti aika n te Baibara aikai, ao maroroakin titiraki aikai:
Wareka Mika 5:2 n noria iai bwa e na bungiaki ia te Mesia. b
-
E kakororaoaki te taetae ni burabeti aei ni bungiakin Iesu?—Mataio 2:1.
Wareka Taian Areru 34:20 ao Tekaria 12:10 n nora iai te taetae ni burabeti ibukini maten te Mesia.
-
A koro nanon taetae ni burabeti aikai?—Ioane 19:33-37.
-
N am iango, e kona Iesu ni kamani bairei rikini baikai imwain rikia?
-
Tera ae ko a kakoauaa iai man aei, ni kaineti ma Iesu?
6. Ti kakabwaiaaki man reiakinan taekan Iesu
E kateretereaki n te Baibara kakawakin reiakinan taekan Iesu ao mwiokoana. Wareka Ioane 14:6 ao 17:3, ao maroroakina te titiraki aei:
-
E aera ngkai e kakawaki reiakinan taekan Iesu?
E kauka te kawai Iesu bwa ti na kona n riki bwa raoraon te Atua. E reireinira te koaua ibukin Iehova, ao ti a kona ni karekea te maiu are aki toki rinanona
A TAKU TABEMAN: “A aki kakoauaa Iesu Ana Tia Kakoaua Iehova.”
-
Ko na kangaa ngkoe ni kaeka?
KAKIMOTOTOANA
Iesu bon te anera ae mwaaka. Bon natin te Atua ngaia ao te Mesia.
Kauring
-
E aera Iesu ngkai e aranaki bwa “te moanibung i buakoni baika karikaki ni kabane”?
-
Tera are e karaoia Iesu imwain rokona n te aonnaba?
-
Ti kangaa n ataia ae Iesu bon te Mesia?
NORI NABA AIKAI
Reiakinna riki bwa ti kangaa n ataia ae Iesu bon te Mesia.
Noria bwa e koaua ke e aki ae taekinaki n te Baibara bwa e karika Iesu te Atua n aroia aomata ni karika natiia.
“E Aera Iesu Ngkai E Aranaki Bwa Natin te Atua?” (Te kaongora n jw.org)
Wareka aroni bitakini maiun te aine temanna imwin reiakinan taekan Iesu n te Baibara.
“E Kabwarabwaraa Bukini Manga Neneran Ana Onimaki, te Aine ae te I-Iutaia” (Taratara!, Mei 2013)
a E na maroroakinaki n reirei 26 ao 27 bukina ngkai ti kainnanoa kamaiuara ngaira aika aomata, ao aron Iesu ni kamaiuira.
b Nora Kabwarabwaraana 2 ibukin te taetae ni burabeti ae e a kaman taekinaki imwaini kaotin Iesu n te aonnaba.
Ko Bae Naba n Tangira
TITIRAKI AIKA TATABEKAKI
Tera te Reirei n te Baibara?
Karekei kaekaan titiraki ni kaineti ma kairan te reirei n te Baibara iroura.
