LEKSION 15
Sinni si Jesus?
Si Jesus ay tadday ta pinaka-sikat nga tolay ta mundo. Aru nga totolay i makannammu ta ngaganna, ngem awan kuruga tu ammuda meyannung nisa. Nadduruma gapa i opinion na karuan nu sinni talaga si Jesus. Anni i kagian na Biblia meyannung nisa?
1. Sinni si Jesus?
Makapangngua nga espiritu si Jesus nga maddian ta langi. Nige nga pinaratu ni Jehova nga Dios i tanakuan ira nga gannug, pinaratuna labbi si Jesus. Megafu tatun, nagalan si Jesus nga “i kaka nga Ana na Dios.” (Colosas 1:15) Kagian na Biblia nga si Jesus “i tattadday nga Ana” na Dios megafu ta si Jesus laman i direkta nga pinaratu ni Jehova. (Juan 3:16) Nakipattrabahu gapa tu mapia si Jesus ta Yamana nga si Jehova, inuffunanna yayya ta pamaratuna ta ngamin nga ganna-gannug. (Bibbigan i Proverbio 8:30.) Egga i madukko nga relasion ni Jesus kani Jehova. Yayya “i Uvovug.” Matalo yayya nga nasserbi bilang pannakasimu na Dios. Niyaddena i mensahe anna instruksion ira na Dios.—Juan 1:14.
2. Ngatta minay si Jesus ta davvun?
Ma-2,000 dagun ngana i nappasa, nagangngua si Jehova tu milagro. Niyusana i masanto nga espirituna tapenu meyali i inango ni Jesus ta san na birhen nga si Maria. Megafu tatun, neyana si Jesus bilang tolay. (Bibbigan i Lucas 1:34, 35.) Zinog ni Jehova si Jesus ta davvun tapenu masserbi nga Mesias, onu Cristo, anna ipaliag i totolay. a Natuppal kani Jesus i ngamin nga profesiya na Biblia meyannung ta Mesias, yatutta nakilala na totolay nga yayya “i Cristo, i Ana na Dios nga matolay.”—Mateo 16:16.
3. Sitaw ngana i dian ni Jesus?
Kabalin na patay ni Jesus, pinaginnolay yayya na Dios bilang espiritu anna nanoli ta langi. “Niddan na Dios yaya ta katannangan nga kekakua.” (Filipos 2:9) Egga i atatannang nga autoridad ni Jesus—si Jehova laman i mas atannang nisa.
GIGIAMMUAN I ARU PAGA
Ammuan paga nu sinni talaga si Jesus anna nu ngatta importante nga gigiammuattam i meyannung nisa.
4. Ari tu si Jesus i Makapangngua sa Ngamin nga Dios
Ituddu na Biblia nga maski nu makapangngua nga espiritu si Jesus, makimoray yayya ta Dios anna Yamana nga si Jehova. Ngatta makagi tam yatun? Girawan i VIDEO tapenu mammuan i ituttuddu na Biblia meyannung ta posision ni Jesus nu mekumpara ta makapangngua sa ngamin nga Dios.
Uffunan ittam na tumunug ira nga teksto tapenu mantindian i relasion ni Jehova kani Jesus. Bibbigan i kada teksto, anna paguvovugan i pakkiavu ira.
Bibbigan i Lucas 1:30-32.
-
Anni i kinagi na anghel nga relasion ni Jesus ta “Katannangan” nga Dios nga si Jehova?
Bibbigan i Mateo 3:16, 17.
-
Turi ta nabawtisowan si Jesus, anni i kinagi na ngaral nga naggafu ta langi?
-
Sinni i naguvovug?
Bibbigan i Juan 14:28.
-
Sinni i mas manakam anna mas egga i autoridadna? I yama onu i ana?
-
Anni i kayà kagian ni Jesus turi ta inagalanna si Jehova tu Yamana?
Bibbigan i Juan 12:49.
-
Ninono kari ni Jesus nga tattadday ira na Yamana? Anni i makagim?
5. Napakurug nga si Jesus talaga i Mesias
Aru nga profesiya ta Biblia i makoffun ta totolay nga makilala i Mesias—i pinili na Dios nga mangipaliag ta totolay. Girawan i VIDEO tapenu mammuan i karuan ira nga profesiya nga natuppal kani Jesus ta keggana ta davvun.
Bibbigan i profesiya ira ta Biblia, anna paguvovugan i pakkiavu ira:
Bibbigan i Mikias 5:2 tapenu mammuan nu sitaw meyana i Mesias. b
-
Natuppal kari yaw nga profesiya turi ta neyana si Jesus?—Mateo 2:1.
Bibbigan i Salmo 34:20 anna Zacarias 12:10 tapenu mammuan i detalye ira nga neprofesiya ta kapatay na Mesias.
-
Natuppal kari yaw ira nga profesiya?—Juan 19:33-37.
-
Para nikaw, kinontrol kari ni Jesus i ketuppal na profesiya ira?
-
Anni i pakurugan natun meyannung kani Jesus?
6. Mabenefisiowan ittam ta paggigiammu meyannung kani Jesus
Kagian na Biblia nga importante nga gigiammuattam i meyannung kani Jesus anna ta annunganna. Bibbigan i Juan 14:6 anna 17:3, anna paguvovugan yaw nga pakkiavu:
-
Ngatta importante nga gigiammuan i meyannung kani Jesus?
Si Jesus i nangivuka ta dalan tapenu mabbalin ittam tu kofun na Dios. Nitudduna i kinakurug meyannung kani Jehova, anna megafu nisa, malawa tam i mannanayun nga inango
I KAGIAN NA KARUAN: “Ari nga mangurug i Saksi ira ni Jehova kani Jesus.”
-
Anni i tabbag mu?
ANNI I NAGIGIAMMUM?
Makapangngua nga espiritu si Jesus. Yayya i Ana na Dios anna i Mesias.
Review
-
Ngatta magalan si Jesus tu “i kaka nga Ana na Dios”?
-
Anni i kingngua ni Jesus nigena minay ta davvun?
-
Ngatta makagi tam nga si Jesus i Mesias?
I AWAYYAM PAGA KUAN
Ammuan paga i annungan ni Jesus bilang Mesias.
“Pakurugan Kari na Profesiya ira ta Biblia nga si Jesus i Mesias?” (Artikulo ta website)
Ammuan i tuddu na Biblia nu kunnasi nga nabbalin tu Yama ni Jesus i Dios.
“Ngatta Nagalan si Jesus tu Ana na Dios?” (Artikulo ta website)
Ammuan nu ngatta ari nga ituddu na Biblia i Trinidad.
Bibbigan nu kunnasi nga nanguli i pattolay na tadday nga babay turi ta ginigiammuna i kagian na Biblia meyannung kani Jesus.
“Nipakanawag na Tadday nga Judio nga Babay nu Ngatta Inulina i Pangurugna” (Malukag!, Mayo 2013)
a Magigiammu ta Leksion 26 anna 27 nu ngatta kawagan nga mapaliag i totolay, anna nu kunnasi nga nipaliag ittam ni Jesus.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
